સોશિયલ મીડિયા જાયન્ટ મેટાએ ઇન્સ્ટાગ્રામ વપરાશકર્તાઓ માટે એક અત્યંત મહત્વપૂર્ણ અને ચિંતાજનક ફેરફારની જાહેરાત કરી છે. 8 મે, 2026 થી ઇન્સ્ટાગ્રામ મેસેજિંગમાં મળતી ‘એન્ડ-ટુ-એન્ડ એન્ક્રિપ્શન’ (E2EE) સુવિધા સત્તાવાર રીતે બંધ કરી દેવામાં આવી છે. આ ફેરફારને કારણે કરોડો વપરાશકર્તાઓની ખાનગી વાતચીત હવે પહેલા જેવી સુરક્ષિત રહેશે નહીં અને હેકર્સ દ્વારા ડેટા એક્સેસ થવાનું જોખમ વધી ગયું છે.

શું છે આ ફેરફાર?

વર્ષ 2023 માં ઇન્સ્ટાગ્રામે વપરાશકર્તાઓની સુરક્ષા વધારવા માટે એન્ડ-ટુ-એન્ડ એન્ક્રિપ્શન લાગુ કર્યું હતું, જેનો અર્થ હતો કે મોકલનાર અને મેળવનાર સિવાય અન્ય કોઈ (મેટા પોતે પણ નહીં) સંદેશા વાંચી શકતું નહોતું. જોકે, નવા નિયમો મુજબ હવે આ સુરક્ષા કવચ હટાવી લેવામાં આવ્યું છે. મેટાએ માર્ચ મહિનામાં જ આ અંગેની સૂચના આપી દીધી હતી કે જે લોકોની ચેટ્સ આ ફેરફારથી પ્રભાવિત થાય છે, તેઓએ પોતાનો ડેટા કે સંવેદનશીલ સંદેશાઓ ડાઉનલોડ કરી લેવા જોઈએ.

મેટાએ આ નિર્ણય કેમ લીધો?

આ આકરા નિર્ણય પાછળનું મુખ્ય કારણ ‘ચાઇલ્ડ સેફ્ટી’ એટલે કે બાળકોની સુરક્ષા હોવાનું માનવામાં આવે છે. તાજેતરમાં ન્યૂ મેક્સિકોમાં એક જ્યુરીએ મેટાને $375 મિલિયનનો દંડ ફટકાર્યો હતો. એન્ડ-ટુ-એન્ડ એન્ક્રિપ્શનને કારણે કંપની વાંધાજનક સામગ્રી કે ઓનલાઇન છેતરપિંડી રોકવા માટે સંદેશાઓ સ્કેન કરી શકતી નહોતી. હવે આ ટેકનિકલ અવરોધ હટતા, કંપની અપમાનજનક સામગ્રીને ફ્લેગ કરવા કે ગુનાહિત પ્રવૃત્તિઓ રોકવા માટે જરૂર પડ્યે મેસેજ સ્કેન કરી શકશે.

વપરાશકર્તાઓ પર અસર

આ ફેરફારથી સામાન્ય વપરાશકર્તાઓની પ્રાઇવસીમાં ગાબડું પડ્યું છે. હવે ટેકનિકલ જ્ઞાન ધરાવતા લોકો કે હેકર્સ માટે ખાનગી ચેટ્સ સુધી પહોંચવું સરળ બની શકે છે. નોંધનીય છે કે મેટાએ હજુ સ્પષ્ટ કર્યું નથી કે તેઓ પોતાની અન્ય એપ્સ જેમ કે વૉટ્સએપ કે ફેસબુક મેસેન્જરમાં પણ આ જ ફેરફાર કરશે કે કેમ. ઇન્સ્ટાગ્રામ પર હવે ખાનગી કે નાણાકીય માહિતીની આપ-લે કરવી જોખમી બની શકે છે.

આ પણ વાંચોઃ Apple : ન કોઇ બટન કે ન કોઇ કટઆઉટ, એપલ લોન્ચ કરશે અત્યાર સુધીનો સૌથી પાવરફુલ આઇફોન