22 વર્ષીય વેબ ડેવલપર હિમાંશુ જાંગડાને ગુરુગ્રામ સ્થિત કંપની સ્ટારવિક ડિઝાઇનમાંથી નોકરીમાંથી કાઢી મૂકવામાં આવ્યો. આ કાર્યવાહી એક વાઇરલ વીડિયોમાં મહિલાઓ વિશે તેની ટિપ્પણી પર થયેલા વિરોધ બાદ કરવામાં આવી હતી. આ વિવાદ સ્ટેન્ડ-અપ કોમેડિયન પ્રણિત મોરેના ગુરુગ્રામમાં લાઇવ ક્રાઉડ-વર્ક કોમેડી શો દરમિયાન શરૂ થયો હતો. શોમાં વાતચીત દરમિયાન જાંગડાએ એક ડેટિંગ અનુભવનો ઉલ્લેખ કરતા કહ્યું કે તેણે એક મહિલા પર લગભગ ₹360–₹370ની ચિકન બિરયાનીનો ખર્ચ કર્યો હતો. તેણે એમ પણ કહ્યું કે જ્યારે મહિલાએ તેને ઘરે છોડવા કહ્યું, ત્યારે તેને તેના ખર્ચની ભરપાઈ તરીકે શારીરિક સંબંધની અપેક્ષા હતી. આ ટિપ્પણી પર પ્રણિત મોરેએ શરૂઆતમાં હસતા તેને પીક ગુરુગ્રામ કન્ટેન્ટ ગણાવ્યું અને તેને મજાકિયા હોવા બદલ ઇનામ રાશિ પણ આપી. કાર્યક્રમનો વીડિયો બાદમાં સોશિયલ મીડિયા પર વાઇરલ થયો હતો. સોશિયલ મીડિયા પર વિરોધ બાદ પ્રાણિતે માફી માંગી ઇન્સ્ટાગ્રામ અને X સહિતના ઘણા પ્લેટફોર્મ પર લોકોએ જાંગડાની કોમેન્ટની ટીકા કરી. વિરોધ વધ્યા બાદ પ્રણિત મોરેએ જાહેરમાં માફી માંગી. ઇન્સ્ટાગ્રામ સ્ટોરીમાં મોરેએ લખ્યું હતું કે તાજેતરમાં વાઇરલ થયેલી ક્લિપને લઈને મળેલી ટીકાઓને હું સ્વીકારું છું. દર્શકની કોમેન્ટ્સ મારા વિચારો નથી. મારે તે સમયે વધુ સારો જવાબ આપવો જોઈતો હતો. અમે વીડિયો હટાવી દીધો છે. હું માફી માંગુ છું અને ભવિષ્યમાં આવા મામલાઓને વધુ જવાબદારી અને સંવેદનશીલતા સાથે સંભાળીશ. હિમાંશુ જાંગડાને નોકરીમાંથી કાઢી મૂકવામાં આવ્યા સ્ટારવિક ડિઝાઇને આ મામલે જાંગડા પર કાર્યવાહી કરતા તેમને નોકરીમાંથી કાઢી મૂક્યા. કંપનીના સ્થાપક વિવેક વિશ્વકર્માએ એક વીડિયો નિવેદન જારી કરીને કહ્યું, “છેલ્લા 24 કલાકમાં મને અમારા એક કર્મચારી હિમાંશુ જાંગડાને લઈને સેંકડો મેસેજ, ઈમેલ અને ફોન કોલ આવ્યા છે. તમારા બધાની જેમ મેં પણ સોશિયલ મીડિયા પર વાઇરલ થઈ રહેલી વીડિયો ક્લિપ્સ જોઈ છે. હું સ્પષ્ટપણે કહેવા માંગુ છું કે તે વીડિયોમાં દર્શાવવામાં આવેલી વાતો વાંધાજનક છે. હું તે વાતો સાથે સહમત નથી. અમારી કંપની પણ આવા વિચારોને સમર્થન આપતી નથી અને અમે નથી ઈચ્છતા કે આવી વાતો યુવાનોને પ્રભાવિત કરે.” ઓફિસમાં હિમાંશુ વિરુદ્ધ કોઈ ફરિયાદ મળી નથી વિવેક વિશ્વકર્માએ જણાવ્યું, “અમે અમારી ટીમ, ખાસ કરીને મહિલા કર્મચારીઓ સાથે પણ વાત કરી. ઓફિસમાં હિમાંશુના વર્તનનું રિવ્યુ કર્યું અને ઘણા જરૂરી પ્રશ્નો પૂછ્યા, પરંતુ રસપ્રદ વાત એ રહી કે અમને તેની વિરુદ્ધ કોઈ ફરિયાદ મળી નથી. ટીમના લોકોએ તેને પ્રોફેશનલ, સન્માનજનક, મહેનતુ અને સારા વર્તનવાળો કર્મચારી ગણાવ્યો.” તેણે આગળ કહ્યું, “પરંતુ વર્કપ્લેસની બહાર બનેલી આ ઘટનાની અસર હવે વર્કપ્લેસ પર પણ પડી રહી છે. કંપની, કર્મચારીઓ, ગ્રાહકો અને અહીંના વાતાવરણ પ્રત્યે મારી જવાબદારી છે. તેથી અમે હિમાંશુથી અલગ થવાનો નિર્ણય કર્યો છે.” વિવેક વિશ્વકર્માએ એમ પણ કહ્યું કે ભૂલોના પરિણામો હોય છે, પરંતુ સમય જતાં યુવા ડેવલપર્સને શીખવા, પોતાને સમજવા અને આગળ વધવાની તક આપવી જોઈએ.