આજના સમયમાં સ્માર્ટફોન વિના જીવન અધૂરું લાગે છે, પરંતુ તેની બેટરી લાઇફ સમય જતાં ઘટવા લાગે છે. આધુનિક ફોનમાં લિથિયમ-આયન બેટરી હોય છે, જેની ખાસ કાળજી રાખવાથી તેનું આયુષ્ય બમણું કરી શકાય છે. જો તમે તમારા ફોનને વર્ષો સુધી નવા જેવો ચાલુ રાખવા માંગતા હોવ, તો નીચે મુજબની કેટલીક અસરકારક ટિપ્સ અનુસરો.
ચાર્જિંગનો 20-80 નિયમ:
ઘણા લોકો ફોનને 0% સુધી ખાલી થવા દે છે અથવા રાતોરાત 100% ચાર્જ પર છોડી દે છે, જે બેટરી માટે અત્યંત હાનિકારક છે. બેટરીને સંપૂર્ણપણે ડ્રેઇન થવા ન દો. જ્યારે ચાર્જિંગ 20% પર પહોંચે ત્યારે જ તેને પ્લગ-ઇન કરો અને 80-85 % સુધી ચાર્જ કરીને કાઢી લો. આનાથી બેટરી પર વોલ્ટેજ તણાવ ઓછો થાય છે અને ચાર્જિંગ સાયકલ લાંબી ચાલે છે.
ડિસ્પ્લે સેટિંગ્સમાં ફેરફાર:
સ્માર્ટફોનમાં સૌથી વધુ બેટરી સ્ક્રીન વાપરે છે. બેટરી બચાવવા માટે ડાર્ક મોડનો ઉપયોગ કરો, ખાસ કરીને જો તમારા ફોનમાં AMOLED સ્ક્રીન હોય. ડાર્ક મોડમાં પિક્સેલ્સ બંધ રહેતા હોવાથી ઉર્જા બચે છે. આ ઉપરાંત, એડપ્ટિવ બ્રાઇટનેસ ચાલુ રાખો અને જો જરૂર ન હોય તો ઉચ્ચ રિફ્રેશ રેટ (120Hz) ને બદલે 60Hz પર સ્વિચ કરો.
ગરમીથી રક્ષણ:
બેટરીનો સૌથી મોટો દુશ્મન ગરમી છે. ચાર્જિંગ વખતે જો ફોન ગરમ થાય તો તેનો કેસ કાઢી નાખવો જોઈએ. ફોનને સીધા સૂર્યપ્રકાશમાં અથવા કારના ડેશબોર્ડ પર ક્યારેય ન મૂકો, કારણ કે અતિશય ગરમી બેટરીના આંતરિક રસાયણોને કાયમી નુકસાન પહોંચાડી શકે છે.
ઓરિજિનલ એક્સેસરીઝનો આગ્રહ:
હંમેશા ફોન સાથે આવેલા મૂળ ચાર્જરનો જ ઉપયોગ કરો. સસ્તા કે લોકલ ચાર્જરનો વોલ્ટેજ બેટરીને ફૂલાવી શકે છે અથવા તેને આંતરિક રીતે નુકસાન કરી શકે છે. જો મૂળ ચાર્જર ન હોય, તો જાણીતી અને પ્રમાણિત બ્રાન્ડનું ચાર્જર વાપરવું હિતાવહ છે.
બિનજરૂરી સુવિધાઓ બંધ રાખો:
બેકગ્રાઉન્ડ એપ્લિકેશનો ડેટા અને બેટરી બંનેનો ઉપયોગ કરે છે. જે એપ્લિકેશનની જરૂર ન હોય તેને અનઇન્સ્ટોલ કરો. ઉપરાંત, જીપીએસ, બ્લૂટૂથ અને વાઇફાઇનો ઉપયોગ કર્યા બાદ તેને બંધ કરવાની આદત પાડો. એપ્લિકેશન નોટિફિકેશન મર્યાદિત રાખવાથી પણ સ્ક્રીન વારંવાર ચાલુ થતી અટકશે અને બેટરી બચશે.
સોફ્ટવેર અપડેટ:
મોબાઇલ કંપનીઓ અવારનવાર સોફ્ટવેર અપડેટ્સ દ્વારા ‘બેટરી ઓપ્ટિમાઇઝેશન’ ફિચર્સ રિલીઝ કરતી હોય છે. તમારા ફોનને હંમેશા લેટેસ્ટ સોફ્ટવેરથી અપડેટ રાખો જેથી બેટરી મેનેજમેન્ટ વધુ સારું થઈ શકે. આ સરળ ફેરફારો કરવાથી તમે તમારા સ્માર્ટફોનનું સ્વાસ્થ્ય લાંબા સમય સુધી જાળવી શકશો.
આ પણ વાંચોઃ AI નો જાદુ, એકલા હાથે ઉભી કરી નાખી 16,700 કરોડની કંપની, જાણો આખી કહાની
