સોશિયલ મીડિયા પર પાકિસ્તાની એક્ટ્રેસ ઇકરા અઝીઝના નામથી એક પોસ્ટ વાઇરલ છે. તેમાં દાવો કરવામાં આવી રહ્યો છે કે તેણે આલિયા ભટ્ટ અને શર્વરી અભિનીત ફિલ્મ આલ્ફા જોવા અપીલ કરી અને લખ્યું કે ‘આલ્ફા, ધુરંધરનો પાકિસ્તાન તરફથી જવાબ છે.’ સાથે જ YRFનો આભાર પણ માન્યો.

જોકે, તપાસમાં આ દાવો ખોટો નીકળ્યો.

શું છે વાઈરલ દાવો?

સોશિયલ મીડિયાના ઘણા પ્લેટફોર્મ્સ પર ઇકરા અઝીઝના નામ અને તસવીર સાથે પોસ્ટ શેર કરવામાં આવી રહી છે. દાવો છે કે તેણે લખ્યું, ‘આલ્ફા જરૂર જુઓ. આ ધુરંધરનો પાકિસ્તાન તરફથી જવાબ છે. આભાર YRF.’

આ જ પોસ્ટના આધારે ઘણા યુઝર્સ ઇકરા અઝીઝને ટ્રોલ કરી રહ્યા છે અને તેને સાચું માનીને શેર પણ કરી રહ્યા છે.

ફેક્ટ ચેકમાં શું સામે આવ્યું?

દિવ્ય ભાસ્કરની તપાસમાં આ દાવાની પુષ્ટિ થઈ નથી. ઇકરા અઝીઝના સત્તાવાર સોશિયલ મીડિયા એકાઉન્ટ્સ પર આલ્ફા કે YRFને લઈને આવી કોઈ પોસ્ટ મળી નથી.

YRF સાથે સંકળાયેલા સૂત્રોએ પણ આ પોસ્ટને નકલી ગણાવી છે. તેના મતે, તેને ટ્રોલિંગ અને ખોટી માહિતી ફેલાવવાના ઉદ્દેશ્યથી બનાવવામાં આવી છે. તેનો YRF કે ફિલ્મ આલ્ફાના પ્રમોશન સાથે કોઈ સંબંધ નથી.

એડિટેડ સ્ક્રીનશોટ હોવાની આશંકા

વાઈરલ તસવીરનું ફોર્મેટ એવું છે, જેને સરળતાથી એડિટ કરી શકાય છે. હાલમાં એવો કોઈ વિશ્વસનીય પુરાવો મળ્યો નથી કે આ પોસ્ટ ઇકરા અઝીઝના સત્તાવાર એકાઉન્ટમાંથી કરવામાં આવી હતી. તેથી તેને પ્રમાણિક માની શકાય નહીં.

નિષ્કર્ષ

દાવો: ઇકરા અઝીઝે ‘Alpha’ જોવાની અપીલ કરી અને તેને ‘ધુરંધરનો પાકિસ્તાન તરફથી જવાબ’ ગણાવીને YRFનો આભાર માન્યો.

સત્ય: તપાસમાં દાવો ખોટો નીકળ્યો. ઇકરા અઝીઝના સત્તાવાર સોશિયલ મીડિયા એકાઉન્ટ્સ પર આવી કોઈ પોસ્ટ મળી નથી. YRF સૂત્રોએ પણ પોસ્ટને નકલી ગણાવીને કહ્યું કે તેને ટ્રોલિંગ અને ખોટી માહિતી ફેલાવવાના ઉદ્દેશ્યથી વાયરલ કરવામાં આવી રહી છે.

YRFની સ્પાય થ્રિલર ‘આલ્ફા’ 3 જુલાઈ 2026ના રોજ રિલીઝ થઈ. આ સ્પાય યુનિવર્સની પહેલી ફીમેલ-લીડ ફિલ્મ છે, જેમાં બે મહિલા જાસૂસ મુખ્ય ભૂમિકામાં છે.

YRF સ્પાય યુનિવર્સમાં અગાઉ એક થા ટાઈગર, ટાઈગર ઝિંદા હૈ, વોર, પઠાણ અને ટાઈગર 3 જેવી ફિલ્મો આવી ચૂકી છે. ‘આલ્ફા’ આ ફ્રેન્ચાઈઝીની પ્રથમ ફીમેલ-લીડ ફિલ્મ છે. ‘આલ્ફા’ એક સ્પાય એક્શન થ્રિલર છે, જેમાં એક છોકરીને બાળપણથી જ ખતરનાક મિશનો માટે તૈયાર કરવામાં આવે છે અને આગળ જતાં તે દેશના જોખમી ઓપરેશન્સનો ભાગ બને છે.

ફિલ્મમાં આલિયા ભટ્ટ, શર્વરી, બોબી દેઓલ, અનિલ કપૂર અને આર. માધવન મુખ્ય ભૂમિકાઓમાં છે. કેટલાક સરપ્રાઈઝ કેમિયો પણ સામેલ છે. ફિલ્મનું નિર્દેશન શિવ રવૈલે કર્યું છે, જ્યારે નિર્માણ આદિત્ય ચોપરા અને YRF દ્વારા કરવામાં આવ્યું છે.

દિવ્ય ભાસ્કરને Google પર મનપસંદ સોર્સ બનાવો