સ્થાનિક સ્વરાજ્યની ચૂંટણીના મંગળવારે જાહેર થયેલા પરિણામો બાદ મોરબી જિલ્લા પંચાયતની 24 બેઠકોમાંથી 17 બેઠકો પર ભાજપે વિજય મેળવ્યો છે. જયારે કોંગ્રેસને ત્રણ બેઠકોના નુકશાન સાથે માત્ર 7 બેઠકો પર જીત મેળવી સંતોષ માનવો પડયો છે.બીજી તરફ ભાજપ માટે સિંહ આલા પણ ગઢ ગેલા જેવી સ્થિતિ ચૂંટણી પરિણામો બાદ નિર્માણ થઇ છે.રોટેશન મુજબ આ વખતે મોરબી જિલ્લા પંચાયતનું પ્રમુખપદ એસટી એટલે કે, શેડયુલ ટ્રાઈબલ સભ્ય માટે અનામત છે ત્યારે જિલ્લાની નેકનામ એસટી બેઠક પરથી કોંગ્રેસના ઉમેદવાર વિજેતા થયા હોય ભાજપ મૂંઝવણમાં મુકાયું છે.

કોંગ્રેસ બેઠકો જાળવી રાખવામાં સફળ થઈ

મોરબી જિલ્લા પંચાયતના પરિણામોનું વિશ્લેષણ જોઈએ તો વાંકાનેર તાલુકાની તિથવા બેઠક પર કોંગ્રેસના મહેબુબભાઈ આહમદભાઈ કડીવાર 9999 મતો સાથે સૌથી વધુ મતો મેળવી વિજેતા ઉમેદવાર બન્યા છે.જયારે બગથળા, લુણસર, મહિકા અને પંચાસીયા જેવી બેઠકો પર કોંગ્રેસે જીત મેળવીને પોતાની પરંપરાગત બેઠકો જાળવવામાં સફળ રહી છે.ભાજપે આમરણ, ચરાડવા, જેતપર અને ખાનપર જેવી મહત્વની બેઠકો પર વિજય મેળવીને પોતાનું વર્ચસ્વ સાબિત કર્યું છે.આ ચૂંટણીમાં મહિલા અનામત બેઠકો પર પણ ભાજપનો દેખાવ નોંધપાત્ર રહ્યો છે.

નેકનામ સીટ પ્રમુખ નક્કી કરશે

ચૂંટણી પરિણામો બાદ સૌથી અગત્યની અને ભાજપ માટે ચિંતાજનક બાબત એ છે કે, જિલ્લા પંચાયતમાં પ્રમુખ પદ માટે પ્રથમ અઢી વર્ષે એસટી અનામત રાખવામાં આવ્યું છે. સમગ્ર જિલ્લામાં એક માત્ર નેકનામ સીટ એસટી અનામત હતી અને ત્યાં ભાજપ અને કોંગ્રેસ બંને પક્ષોએ પોતાના શેડયુલ ટ્રાઈબ ઉમેદવારો મેદાનમાં ઉતાયાં હતા.જો કે, નેકનામ બેઠક પર કોંગ્રેસના ઉમેદવાર ગીતાબેન રમેશભાઈ દુબરીયાનો વિજય થયો છે,જ્યારે ભાજપના ઉમેદવારની હાર થઈ છે. રોટેશન મુજબ આ સીટ પરથી જીતનાર ઉમેદવાર જ અઢી વર્ષ માટે પ્રમુખ બની શકે તેમ હોવાથી, ગીતાબેન દુબરીયા માટે પ્રમુખ બનવાના ઉજળા સંજોગો છે.જો કે,રાજનીતિમાં હવે ભાજપ કેવો રૂખ અપનાવે છે તે જોવું રહ્યું.

આ પણ વાંચોઃ Gujarat local body election result 2026: સરકારના 8 મંત્રીઓ ઘર આંગણે ભાજપને જીતાડી ન શક્યા