રમત મંત્રાલયે મંગળવારે રાષ્ટ્રીય ખેલ પુરસ્કાર 2025ની જાહેરાત કરી છે. 12 વર્ષમાં પહેલીવાર એવું બન્યું છે જ્યારે કોઈ ખેલાડીને ખેલ રત્ન આપવામાં આવ્યો ન હોય. આ પહેલા 2014માં આવું બન્યું હતું. આ વર્ષે 17 ખેલાડીઓને અર્જુન એવોર્ડ માટે પસંદ કર્યા છે. જેમાં ચેસ ખેલાડી દિવ્યા દેશમુખ, વિદિત ગુજરાતી, એથ્લીટ તેજસ્વિન શંકર અને બેડમિન્ટન ખેલાડી ગાયત્રી ગોપીચંદ અને ત્રિશા જોલી જેવા નામોનો સમાવેશ થાય છે. ફૂટબોલના દિગ્ગજ 84 વર્ષીય આઈ. અરુમાયનાયગમને અર્જુન એવોર્ડની લાઇફટાઇમ કેટેગરીમાં પસંદ કર્યા છે. તેઓ 1962ના જકાર્તા એશિયન ગેમ્સમાં ગોલ્ડ મેડલ જીતનાર ભારતીય ટીમનો ભાગ હતા. તેજસ્વિને શરૂઆત ક્રિકેટથી કરી તેજસ્વિન શંકરના પિતા ઈચ્છતા હતા કે તે અભ્યાસ પર ધ્યાન આપે અને જો રમવું જ હોય તો ક્રિકેટ રમે. સ્કૂલ કોચે તેની એથ્લેટિક ક્ષમતા ઓળખી. ધીમે ધીમે તેજસ્વિને હાઈ જમ્પ અપનાવી લીધો. 17 વર્ષની ઉંમરે તેણે 2.26 મીટરનો કૂદકો લગાવીને સિનિયર નેશનલ રેકોર્ડ તોડી નાખ્યો. એથ્લેટિક્સ માટે પિતાને પત્ર લખ્યો 15 વર્ષના તેજસ્વિને પોતાના પિતાને એક ભાવુક પત્ર લખીને એથ્લેટિક્સ ચાલુ રાખવાની મંજૂરી માગી. પિતા માની ગયા, જોકે તેના થોડા સમય પછી જ તેનું અવસાન થયું. તેજસ્વિનની કારકિર્દીમાં મોટો વળાંક આવ્યો 2022માં. તેણે 2.27 મીટરનો કોમનવેલ્થ ગેમ્સ ક્વોલિફાઇંગ માર્ક હાંસલ કર્યો. તે આવું કરનાર એકમાત્ર ભારતીય હતો, છતાં બર્મિંગહામ કોમનવેલ્થ ગેમ્સ માટે તેનું નેશનલ ટીમમાં સિલેક્શન ન થયું. તેજસ્વિને આ નિર્ણયને દિલ્હી હાઈકોર્ટમાં પડકાર્યો. કોર્ટના આદેશ પર તેને ટીમમાં સામેલ કર્યા. તેજસ્વિને બર્મિંગહામમાં 2.22 મીટરની છલાંગ લગાવીને બ્રોન્ઝ મેડલ જીત્યો. દિવ્યાએ FIDE વુમન્સ વર્લ્ડ કપનો ખિતાબ જીત્યો હતો ચેસમાં દિવ્યા દેશમુખ અને વિદિત ગુજરાતીને અર્જુન એવોર્ડ માટે પસંદ કરવામાં આવ્યા છે. દિવ્યાએ 2025માં FIDE વુમન્સ વર્લ્ડ કપનો ખિતાબ જીત્યો હતો. બેડમિન્ટનમાં ગાયત્રી ગોપીચંદ અને ત્રિશા જોલીને અર્જુન એવોર્ડ માટે પસંદ કર્યા છે. બંને મહિલા ડબલ્સમાં ભારતની મુખ્ય ખેલાડીઓ રહી છે. 90ના દાયકામાં ખેલ રત્ન પુરસ્કારની શરૂઆત થઈ 1991-92માં પીવી નરસિમ્હા રાવની સરકારે ખેલ રત્ન પુરસ્કારની શરૂઆત કરી હતી. તે સમયે તેનું નામ રાજીવ ગાંધી ખેલ રત્ન પુરસ્કાર હતું. 2021માં તેનું નામ બદલીને મેજર ધ્યાનચંદ ખેલ રત્ન પુરસ્કાર કરવામાં આવ્યું.