આજના સમયમાં પેટ્રોલ, ડીઝલ અને સીએનજી (CNG) ના સતત વધતા ભાવે સામાન્ય નાગરિકોના ઘરનું બજેટ ખોરવી નાખ્યું છે. ખાસ કરીને દિલ્હી-એનસીઆર, મુંબઈ કે અમદાવાદ જેવા મોટા શહેરોમાં જ્યાં લોકોને દરરોજ લાંબા અંતરની મુસાફરી કરવી પડે છે, ત્યાં ડ્રાઇવિંગ ખૂબ જ મોંઘું સાબિત થઈ રહ્યું છે. આવી સ્થિતિમાં દરેક વ્યક્તિ ઇંધણની બચત કરવાના ઉપાયો શોધે છે. પરંતુ ખૂબ ઓછા લોકો જાણે છે કે આપણા સ્માર્ટફોનમાં રહેલી ગુગલ મેપ્સ (Google Maps) એપ દર મહિને હજારો રૂપિયાની બચત કરાવી શકે છે. મોટાભાગના લોકો તેનો ઉપયોગ માત્ર રસ્તો શોધવા માટે જ કરે છે, પરંતુ આ એપમાં એક એવું ખાસ ફીચર છે જે ઓછો ઇંધણ વપરાશ ધરાવતો રૂટ બતાવે છે.
જો આ ચોક્કસ સેટિંગ ચાલુ કરવામાં આવે, તો ગુગલ મેપ્સ તમને એવા રસ્તાઓ સૂચવે છે જ્યાં ટ્રાફિક ઓછો હોય, અંતર ટૂંકું હોય અને વાહન ઓછું ઇંધણ વાપરે. આ ફીચરની મદદથી પેટ્રોલ કે ડીઝલ પર 10 થી 20 ટકા સુધીની મોટી બચત થઈ શકે છે.
કેવી રીતે કામ કરે છે આ ખાસ ફીચર?
ગુગલ મેપ્સમાં આ સુવિધાનું નામ ‘ફ્યુઅલ એફિશિયન્ટ રૂટ્સ’ (Fuel-Efficient Routes) છે. સામાન્ય રીતે લોકો સૌથી ઝડપી અથવા ટૂંકો રસ્તો પસંદ કરતા હોય છે, પરંતુ ઘણીવાર તે રસ્તાઓ પર ભારે ટ્રાફિક જામ જોવા મળે છે. ટ્રાફિકમાં વારંવાર બ્રેક મારવાથી અને એન્જિન ચાલુ રાખવાથી વાહનનો ઇંધણ વપરાશ નોંધપાત્ર રીતે વધી જાય છે. આ ફીચર ખાસ કરીને ઓછો ટ્રાફિક અને સરળ ડ્રાઇવિંગ અનુભવ પ્રદાન કરતો રસ્તો શોધી કાઢે છે. આ સુવિધા તમારા વાહનના પ્રકાર અને એન્જિન પર આધાર રાખે છે, કારણ કે પેટ્રોલ, ડીઝલ, હાઇબ્રિડ કે સીએનજી વાહનોની ઇંધણ ક્ષમતા અલગ-અલગ હોય છે. જ્યારે તમે તમારી કારની વિગતો એપમાં સેટ કરો છો, ત્યારે ગુગલ મેપ્સ તે મુજબ જ સચોટ રૂટ બતાવે છે.
સેટિંગ ચાલુ કરવાની સરળ રીત:
સૌ પ્રથમ તમારા સ્માર્ટફોન પર ગુગલ મેપ્સ એપ ઓપન કરો.
ઉપર જમણી બાજુએ દેખાતા તમારા પ્રોફાઇલ આઇકોન અથવા જીમેલ (Gmail) ફોટો પર ટેપ કરો.
ત્યાંથી ‘સેટિંગ્સ’ (Settings) નો વિકલ્પ પસંદ કરો.
નીચે સ્ક્રોલ કરીને ‘નેવિગેશન સેટિંગ્સ’ (Navigation Settings) પર ક્લિક કરો.
હવે તમને “Prefer fuel-efficient routes” નો વિકલ્પ દેખાશે, તેને ઓન (On) કરી દો.
‘લીલું પાંદડું’ અને ઇંધણ બચતનો અંદાજ
આ સેટિંગ ઓન કર્યા પછી જ્યારે તમે કોઈ લોકેશન સર્ચ કરશો, ત્યારે કેટલાક રૂટની બાજુમાં તમને એક નાનું ‘લીલું પાંદડું’ (Green Leaf) જોવા મળશે. આ ચિહ્ન દર્શાવે છે કે આ રસ્તો પકડવાથી ઇંધણની મહત્તમ બચત થશે. ગુગલના જણાવ્યા અનુસાર, આ ફીચર ડ્રાઇવિંગ અને ટ્રાફિકની સ્થિતિના આધારે 10 થી 20 ટકા સુધી પેટ્રોલ-ડીઝલ બચાવી શકે છે, જે લાંબા ગાળે મોટો આર્થિક ફાયદો કરાવે છે. આજનું ગુગલ મેપ્સ માત્ર રસ્તો જ નથી બતાવતું, પરંતુ ટોલ ટેક્સની માહિતી, નજીકના પેટ્રોલ પંપ અને ટ્રાફિક-મુક્ત નેવિગેશન આપીને આપણી મુસાફરીને સ્માર્ટ અને સસ્તી બનાવે છે.
આ પણ વાંચોઃ IMD Weather: ખેડૂતો માટે ચિંતાના સમાચાર,આ વર્ષે દેશમાં સામાન્ય કરતાં ઓછો વરસાદ પડશે, IMDની મોટી આગાહી!
