ભારતીય હેડ કોચ ગૌતમ ગંભીર માટે અત્યાર સુધીની સફર સરળ રહી નથી. ટેસ્ટમાં 10 હાર પછી પણ પૂર્વ ભારતીય લેગ સ્પિનર અમિત મિશ્રાએ તેમનું સમર્થન કર્યું છે. મિશ્રાએ કહ્યું કે આ સમયગાળા માટે માત્ર કોચને જવાબદાર ઠેરવવા યોગ્ય નથી. તેના મતે, ખેલાડીઓએ પણ વધુ જવાબદારી લેવાની જરૂર છે અને ગંભીરને રેડ-બોલ ક્રિકેટમાં સમય મળવો જોઈએ. વ્હાઇટ-બોલ ક્રિકેટમાં ટીમ ઈન્ડિયાએ શાનદાર પરિણામો આપ્યા છે, પરંતુ ટેસ્ટ ક્રિકેટમાં પ્રદર્શનને લઈને સવાલો ઉભા થયા છે. આ જ કારણોસર ટીમના કોચિંગ સેટઅપ અને ખાસ કરીને ગંભીરની ભૂમિકા પર ચર્ચા થતી રહી છે. ટેસ્ટમાં ગંભીર પર શા માટે સવાલો ઉભા થયા? ગંભીરના કાર્યકાળમાં ન્યૂઝીલેન્ડે ભારતને ઘરઆંગણે 3-0થી હરાવ્યું, જ્યારે સાઉથ આફ્રિકા સામે ભારતને ઘરમાં 2-0થી હારનો સામનો કરવો પડ્યો. ભારતે ઓસ્ટ્રેલિયામાં બોર્ડર-ગાવસ્કર ટ્રોફી 3-1થી ગુમાવી. ત્યારબાદ ઇંગ્લેન્ડ સામેની ટેસ્ટ સિરીઝ 2-2થી બરાબર રહી. વર્તમાન વર્લ્ડ ટેસ્ટ ચેમ્પિયનશીપ સાયકલમાં પણ ભારતની સ્થિતિ હાલમાં મજબૂત નથી. આવી સ્થિતિમાં, આગામી ટેસ્ટ સિરીઝ ટીમ માટે ખૂબ જ મહત્વપૂર્ણ બનવાની છે. મિશ્રાએ કોચને દોષ આપવાનો ઇનકાર કર્યો સતત ખરાબ પરિણામો વચ્ચે અલગ-અલગ ફોર્મેટ માટે અલગ કોચ રાખવાની ચર્ચા પણ સામે આવતી રહી છે. મિશ્રા આ વિચાર સાથે સંપૂર્ણપણે સહમત નથી. મિશ્રાએ કહ્યું, કોચ માટે આ મુશ્કેલ છે. મને લાગે છે કે ખેલાડીઓએ વધુ જવાબદારી લેવાની જરૂર છે. ઘણા વર્ષોથી એક કોચ બધા ફોર્મેટ માટે રહ્યો છે. કોઈપણ કોચને સમય આપવો જરૂરી છે. તેણે આગળ કહ્યું, ટેસ્ટ મેચમાં અમારી પાસે ઓછા અનુભવ ધરાવતા નવા ખેલાડીઓ છે. કોચ અને ખેલાડીઓને સાથે મળીને કામ કરવા અને વિકસિત થવામાં સમય લાગે છે. રાહુલ દ્રવિડનું ઉદાહરણ આપ્યું પોતાની વાત સમજાવવા માટે મિશ્રાએ રાહુલ દ્રવિડનું ઉદાહરણ પણ આપ્યું. તેમણે કહ્યું કે, રાહુલ દ્રવિડને પોતાને સ્થાપિત કરવામાં 1-1.5 વર્ષ લાગ્યા હતા. ત્યારબાદ પ્રદર્શનમાં સુધારો આવ્યો. મિશ્રાના મતે, આંતરરાષ્ટ્રીય ક્રિકેટમાં સ્થાન મળવું જ પૂરતું નથી. ખેલાડીઓને પરિસ્થિતિ અનુસાર પોતાની રમત બદલતા પણ આવડવું જોઈએ. ગંભીરને રેડ-બોલમાં વધુ સમય આપવાની માંગ મિશ્રાનું માનવું છે કે ગંભીરને ટેસ્ટ ક્રિકેટમાં પોતાની યોજનાઓ લાગુ કરવા માટે પૂરતો સમય મળવો જોઈએ. તેમણે કહ્યું કે, તેમને રેડ-બોલ ક્રિકેટમાં સમય આપો. તેમને ટીમના નવા ખેલાડીઓને સમજાવવાની જરૂર છે. કોચ અને ખેલાડીની ભૂમિકાનો ફરક સમજાવતા મિશ્રાએ કહ્યું કે, કોચનું કામ માનસિક પાસાઓ અને કૌશલ્યો પર કામ કરવાનું છે, પરંતુ ખેલાડીઓને મેદાન પર પ્રદર્શન કરવું પડે છે. તેમણે કહ્યું કે, તમારે દબાણ લેવું પડે છે, પરિસ્થિતિઓને સમજવી પડે છે. તમારે સમય પસાર કરવો પડે છે અને પરિસ્થિતિ, ખેલાડી, બોલર અને વિકેટ અનુસાર પોતાની રમત બદલવી પડે છે.