પ્રચારના વ્યસ્ત શિડ્યુલ વચ્ચે પીએમ મોદીએ આ વિસ્તારની મુલાકાત લીધી હતી, જેણે સ્થાનિક મતદારોમાં એક અલગ જ ઉત્સાહ જગાડ્યો હતો.

ઝાલમુરી સ્ટોલનો જાદુ

ચૂંટણી પ્રચાર દરમિયાન એક રસપ્રદ દ્રશ્ય જોવા મળ્યું હતું જ્યારે પીએમ મોદીનો કાફલો ઝારગ્રામમાં એક નાની દુકાન પાસે અચાનક રોકાયો હતો. પ્રધાનમંત્રી પોતે કારમાંથી નીચે ઉતરીને એક ઝાલમુરી સ્ટોલ પર ગયા હતા, જેને જોઈને ત્યાં હાજર લોકો આશ્ચર્યચકિત થઈ ગયા હતા. પીએમ મોદીએ સામાન્ય નાગરિકની જેમ ત્યાં ઝાલમુરીનો આનંદ માણ્યો અને આ ક્ષણની તસવીરો તથા વીડિયો સોશિયલ મીડિયા પ્લેટફોર્મ ‘X’ પર શેર કર્યા હતા. તેમણે પોતાની પોસ્ટમાં લખ્યું હતું કે, રવિવારની વ્યસ્ત સભાઓ વચ્ચે ઝારગ્રામની આ મસાલેદાર ઝાલમુરીનો સ્વાદ ખરેખર યાદગાર રહ્યો.

પશ્ચિમ બંગાળની સંસ્કૃતિ છે ઝાલમુરી

ઝાલમુરી માત્ર એક વાનગી નથી, પરંતુ પશ્ચિમ બંગાળની સંસ્કૃતિ અને જીવનશૈલીનો એક અભિન્ન હિસ્સો છે. તે મમરા (પફ્ડ રાઇસ), મસાલા, ડુંગળી, લીલા મરચાં અને ખાસ કરીને કાચા સરસવના તેલના મિશ્રણથી તૈયાર કરવામાં આવે છે. સરસવના તેલની તીખી સુગંધ અને મસાલાનો ચટપટો સ્વાદ તેને અન્ય સ્ટ્રીટ ફૂડથી અલગ પાડે છે. ‘ઝાલ’ એટલે મસાલેદાર અને ‘મુરી’ એટલે મમરા – આ મેળવણ બંગાળના ખૂણેખૂણે લોકપ્રિય છે અને તે ખૂબ જ સસ્તું અને પૌષ્ટિક ગણાય છે.

મતદારો સાથે ભાવનાત્મક જોડાણ

રાજકીય વિશ્લેષકો માને છે કે પીએમ મોદી દ્વારા સામાન્ય જનતાની વચ્ચે જઈને સ્થાનિક ખોરાકનો આનંદ લેવાની આ શૈલીએ મતદારો સાથે ભાવનાત્મક જોડાણ સ્થાપિત કર્યું છે. ઝારગ્રામ જેવી બેઠક પર ભાજપનું આગળ હોવું એ કદાચ આ જ જનસંપર્કનું પરિણામ હોઈ શકે છે. એક તરફ ભવાનીપુર જેવી હાઈ-પ્રોફાઈલ બેઠકો પર નજર છે, તો બીજી તરફ ઝાલમુરીના સ્વાદ સાથે જોડાયેલી ઝારગ્રામ બેઠક આ ચૂંટણીમાં ભાજપ માટે આશાનું કિરણ બનીને ઉભરી છે.

આ પણ વાંચો: West Bengal Election Result 2026: બીજેપીની સરકાર બની રહી છે…ભવાનીપુરથી શુભેન્દુ અધિકારીનો જીતનો વિશ્વાસ