બોલિવૂડ એક્ટર અક્ષય કુમારની દીકરી નિતારા પાસેથી ન્યૂડ તસવીરો માંગવા સંબંધિત કેસમાં મહારાષ્ટ્રની સાયબર પોલીસે એક શખ્સની ધરપકડ કરી છે.

મહારાષ્ટ્ર સાયબરના અધિક પોલીસ મહાનિર્દેશક (ADGP) યશસ્વી યાદવે શુક્રવારે ધરપકડની જાણકારી આપી. તેમણે જણાવ્યું કે, ‘તપાસ બાદ આરોપીને કસ્ટડીમાં લેવામાં આવ્યો છે.’

પોલીસે અક્ષય કુમારની દીકરીની હિંમતને વખાણી

મહારાષ્ટ્ર સાયબર ડિપાર્ટમેન્ટે મુંબઈના આર.ડી. નેશનલ કોલેજમાં સાયબર અવેરનેસ પર એક સ્પેશિયલ સેશન પણ આયોજિત કર્યું. આ દરમિયાન ADGP યશસ્વી યાદવે કહ્યું કે, ‘અક્ષયની દીકરીએ હિંમત બતાવીને તરત જ પોતાના પરિવારને આ વિશે જણાવ્યું, ત્યારબાદ મામલો સાયબર પોલીસ સુધી પહોંચ્યો અને કાર્યવાહી કરવામાં આવી.’

ADGP યશસ્વી યાદવ સાયબર અવેરનેસ કાર્યક્રમમાં ઘટના વિશે વાત કરી.

આ દરમિયાન અક્ષય કુમારનો ઓક્ટોબર 2025નો એક જૂનો વીડિયો પણ ચલાવવામાં આવ્યો હતો, જેમાં તેણે આ ઘટનાનો ઉલ્લેખ કર્યો હતો. તેણે જણાવ્યું હતું કે, ‘શરૂઆતમાં ગેમ દરમિયાન સામાન્ય વાતચીત થઈ હતી, પરંતુ બાદમાં અજાણ્યા વ્યક્તિએ પહેલા લોકેશન પૂછ્યું, પછી જેન્ડર પૂછ્યું અને તે પછી ન્યૂડ ફોટો મોકલવાની માંગ કરી.’

ગયા વર્ષે અક્ષયે ઘટના વિશે જણાવ્યું હતું

ગયા વર્ષે અક્ષયે જણાવ્યું હતું કે, ઓનલાઈન ગેમ રમતી વખતે તેની દીકરી પાસેથી ન્યૂડ ફોટોઝ માંગવામાં આવ્યા હતા. 3 ઓક્ટોબર 2025ના રોજ મુંબઈ પોલીસના ‘સાયબર અવેરનેસ મંથ 2025’ના ઉદ્ઘાટન કાર્યક્રમમાં અક્ષય કુમાર પહોંચ્યો હતો. આ કાર્યક્રમમાં મહારાષ્ટ્રના મુખ્યમંત્રી દેવેન્દ્ર ફડણવીસ, વરિષ્ઠ પોલીસ અધિકારીઓ પણ હાજર હતા.

જ્યાં અક્ષયે કહ્યું હતું,

હું આપ સૌને એક નાનકડી ઘટના જણાવવા માંગુ છું, જે થોડા મહિના પહેલા મારા ઘરે બની હતી. મારી દીકરી એક વીડિયો ગેમ રમી રહી હતી. કેટલીક એવી વીડિયો ગેમ્સ હોય છે, જેને તમે કોઈની સાથે ઓનલાઈન રમી શકો છો. તે સમયે તે એક અજાણ્યા વ્યક્તિ સાથે રમી રહી હતી. જ્યારે તમે ગેમ રમો છો, ત્યારે ત્યાંથી ક્યારેક મેસેજ આવવા લાગે છે. એક મેસેજ આવ્યો કે તું છોકરો છે કે છોકરી? મારી દીકરીએ જવાબ આપ્યો કે છોકરી. ત્યારબાદ તે વ્યક્તિએ મેસેજ મોકલ્યો કે શું તું તારી ન્યૂડ તસવીરો મોકલી શકે છે? તેણે તરત જ ગેમ બંધ કરી દીધી અને જઈને તેની માતા ટ્વિંકલને જણાવ્યું. અહીંથી જ વસ્તુઓ શરૂ થાય છે. આ પણ સાયબર ક્રાઈમનો એક ભાગ છે.

મુંબઈ પોલીસના સાયબર અવેરનેસ કાર્યક્રમમાં મેગેઝિનનું પણ વિમોચન થયું હતું.

અક્ષય કુમારે સીએમ દેવેન્દ્ર ફડણવીસને કહ્યું હતું કે, ‘આપણા મહારાષ્ટ્ર રાજ્યમાં સાતમા, આઠમા, નવમા અને દસમા ધોરણના બાળકો માટે દર અઠવાડિયે એક ‘સાયબર પિરિયડ’ હોવો જોઈએ, જેમાં તેમને આ વિશે સમજાવવામાં આવે.’

અક્ષય અને ટ્વિંકલને બે બાળકો છે, એક દીકરો અને એક દીકરી.

અક્ષય કુમારની દીકરી લગભગ 13 વર્ષની છે. એક્ટર ઘણીવાર પોતાની દીકરીને મીડિયાની નજરથી સુરક્ષિત રાખે છે. જોકે, તે ક્યારેક-ક્યારેક સોશિયલ મીડિયા પર દીકરી સાથે ફોટો પણ શેર કરે છે, પરંતુ મોટાભાગની તસવીરોમાં દીકરીનો ચહેરો છુપાયેલો હોય છે.

દિવ્ય ભાસ્કરને Google પર મનપસંદ સોર્સ બનાવો