દિલ્હી પ્રીમિયર લીગ (DPL) 2026માં 4 ઑગસ્ટે ન્યૂ દિલ્હી ટાઇગર્સના કેપ્ટન હિંમત સિંહે એક એવો રન આઉટ કર્યો, જેને ક્રિકેટ ઇતિહાસની સૌથી વિચિત્ર મોમેન્ટમાં ગણવામાં આવી રહી છે. છેલ્લી ઓવરના છેલ્લા બોલ પર થયેલો આ ડ્રામા સોશિયલ મીડિયા પર ઝડપથી વાઇરલ થઈ ગયો છે. મેચ ટાઈ થઈ અને સુપર ઓવરમાં ગઈ 15 ઓવરની આ મેચમાં આઉટર દિલ્હી વોરિયર્સને જીતવા માટે છેલ્લી ઓવરના છેલ્લા બોલ પર માત્ર 1 રનની જરૂર હતી. બેટરે સીધો શોટ રમ્યો અને બંને બેટર રન માટે દોડી પડ્યા. બોલ હિંમત સિંહ પાસે હતો અને તેની પાસે બેટરને સરળતાથી રન આઉટ કરવાની તક હતી. પરંતુ હિંમત સિંહથી બોલ પકડવામાં ચૂક થઈ ગઈ. આ સરળ તક હાથમાંથી જતી રહેતા તેણે ગુસ્સામાં બોલને પગથી કિક મારી દીધી. આશ્ચર્યની વાત એ રહી કે બોલ સીધો નોન-સ્ટ્રાઇકર એન્ડના સ્ટમ્પ સાથે જઈને અથડાયો. ત્યાં સુધીમાં બેટર પ્રથમ સલૂજા પોતાની ક્રિઝ સુધી પહોંચી શક્યો નહોતો અને રન આઉટ થઈ ગયો. આ વિકેટની સાથે જ મેચ ટાઈ થઈ ગઈ અને મુકાબલો સુપર ઓવરમાં પહોંચી ગયો. આ અનોખો રન આઉટ જોઈને મેદાન પર હાજર તમામ ખેલાડીઓ પણ હેરાન રહી ગયા હતા. જોકે સુપર ઓવરમાં આઉટર દિલ્હી વોરિયર્સે બાજી મારી લીધી હતી, પરંતુ હિંમત સિંહનો આ અનોખો રન આઉટ આખી મેચની સૌથી વધુ વાઇરલ થયેલી મોમેન્ટ બની ગઈ. સોશિયલ મીડિયા પર ફેન્સ તેને ક્રિકેટના સૌથી નસીબદાર રન આઉટમાંથી એક ગણાવી રહ્યા છે અને આ વાઇરલ વીડિયોને ખૂબ લાઇક આપી રહ્યા છે.