અમેરિકી રાષ્ટ્રપતિ ડોનાલ્ડ ટ્રમ્પ અને રશિયન મીડિયાની તીખી ટિપ્પણીઓએ ઇટાલીના રાજકારણને નવો વળાંક આપ્યો છે. આ હુમલાઓ વડાપ્રધાન જ્યોર્જિયા મેલોની માટે નુકસાનકારક બનવાને બદલે તેમની ઢાલ બની ગયા છે. જનતામાં એવો સંદેશ ગયો છે કે તેમની સરકાર વિદેશી દબાણ સામે ઝૂકતી નથી. આ નિવેદનો પછી મેલોનીની લોકપ્રિયતાનો ગ્રાફ ફરીથી ઉપર ચઢી રહ્યો છે, જેણે તેમના કટ્ટર વિરોધીઓને પણ રાષ્ટ્રીય સાર્વભૌમત્વના મુદ્દે સરકારના સમર્થનમાં ઊભા કરી દીધા છે.

ટ્રમ્પ સાથેનો ટકરાવ આ બદલાવની શરૂઆત બન્યો. ટ્રમ્પે તાજેતરમાં પોપ પર કરેલી પોતાની ટિપ્પણીનો વિરોધ કરવા બદલ મેલોનીના નિવેદનોને ‘અસ્વીકાર્ય’ ગણાવ્યા. તેમણે ત્યાં સુધી કહ્યું કે ઈરાન પાસે પરમાણુ હથિયાર છે અને તક મળ્યે તે બે મિનિટમાં ઇટાલીને ઉડાવી દેશે. તેના જવાબમાં મેલોનીએ કહ્યું કે તેમની સરકાર કોઈ બાહ્ય દબાણમાં કામ કરતી નથી, ન કોઈ માલિક છે અને ન કોઈ આદેશ આપનાર.

બીજી તરફ, રશિયન ટીવી વિશ્લેષક વ્લાદિમીર સોલોવ્યોવે અપમાનજનક ટિપ્પણી કરતા મેલોનીને યુક્રેન સમર્થક અને ટ્રમ્પથી અંતરને વિશ્વાસઘાત ગણાવ્યું. નિવેદન બાદ ઇટાલી સરકારે રશિયન રાજદૂતને બોલાવીને વિરોધ નોંધાવ્યો. ખાસ વાત એ રહી કે રાજકીય મતભેદ હોવા છતાં રાષ્ટ્રપતિ સર્જિયો મત્તારેલા અને વિપક્ષી નેતા એલી શ્લાઇન પણ સરકારના સમર્થનમાં સામે આવ્યા. તેનાથી ઘરેલું રાજકારણમાં એકતાનો સંદેશ ગયો.

આ ઘટનાઓ વચ્ચે મેલોનીએ પોતાના નિર્ણયોથી એ સંકેત આપવાનો પ્રયાસ કર્યો કે તેમની સરકાર સ્વતંત્ર નીતિ પર ચાલી રહી છે. તેમણે ઇઝરાયલ સાથેના સંરક્ષણ કરારના સ્વતઃ નવીકરણને રોકવાનો નિર્ણય કર્યો અને સ્પષ્ટ કહ્યું કે જ્યાં મતભેદ હશે, ત્યાં તે મુજબ પગલાં લેવામાં આવશે. આ વલણ ઘરેલું સ્તરે અસરકારક રહ્યું. પહેલા જ્યાં ટ્રમ્પ સાથેની નિકટતાને લઈને તેમની ટીકા થઈ રહી હતી, ત્યાં હવે એવી ધારણા બની કે તેઓ દબાણમાં ઝૂકતા નથી. જનમત સર્વેક્ષણોમાં ઘટાડા પછી તેમની લોકપ્રિયતા ફરીથી જૂના સ્તરની નજીક પહોંચતી દેખાઈ રહી છે.

માઇકલ જેક્સનના ગીતો સમજીને અંગ્રેજી ભાષા શીખી હતી

મેલોનીના બાળપણ સાથે જોડાયેલા ઘણા કિસ્સાઓ છે. 1992માં ઇટાલીમાં માફિયા દ્વારા જજ બોરસેલિનોની હત્યાએ 15 વર્ષની મેલોનીને હચમચાવી દીધી હતી. તે જ ગુસ્સામાં તે સીધા જમણેરી પક્ષ યુથ ફ્રન્ટની ઓફિસે પહોંચ્યા અને રાજકારણમાં જોડાયા. એટલું જ નહીં, માઇકલ જેક્સનના ગીતો સમજીને અંગ્રેજી ભાષા શીખી. તણાવના સમયે દીકરી સાથે ડાન્સ કરવો અને 27 વર્ષથી એક જ ફોન નંબર રાખવો તેમને જમીન સાથે જોડી રાખે છે.

દિવ્ય ભાસ્કરને Google પર મનપસંદ સોર્સ બનાવો