ઇંગ્લેન્ડે વુમન્સ T20 વર્લ્ડ કપની ફાઈનલમાં પ્રવેશ કરી લીધો છે. ટીમે ગુરુવાર રાત્રે સેમિફાઈનલ મેચમાં સાઉથ આફ્રિકાને 40 રનથી હરાવ્યું. હવે રવિવારે લોર્ડ્સના મેદાન પર ટાઇટલ માટે ઇંગ્લેન્ડનો સામનો ઓસ્ટ્રેલિયા સામે થશે. ઓવલ મેદાન પર ઇંગ્લેન્ડે 23 રન પર 3 વિકેટ ગુમાવી દીધી હતી અને મુશ્કેલીમાં હતી. અહીંથી નેટ સાયવર-બ્રન્ટ અને હીથર નાઈટની જોડીએ ચોથી વિકેટ માટે 90 બોલમાં 133 રનની પાર્ટનરશિપ કરી. આ ભાગીદારીના દમ પર ટીમે 5 વિકેટે 169 રનનો સ્કોર બનાવ્યો. જવાબમાં સાઉથ આફ્રિકા 20 ઓવરમાં 8 વિકેટ ગુમાવીને 129 રન જ બનાવી શકી. કેપ્ટન બ્રન્ટ પ્લેયર ઑફ ધ મેચ રહી. ઇંગ્લેન્ડ પાવરપ્લેમાં 16 રન જ બનાવી શક્યું ટોસ હારીને બેટિંગ કરી રહેલી ઇંગ્લેન્ડની શરૂઆત ખરાબ રહી. ટીમ પાવરપ્લેમાં માત્ર 16 રન જ બનાવી શકી. એટલું જ નહીં, એક વિકેટ પણ ગુમાવી દીધી. આ વર્તમાન વર્લ્ડ કપમાં પાવરપ્લેમાં ઇંગ્લેન્ડનો સૌથી ઓછો સ્કોર છે. સાઉથ આફ્રિકાની ફાસ્ટ બોલર શબનીમ ઇસ્માઇલ અને મેરિઝાન કેપે સચોટ બોલિંગ કરી. કેપે પોતાની કસીને કરેલી બોલિંગથી 4 ઓવરમાં માત્ર 16 રન આપીને 1 વિકેટ લીધી. ઇસ્માઇલે 31 રન આપીને 2 વિકેટ ઝડપી. ઈજામાંથી કમબેક કરી રહેલી સીવર-બ્રન્ટે ફિફ્ટી ફટકારી કાફ ઇન્જરીને કારણે ગત ત્રણ મેચ ન રમી શકેલી નેટ સીવર-બ્રન્ટે આ મેચમાં સોફિયા ડંકલીની જગ્યા લીધી. તેણે આવતાની સાથે જ સાઉથ આફ્રિકન બોલરો પર કાઉન્ટર-એટેક શરૂ કરી દીધો. તેણે મેદાનની ચારેય બાજુ શોટ રમ્યા. સીવર-બ્રન્ટે પોતાની 47 બોલની ઇનિંગ્સમાં 11 ચોગ્ગા અને 1 છગ્ગો ફટકારીને 75 રન બનાવ્યા. રનિંગમાં તેની ઈજાની કોઈ અસર જોવા મળી ન હતી. બીજી બાજુથી હેથર નાઇટે તેને પૂરો સાથ આપ્યો. નાઇટે અયાબોંગા ખાકાની બોલ પર સિક્સ લગાવીને પોતાની અડધી સદી પૂરી કરી. નાઇટે 47 બોલમાં 58 રનની ઇનિંગ રમી. જોકે, મ્લાબાએ બંનેને ત્રણ બોલની અંદર આઉટ કરી દીધા, પરંતુ ત્યાં સુધીમાં ઇંગ્લેન્ડ મજબૂત સ્કોર બનાવી ચૂક્યું હતું. સાઉથ આફ્રિકાને જીત માટે T20 વર્લ્ડ કપ ઇતિહાસનો બીજો સૌથી મોટો ચેઝ (170 રન) કરવાનો હતો. T20 વર્લ્ડ કપમાં 50 વિકેટ લેનારી પ્રથમ મહિલા ક્રિકેટર બની સાઉથ આફ્રિકાની શબનીમ ઇસ્માઈલે મેચના પહેલા જ બોલ પર ઇંગ્લેન્ડની ઓપનર એમી જોન્સને આઉટ કરીને ઇતિહાસ રચ્યો. તે વુમન્સ T20 વર્લ્ડ કપમાં 50 વિકેટ લેનારી દુનિયાની પ્રથમ મહિલા ખેલાડી બની ગઈ છે. ઇસ્માઈલે પોતાની બીજી ઓવરમાં એલિસ કેપ્સીને પણ LBW આઉટ કરીને ઇંગ્લેન્ડને ત્રીજી વિકેટ આપી. સાઉથ આફ્રિકાની ટીમ ફરી ચૂકી 170 રનના ટાર્ગેટને ચેઝ કરતા સાઉથ આફ્રિકાને કેપ્ટન લૌરા વોલ્વાર્ડ્ટ પાસેથી મોટી ઇનિંગ્સની અપેક્ષા હતી. તે સારી લયમાં દેખાઈ રહી હતી, પરંતુ છઠ્ઠી ઓવરમાં સોફી એક્લેસ્ટને મિડ-ઓન પર તેનો શાનદાર કેચ પકડીને ટીમને મોટો ઝટકો આપ્યો. આ પછી એક્લેસ્ટને શોર્ટ ફાઇન લેગ પર સુને લુસનો પણ મુશ્કેલ કેચ પકડ્યો. બ્રિટ્સની ફિફ્ટી કામ ન આવી તજમિન બ્રિટ્સે 44 બોલમાં અડધી સદી ફટકારીને સાઉથ આફ્રિકાની આશાઓ જીવંત રાખી, પરંતુ ચાર્લી ડીનની સ્પિન સામે મિડલ ઓર્ડર ટકી શક્યો નહીં. બ્રિટ્સ અને મેરિઝાને કાપ, બંને એક્સ્ટ્રા કવર પર નેટ સીવર-બ્રન્ટને કેચ આપી બેઠી. આ પછી સાઉથ આફ્રિકાની ટીમ કમબેક કરી શકી નહીં અને 20 ઓવરમાં 8 વિકેટે 129 રન જ બનાવી શકી.