લોકશાહીના પર્વ સમાન મતદાનના આડે જ્યારે હવે માત્ર ગણતરીની કલાકો જ બાકી છે, ત્યારે રાજકોટના રાજકારણમાં મોટા સમાચાર સામે આવ્યા છે. શહેરના વોર્ડ નંબર 5 માં ભાજપે મતદાનની આગલી રાત્રે જબરદસ્ત ખેલ પાડીને પૂર્વ કોર્પોરેટરના પતિ અને કદાવર આગેવાન કવાભાઈ ગોલતરની નારાજગી દૂર કરી દીધી છે. ભાજપ દ્વારા તેમનું સસ્પેન્શન રદ કરવામાં આવતા તેઓ ફરી કેસરિયો ધારણ કરી પક્ષમાં સક્રિય થયા છે.

ધારાસભ્ય ઉદય કાનગડ અને ઉમેદવારોનું સંયુક્ત ઓપરેશન

નોંધનીય છે કે, અગાઉ ભ્રષ્ટાચારના આક્ષેપોને પગલે ભાજપે કવાભાઈ ગોલતરને પક્ષમાંથી સસ્પેન્ડ કર્યા હતા, જેના કારણે તેઓ અને તેમનું સમર્થક જૂથ નારાજ હતું. જોકે, ચૂંટણી જીતવા માટે આ નારાજગી દૂર કરવી અનિવાર્ય હોવાથી ધારાસભ્ય ઉદય કાનગડ, વોર્ડ નંબર 5 ના ઉમેદવારો સંજય ચાવડા અને દિલીપ લુણાગરીયાએ સંયુક્ત ‘ઓપરેશન’ હાથ ધર્યું હતું. લાંબી સમજાવટ અને બેઠકો બાદ કવાભાઈની તમામ ફરિયાદોનો અંત આવ્યો છે.

ભાજપને થશે મોટો ફાયદો

કવા ગોલતરના પુનરાગમનથી વોર્ડ નંબર 5 માં ભાજપની સ્થિતિ મજબૂત બની છે. કવાભાઈએ પક્ષમાં જોડાતાની સાથે જ જંગી મતદાન કરી ભાજપના ઉમેદવારોને વિજયી બનાવવા માટે જાહેર અપીલ પણ કરી છે. ખાસ કરીને ઓબીસી અને સ્થાનિક મતદારો પર તેમનું સારું પ્રભુત્વ હોવાથી વિપક્ષો માટે હવે અહીં મુશ્કેલી ઉભી થઈ શકે છે. મતદાનના એક્ઝેટ પહેલા ભાજપે આ ‘ડેમેજ કંટ્રોલ’ કરીને રાજકીય પંડિતોને પણ ચોંકાવી દીધા છે.