42 વર્ષીય અલ્ટ્રા-રનર સોફી વુડ્સે રમતગમત જગતમાં એક નવો મુકામ હાંસલ કર્યો છે. ન્યૂઝીલેન્ડની સોફીએ દુનિયાની સૌથી મુશ્કેલ એન્ડ્યુરન્સ પડકારોમાંથી એક ‘વાયા એલ્પિના’ને માત્ર 29 દિવસમાં પૂરી કરીને નવો રેકોર્ડ પોતાના નામે કર્યો છે.
બે હજાર કિલોમીટરની દોડમાં સોફીએ આઠ દેશોની સરહદો પાર કરી. આ આખી દોડ દરમિયાન તેમણે જેટલી ઊંચાઈ ચઢી, તે માઉન્ટ એવરેસ્ટ પર 12 વખત ચઢવા બરાબર છે. સોફીએ આ મેરેથોનની શરૂઆત 4 જુલાઈએ ઇટાલીથી કરી હતી. ત્યારબાદ તેમની આ યાત્રા સ્લોવેનિયા, ઓસ્ટ્રિયા, જર્મની, લિક્ટેનસ્ટીન, સ્વિટ્ઝર્લેન્ડ અને ફ્રાન્સના રસ્તાઓ પરથી પસાર થતી શનિવારે રાત્રે મોનાકોના ભૂમધ્યસાગરના કિનારે સમાપ્ત થઈ. તેમણે બ્રિટિશ રનર જેક કેટરેલનો રેકોર્ડ તોડ્યો છે, જેમણે 2024માં આ જ રૂટને 35 દિવસમાં પૂરો કર્યો હતો. પોતાની આ સફળતા પર સોફીએ કહ્યું કે તેઓ ખૂબ ખુશ છે, પરંતુ ખૂબ થાકી ગયા છે. પોતાના લક્ષ્યને હાંસલ કરવા માટે તેમણે છેલ્લા કેટલાક દિવસોમાં ફક્ત દોઢથી અઢી કલાકની જ ઊંઘ લીધી. સોફી અને તેમની ટીમને રસ્તામાં બે ખતરનાક હીટવેવ, ભયંકર તોફાનો અને ખતરનાક જંતુઓ (હોર્સફ્લાઇઝ)ના હુમલાઓનો સામનો કરવો પડ્યો. યુરોપના ઘણા દેશો આ સમયે ભયાનક હીટવેવ અને જંગલોની આગ સામે ઝઝૂમી રહ્યા છે. આ આગને કારણે સોફીને પણ પોતાનો નિર્ધારિત રસ્તો બદલવો પડ્યો. આ ભટકાવને કારણે તેમની દોડમાં 5 કિલોમીટરનું અંતર અને 200 મીટરની ખતરનાક ચઢાઈ વધુ ઉમેરાઈ. સોફીએ જણાવ્યું કે ઘણી વાર તેમને લાગતું હતું કે તેઓ આ પડકારને કેવી રીતે પૂરો કરી શકશે, પરંતુ રોકાવાનો વિચાર તેમના મનમાં ક્યારેય આવ્યો નહીં. દરરોજ 15થી 18 કલાક સતત દોડવા માટે ભારે ઊર્જાની જરૂર પડે છે. સોફીએ આ માટે મેકડોનાલ્ડ્સ, પાસ્તા અને એનર્જી જેલ્સનો સહારો લીધો. આખી સફરમાં પતિ જ્યોર્જ, મિત્ર જોય અને પાલતુ કૂતરા નીલાએ તેમનો સાથ આપ્યો. સોફી કહે છે, ‘પહેલો અઠવાડિયું ખૂબ ભયાનક હતું, શરીરમાં સોજો હતો અને બધે દુખાવો હતો. મને લાગ્યું કે જાણે મારી લાખો માંસપેશીઓ ખેંચાઈ ગઈ છે. બીજું અઠવાડિયું પણ કંઈ ખાસ નહોતું, પરંતુ ત્રીજા અઠવાડિયા સુધી મને લાગ્યું કે મારી ફિટનેસ પાછી આવી રહી છે.’ સોફીની આ સફળતા મહિલાઓની અલ્ટ્રા-રનિંગ માટે એક શાનદાર વર્ષનો ભાગ છે. આ પહેલા મે મહિનામાં રેચલ એન્ટ્રેકિને પણ એક મોટો રેકોર્ડ બનાવ્યો હતો. આઈવીએફ જેવી મુશ્કેલ મેડિકલ પ્રક્રિયામાંથી પસાર થયા પછી સોફી પોતાની જિંદગીને એક નવો આકાર આપવા માંગતી હતી. તેમણે સાબિત કરી દીધું કે અલ્ટ્રા-રનિંગનો સાચો અર્થ યોગ્ય તૈયારી, માનસિક મજબૂતી અને મુશ્કેલ પરિસ્થિતિઓમાં ટકી રહેવું છે. તેમનું માનવું છે કે મહિલાઓ કોઈપણ પરિસ્થિતિને અનુકૂળ પોતાને ઢાળવામાં અને આગળ વધવામાં માહિર હોય છે. હવે 29 દિવસ સુધી રોજ 18-18 કલાક દોડ્યા પછી સોફીનો શું પ્લાન છે? આના પર તે કહે છે, ‘હવે હું મોટાભાગનો સમય સોફા પર સૂઈને નેટફ્લિક્સ જોવામાં અને થોડી લીલી શાકભાજી ખાવામાં વિતાવીશ.’