વિમ્બલ્ડન ટેનિસ ટુર્નામેન્ટમાં 23 વખતની ગ્રાન્ડ સ્લેમ ચેમ્પિયન સેરેના વિલિયમ્સની સફર પહેલા જ રાઉન્ડમાં સમાપ્ત થઈ ગઈ છે. 44 વર્ષીય અમેરિકન દિગ્ગજ સેરેનાએ લગભગ ચાર વર્ષ (1,462 દિવસ) પછી ટુર્નામેન્ટમાં કમબેક કર્યું હતું. તેને ઓસ્ટ્રેલિયાની 20 વર્ષીય ખેલાડી માયા જોઈન્ટે 6-3, 6-7, 6-3થી હરાવી. ઉંમરથી 24 વર્ષ નાની ખેલાડી સામે હારી સેરેના મેચની શરૂઆતમાં સેરેના વિલિયમ્સ થોડી થાકેલી અને લયથી બહાર દેખાઈ. પહેલા સેટમાં ઓસ્ટ્રેલિયાની માયા જોઈન્ટે તેમની નબળાઈઓનો ફાયદો ઉઠાવ્યો અને આ સેટ સરળતાથી 6-3 થી પોતાના નામે કર્યો. બીજા સેટમાં સેરેનાએ શાનદાર કમબેક કર્યું. બે વાર બ્રેક પોઈન્ટ પર પાછળ રહ્યા પછી તેણે રમતને ટાઈ-બ્રેકર સુધી ખેંચી અને બીજો સેટ 7-6થી જીતી લીધો. જોકે, ત્રીજા સેટમાં શારીરિક થાક તેના પર હાવી થઈ ગયો અને માયાએ છેલ્લો સેટ 6-3થી જીતીને મેચ પોતાના નામે કરી લીધી. સેરેનાએ નિવેદનમાં કહ્યું- ‘વિમ્બલ્ડનમાં પરત આવવું ખરેખર ખૂબ સારું હતું. મને અહીં આવવાની અપેક્ષા નહોતી. વાતાવરણ અદ્ભુત હતું અને મેં આ ક્ષણનો પૂરો આનંદ લીધો.’ ઈજામાંથી સાજા થઈને દિમિત્રોવનું શાનદાર કમબેક, સીધા સેટમાં જીત નોંધાવી બલ્ગેરિયાના 35 વર્ષીય ખેલાડી ગ્રિગોર દિમિત્રોવે ઓસ્ટ્રેલિયાના ડેન સ્વીનીને સીધા સેટમાં 7-6, 6-3, 7-5થી હરાવ્યો. ગયા વર્ષે આ જ કોર્ટ પર વિશ્વના નંબર વન ખેલાડી જેનિક સિનર સામે બે સેટની લીડ બનાવ્યા પછી દિમિત્રોવ પેક્ટોરલ ઈજા (છાતીના સ્નાયુમાં ઈજા)ને કારણે મેચમાંથી ખસી ગયો હતો. તે રડતા રડતા કોર્ટની બહાર ગયો હતો. આ વખતે સંપૂર્ણપણે ફિટ થઈને પરત ફરેલા દિમિત્રોવ જીત પછી લાંબા સમય સુધી કોર્ટ પર ચાહકોને ઓટોગ્રાફ આપતા અને તસવીરો ખેંચાવતા જોવા મળ્યો. ડિફેન્ડિંગ ચેમ્પિયન ઇગા સ્વિયાતેક કોર્ટ પર જ રડી પડી, ત્રણ સેટના સંઘર્ષમાં જીતી વુમન્સ સિંગલ્સની ડિફેન્ડિંગ ચેમ્પિયન પોલેન્ડની ઇગા સ્વિયાતેકને પણ તેની પ્રથમ રાઉન્ડની મેચમાં ખૂબ પરસેવો પાડવો પડ્યો. ત્રીજી ક્રમાંકિત સ્વિયાતેકે અમેરિકાની ટેલર ટાઉનસેન્ડને 6-1, 2-6, 6-3થી હરાવી. પ્રથમ સેટ 6-1થી સરળતાથી જીત્યા પછી, તે બીજો સેટ હારી ગઈ. ત્રીજા સેટની પહેલી ગેમમાં, તેણે ત્રણ ડબલ ફોલ્ટ કર્યા હોવા છતાં ચાર બ્રેક પોઇન્ટ બચાવ્યા અને અંતે બે કલાકથી વધુ ચાલેલી મેચ જીતી લીધી. જીત પછી સ્વિયાતેક એટલી ભાવુક થઈ ગઈ કે તે કોર્ટ પર જ ટુવાલથી મોં છુપાવીને રડવા લાગી. 38 વર્ષમાં પહેલીવાર પહેલા રાઉન્ડમાં 15 ખેલાડીઓ હાર્યા યજમાન બ્રિટન માટે ટુર્નામેન્ટનો બીજો દિવસ અત્યંત નિરાશાજનક રહ્યો. વિમ્બલ્ડનના ઇતિહાસમાં 38 વર્ષ પછી આવું બન્યું છે. જ્યારે પહેલા જ રાઉન્ડમાં બ્રિટનના 15 ખેલાડીઓ હારીને બહાર થઈ ગયા છે. આ પહેલા 1988માં 16 બ્રિટિશ ખેલાડીઓ પહેલા રાઉન્ડમાં હાર્યા હતા. જોકે, કેટી સ્વાન, જેકબ ફર્નલી, આર્થર ફેરી અને જાન ચોઇન્સ્કીએ પોતપોતાની મેચ જીતીને બ્રિટનની આશાઓને જીવંત રાખી છે. કેટી સ્વાન રોમાનિયાની ઇરિના-કેમેલિયા બેગુને 6-4, 6-4થી હરાવી, જ્યારે ફર્નલીએ બે સેટ પાછળ રહ્યા પછી શાનદાર વાપસી કરીને મેચ જીતી.