પેટીએમ પેમેન્ટ્સ બેંકનું કામકાજ આજથી 24 એપ્રિલથી સંપૂર્ણપણે બંધ કરી દેવામાં આવ્યું છે. ભારતીય રિઝર્વ બેંકે પેટીએમ પેમેન્ટ્સ બેંક લિમિટેડ (PPBL)નું બેંકિંગ લાઇસન્સ તાત્કાલિક અસરથી રદ કરી દીધું છે.

RBIએ જણાવ્યું કે બેંકના કામકાજથી ગ્રાહકોના પૈસા સુરક્ષિત નહોતા. જોકે, UPI એપ પહેલાની જેમ ચાલુ રહેશે.

RBIએ કહ્યું છે કે પેટીએમ પેમેન્ટ્સ બેંક પાસે એટલી રોકડ છે કે બેંક બંધ થવાની પ્રક્રિયા દરમિયાન તે તેના તમામ ગ્રાહકોની જમા રકમ પાછી આપી શકે છે. આનો અર્થ એ છે કે જમાકર્તાઓના પૈસા ડૂબવાની શક્યતા નથી.

RBIએ પેટીએમ પેમેન્ટ્સ બેંક બંધ કરવાનો આદેશ આપ્યો.

આ નિર્ણયની શું અસર થશે

જો તમે Paytm UPI ને કોઈ અન્ય બેંક (જેમ કે SBI, HDFC વગેરે) સાથે લિંક કરીને ચલાવી રહ્યા છો, તો UPI ચાલુ રહેશે.

પરંતુ જો Paytm Payments Bank જ તમારું બેઝ એકાઉન્ટ હતું તો તમારે તેને અન્ય બેંકમાં શિફ્ટ કરવું પડશે. આ બેંકમાં જમા પૈસા તમે કાઢી શકો છો.

RBIએ લાયસન્સ રદ કરવાના 4 કારણો જણાવ્યા

• ગ્રાહકોનું નુકસાન: બેંક જે રીતે કામ કરી રહી હતી, તેનાથી ત્યાં પૈસા જમા કરાવનારા લોકોના પૈસા સુરક્ષિત નહોતા.
• મેનેજમેન્ટની બેદરકારી: બેંક ચલાવનારા અધિકારીઓનું વલણ અને નિર્ણયો સામાન્ય જનતા અને ખાતાધારકોના ફાયદામાં નહોતા.
• ચાલુ રાખવાનો કોઈ ફાયદો નથી: રિઝર્વ બેંકને લાગ્યું કે આ બેંકને વધુ ચલાવવાથી જનતાને કોઈ લાભ નહીં થાય, પરંતુ જોખમ જ વધશે.
• શરતો તોડી: બેંકે લાઇસન્સ લેતી વખતે જે વચનો અને નિયમો (જેમ કે KYC અને ફંડ્સનો યોગ્ય ઉપયોગ) માન્યા હતા, તેનું સતત ઉલ્લંઘન કરવામાં આવ્યું.

લાઇસન્સ રદ થયા પછી Paytmના શેરમાં ઘટાડો

શુક્રવારે શેરબજારમાં પેટીએમની મૂળ કંપની ‘વન 97 કોમ્યુનિકેશન્સ’ના શેરમાં ઘટાડો જોવા મળ્યો. પેટીએમના શેર 0.5% ઘટીને 1,153 રૂપિયા પ્રતિ શેર પર બંધ થયા. બેંકિંગ લાઇસન્સ રદ થવાના સમાચારની અસર આવનારા દિવસોમાં સ્ટોક પર વધુ જોવા મળી શકે છે.

2022થી જ RBIના રડાર પર હતી પેટીએમ બેંક

પેટીએમ પેમેન્ટ્સ બેંક પર રિઝર્વ બેંકની કડકાઈ ઘણી જૂની છે. તેની શરૂઆત માર્ચ 2022માં થઈ હતી, જ્યારે RBIએ બેંકને નવા ગ્રાહકો ઉમેરવાથી રોકી દીધી હતી. ત્યારબાદ જાન્યુઆરી 2024માં નિયમોના ઉલ્લંઘન અને કસ્ટમર ડ્યુ ડિલિજન્સ (KYC) માં ખામીઓના કારણે બેંકને નવી ડિપોઝિટ લેવાથી પણ રોકી દેવામાં આવી હતી.

ત્યારથી બેંક માત્ર જૂની ડિપોઝિટ ઉપાડવા અને લોન રેફરલ જેવી મર્યાદિત પ્રવૃત્તિઓ સુધી જ સીમિત રહી હતી.

2015માં મળ્યું હતું લાઇસન્સ, મોટા રોકાણકારોનો હતો સાથ

પેટીએમ પેમેન્ટ્સ બેંકને ઓગસ્ટ 2015માં મર્યાદિત બેંકિંગ લાઇસન્સ મળ્યું હતું. આ અંતર્ગત બેંક નાની જમા રકમ સ્વીકારી શકતી હતી, પરંતુ તેને સીધી લોન આપવાની મંજૂરી નહોતી. આ બેંકને વન 97 કોમ્યુનિકેશન્સનો ટેકો હતો, જેમાં ચીનના ‘આન્ટ ગ્રુપ’ (Ant Group) અને જાપાનના ‘સોફ્ટબેંક’ જેવા દિગ્ગજ રોકાણકારો સામેલ હતા.

દિવ્ય ભાસ્કરને Google પર મનપસંદ સોર્સ બનાવો