ડિજિટલ પેમેન્ટની દુનિયામાં એક મોટો બદલાવ આવ્યો છે. Google Pay એ એક નવું ફીચર રજૂ કર્યું છે, જેનાથી હવે બેંક એકાઉન્ટ વગર પણ UPI પેમેન્ટ કરી શકાશે. UPI હેઠળ આવેલા આ ‘Pocket Money’ ફીચરમાં, યુઝર્સ પોતાના પરિવાર અથવા મિત્રોને પોતાના એકાઉન્ટમાંથી પેમેન્ટ કરવાની સુવિધા આપી શકે છે. ખાસ વાત એ છે કે સંપૂર્ણ કંટ્રોલ પ્રાઈમરી યુઝર (મુખ્ય વપરાશકર્તા) પાસે રહેશે. આ ફીચર ખાસ કરીને બાળકો અને એવા લોકો માટે ફાયદાકારક છે જેમના પાસે બેંક એકાઉન્ટ નથી.

શું છે Pocket Money ફીચર?

ગૂગલ પેનું આ નવું ફીચર UPI Circle હેઠળ કામ કરે છે, જેમાં એક પ્રાઈમરી યુઝર પોતાના એકાઉન્ટ સાથે સેકન્ડરી યુઝર્સ (ગૌણ વપરાશકર્તાઓ) ને જોડી શકે છે. આ સેકન્ડરી યુઝર્સ પરિવારના સભ્યો, મિત્રો અથવા કર્મચારીઓ હોઈ શકે છે. ખાસ વાત એ છે કે સેકન્ડરી યુઝર પાસે પોતાનું બેંક એકાઉન્ટ હોવું જરૂરી નથી, છતાં તે UPI પેમેન્ટ કરી શકે છે. જોકે, પેમેન્ટ પ્રાઈમરી યુઝરના બેંક એકાઉન્ટમાંથી જ કપાય છે. આ ફીચરનો હેતુ લોકોને સરળ રીતે ડિજિટલ પેમેન્ટની સુવિધા આપવાનો છે, ખાસ કરીને એવા લોકોને જે બેંકિંગ સિસ્ટમ સાથે પૂરી રીતે જોડાયેલા નથી.

મુખ્ય યુઝર પાસે રહેશે કંટ્રોલ

આ ફીચરમાં સૌથી મહત્વની બાબત એ છે કે મુખ્ય યુઝર પાસે સંપૂર્ણ કંટ્રોલ રહે છે. તે નક્કી કરી શકે છે કે સેકન્ડરી યુઝર કેટલા પૈસા ખર્ચ કરી શકે છે અને દરેક પેમેન્ટને મંજૂરી આપવી કે નહીં. જો મુખ્ય યુઝર પૂર્ણ પરવાનગી આપે છે, તો એક મહિનામાં 15,000 રૂપિયા સુધીની લિમિટ આપોઆપ સેટ થઈ જાય છે. આનાથી સુરક્ષા પણ જળવાઈ રહે છે અને ખર્ચ પર કંટ્રોલ પણ રહે છે. આ રીતે આ ફીચર બાળકોને પોકેટ મની આપવા અથવા કર્મચારીઓના ખર્ચને મેનેજ કરવાનો સરળ રસ્તો બની જાય છે.

કેવી રીતે સેટ કરવું ?

આ ફીચરનો ઉપયોગ કરવા માટે સૌથી પહેલા મુખ્ય યુઝર પાસે UPI એકાઉન્ટ હોવું જરૂરી છે. ત્યારબાદ તે પોતાના Google Pay એપમાં જઈને UPI Circle માં સેકન્ડરી યુઝર ઉમેરી શકે છે. આ માટે તે વ્યક્તિનો મોબાઈલ નંબર કોન્ટેક્ટ લિસ્ટમાં સેવ હોવો જોઈએ અને તેના ફોનમાં Google Pay એપ ઈન્સ્ટોલ હોવી જોઈએ. સેટઅપ દરમિયાન યુઝરે સંબંધની જાણકારી અને કેટલીક જરૂરી વિગતો પણ આપવાની હોય છે. ત્યારબાદ UPI PIN નાખીને ઈન્વાઈટ મોકલવામાં આવે છે. એકવાર સેટઅપ પૂરું થઈ ગયા પછી સેકન્ડરી યુઝર સરળતાથી પેમેન્ટ કરી શકે છે, પરંતુ સંપૂર્ણ કંટ્રોલ પ્રાઈમરી યુઝર પાસે જ રહે છે.

આ પણ વાંચો: Petrol Diesel Price Today: ક્યાં સસ્તું અને ક્યાં મોંઘુ પેટ્રોલ-ડીઝલ..જાણો ગુજરાતના શહેરનાં ભાવ