આજના ટેકનોલોજીના યુગમાં આર્ટિફિશિયલ ઇન્ટેલિજન્સ (AI)નો ઉપયોગ ગર્લફ્રેન્ડ કે બોયફ્રેન્ડ તરીકે કરવાની ચર્ચાએ જોર પકડ્યું છે. જોકે, આ બાબતે એપલે એક અત્યંત મહત્વપૂર્ણ અને સ્પષ્ટ વલણ અપનાવ્યું છે. તાજેતરમાં સંપન્ન થયેલી એપલની વાર્ષિક ડેવલપર કોન્ફરન્સ (WWDC 2026) બાદ, કંપનીએ સ્પષ્ટ કર્યું છે કે તેનો પ્રખ્યાત વોઇસ આસિસ્ટન્ટ ‘સિરી’ રોમેન્ટિક પાર્ટનર તરીકે કામ કરશે નહીં.

ચીફ ક્રેગ ફેડેરીઘીએ આ વિચારને સંપૂર્ણપણે ફગાવ્યો

કંપનીના સોફ્ટવેર ચીફ ક્રેગ ફેડેરીઘીએ આ વિચારને સંપૂર્ણપણે ફગાવી દીધો છે. જ્યારે તેમને પૂછવામાં આવ્યું કે શું સિરીનો ઉપયોગ AI ગર્લફ્રેન્ડ કે બોયફ્રેન્ડ તરીકે થઈ શકે છે, ત્યારે તેમણે જણાવ્યું હતું કે એપલનો અભિગમ અન્ય AI ચેટબોટ્સ કરતા સાવ અલગ છે. ઘણા AI પ્લેટફોર્મ્સ વપરાશકર્તાઓને ભાવનાત્મક જોડાણ બનાવવા અને અંગત વાતો શેર કરવા માટે પ્રોત્સાહિત કરે છે, પરંતુ એપલનું લક્ષ્ય આનાથી સાવ વિપરીત છે. એપલ સિરીને એક અત્યાધુનિક ‘પર્સનલ આસિસ્ટન્ટ’ તરીકે જોવા માંગે છે જે વપરાશકર્તાઓને વ્યવહારુ મદદ અને સચોટ માહિતી પૂરી પાડે.

નવી સિરીને સંબંધો કે પ્રેમ માટે તૈયાર નથી કરાઇ

ફેડેરીઘીએ સ્પષ્ટ શબ્દોમાં કહ્યું કે નવી સિરીને રોમેન્ટિક ક્રિયા પ્રતિક્રિયાઓ કે સંબંધો બનાવવા માટે તૈયાર કરવામાં આવી નથી. તે માત્ર વપરાશકર્તાઓની દૈનિક જરૂરિયાતોમાં સહાયક બનવા માટે મર્યાદિત છે. આ ઉપરાંત, એપલના માર્કેટિંગ ચીફ ગ્રેગ જોસ્વિયાકે ભાર મૂક્યો હતો કે કંપની AI નો ઉપયોગ માત્ર દેખાડા માટે નહીં, પરંતુ પોતાના ઉત્પાદનો અને ફીચર્સની કાર્યક્ષમતા વધારવા માટે કરી રહી છે.

દરેકનો ડેટા સુરક્ષિત રહે તેના પર મૂકાયો ભાર

આ નવી વ્યૂહરચનાનો એક મુખ્ય ભાગ ‘ગોપનીયતા’ (Privacy) છે. એપલનું માનવું છે કે AI ના ઉપયોગ દરમિયાન વપરાશકર્તાનો ડેટા સુરક્ષિત રહેવો જોઈએ. ફેડેરીઘીએ સમજાવ્યું કે મોટાભાગની AI પ્રક્રિયાઓ ‘ઓન-ડિવાઇસ’ કરવામાં આવે છે, જેથી ડેટા ઉપકરણની બહાર ન જાય અને વપરાશકર્તાઓનું પોતાના ડેટા પર સંપૂર્ણ નિયંત્રણ રહે. સાથે જ, AI ના આ ઝડપી જમાનામાં બાળકોની સુરક્ષાને પણ કંપનીએ સર્વોચ્ચ પ્રાથમિકતા આપી છે.

આ પણ વાંચોઃ Petrol Diesel Price Today: શું પેટ્રોલ-ડીઝલના ભાવ ઘટ્યા? જાણો તમારા શહેરનો લેટેસ્ટ રેટ