આજના સમયમાં આપણે કોઈપણ સવાલના જવાબ માટે આંખ મીંચીને ગૂગલ સર્ચ પર ભરોસો કરીએ છીએ. પરંતુ સાયબર સુરક્ષા નિષ્ણાતોએ ચેતવણી આપી છે કે આ આદત હવે તમને ભારે પડી શકે છે. ગૂગલ સર્ચ રિઝલ્ટમાં એક અત્યંત અદ્યતન માલવેર ઝુંબેશ સક્રિય થઈ છે, જેનો મુખ્ય ટાર્ગેટ સામાન્ય યુઝર્સના ડિવાઇસ હેક કરવાનો છે. ખાસ કરીને જે લોકો સોફ્ટવેર ડાઉનલોડ કરવા માટે ગૂગલ પર સર્ચ કરે છે, તેઓ હેકર્સના સોફ્ટ ટાર્ગેટ બની રહ્યા છે.

ક્લાઉડ (Claude) ની લોકપ્રિયતાનો દુરુપયોગ

એન્થ્રોપિકનું AI મોડલ ‘ક્લાઉડ’ હાલમાં વિશ્વભરમાં ખૂબ જ લોકપ્રિય છે. સ્કેમર્સ આ લોકપ્રિયતાનો ગેરલાભ ઉઠાવી રહ્યા છે. જ્યારે કોઈ યુઝર ગૂગલ પર “Claude download Mac” અથવા “Claude desktop app” જેવું કંઈક સર્ચ કરે છે, ત્યારે સર્ચ રિઝલ્ટમાં સૌથી ઉપર એક જાહેરાત (Ad) દેખાય છે. આ જાહેરાત દેખાવમાં એકદમ અસલી લાગે છે, પરંતુ તેમાં માલવેરની દૂષિત લિંક છુપાયેલી હોય છે. યુઝર જેવું તેના પર ક્લિક કરે છે, તેને એક નકલી વેબ પેજ પર રીડાયરેક્ટ કરવામાં આવે છે જ્યાંથી આપમેળે માલવેર સિસ્ટમમાં ઇન્સ્ટોલ થઈ જાય છે.

માલવેરની ખતરનાક કાર્યપદ્ધતિ

આ માલવેરની સૌથી ડરામણી વાત એ છે કે તે કમ્પ્યુટરની હાર્ડ ડિસ્કને બદલે તેની મેમરી (RAM) પર ચાલે છે. આ ટેકનિકને કારણે સામાન્ય એન્ટી-વાયરસ સોફ્ટવેર તેને પકડી શકતા નથી. એકવાર આ સોફ્ટવેર ઇન્સ્ટોલ થઈ ગયા પછી, હેકર્સ તમારા કમ્પ્યુટરની ખાનગી માહિતી, પાસવર્ડ અને સંવેદનશીલ ડેટાની ચોરી કરી શકે છે. આ માલવેર માત્ર કમ્પ્યુટર્સ જ નહીં, પરંતુ મોબાઇલ ડિવાઇસને પણ લક્ષ્ય બનાવી શકે છે.

તમારી જાતને કેવી રીતે સુરક્ષિત રાખશો?

સાયબર હુમલાખોરોથી બચવા માટે સતર્કતા એ જ શ્રેષ્ઠ ઉપાય છે. અહીં કેટલાક નિવારક પગલાં છે:

સત્તાવાર સ્ત્રોતોનો ઉપયોગ: કોઈપણ એપ્લિકેશન કે સોફ્ટવેર હંમેશા તેની અધિકૃત વેબસાઇટ અથવા એપ સ્ટોર (જેમ કે Apple App Store અથવા Google Play Store) પરથી જ ડાઉનલોડ કરો.

જાહેરાતો પર ક્લિક કરવાનું ટાળો: ગૂગલ સર્ચમાં જે લિંકની આગળ ‘Sponsored’ અથવા ‘Ad’ લખેલું હોય તેના પર ક્લિક કરવાનું ટાળો, ભલે તે સાચી દેખાતી હોય.

એડ બ્લોકરનો ઉપયોગ: બ્રાઉઝરમાં એડ બ્લોકર એક્સટેન્શનનો ઉપયોગ કરો, જે આવી નકલી અને જોખમી જાહેરાતોને ફિલ્ટર કરી નાખશે.

સોફ્ટવેર અપડેટ: તમારા ઓપરેટિંગ સિસ્ટમ અને બ્રાઉઝરને હંમેશા લેટેસ્ટ સિક્યુરિટી પેચ સાથે અપડેટ રાખો.

ઇન્ટરનેટ પર કામ કરતી વખતે હંમેશા યાદ રાખો કે ‘સર્ચ’ કરવું સુરક્ષિત છે, પરંતુ ‘ક્લિક’ કરતા પહેલા સાવચેતી રાખવી અનિવાર્ય છે.