મરાઠી સિનેમાની એક્ટ્રેસ અને ફિલ્મમેકર મહેશ માંજરેકરની પત્ની મેધા માંજરેકરે પોતાની કેન્સરની બીમારીનો ખુલાસો કર્યો છે. 58 વર્ષીય મેધાએ ઇન્સ્ટાગ્રામ પર એક લાંબી અને ભાવુક નોંધ શેર કરીને જણાવ્યું કે, તેની કેન્સરની સારવાર ચાલી રહી છે.

આ મુશ્કેલ સફર દરમિયાન તેના પતિ મહેશ માંજરેકર, પરિવાર અને મિત્રોએ તેનો પૂરો સાથ આપ્યો. મેધાએ હોસ્પિટલની કેટલીક તસવીરો શેર કરતા સારવાર દરમિયાન થયેલા શારીરિક અને માનસિક બદલાવો વિશે ખુલીને વાત કરી છે.

મેધા માંજરેકરની પોસ્ટ.

સારવાર દરમિયાન ભૂખ મરી ગઈ હતી મેધા માંજરેકરે જણાવ્યું કે, સારવારને કારણે એક સમય એવો આવ્યો, જ્યારે તેની ભૂખ સંપૂર્ણપણે મરી ગઈ હતી. આવા સમયે તેની બહેન, ભાભી અને મિત્રોએ તેનું પૂરું ધ્યાન રાખ્યું. તેઓ તેની પસંદનું ભોજન જેમ કે ઢોકળા, ઇડલી, ગુલપાપડી અને પાણી-પૂરી લઈને આવતા હતા.

મેધાએ હોસ્પિટલનો ફોટો શેર કર્યો.

મેધાએ લખ્યું કે એક મિત્રની સલાહ પર તેણે ક્રેનબેરી જ્યુસને શેમ્પેનના ગ્લાસમાં પીવાનું શરૂ કર્યું. પીરસવાની રીતમાં આ નાના ફેરફારે તેનો દૃષ્ટિકોણ બદલી નાખ્યો અને તેનામાં સકારાત્મકતા આવી. મિત્રોએ મુશ્કેલ દિવસોમાં તેને ક્યારેય એકલા રહેવા દીધા નહીં.

મહેશ માંજરેકરે મેધા સાથે 1995માં બીજા લગ્ન કર્યા હતા.

પતિ મહેશ માંજરેકર અને નજીકના લોકોને આભાર માન્યો પોતાની પોસ્ટમાં મેધાએ પતિ મહેશ માંજરેકર માટે લખ્યું કે, ‘બસ સાથે રહેવા બદલ આભાર, કેટલીક યાત્રાઓ એકલા પૂરી કરી શકાતી નથી.’ તેણે જણાવ્યું કે, તેની બીમારીની જાણ થયા પછી તેના નજીકના મિત્રો બીજા દેશમાંથી પણ તેને મળવા અને સમય વિતાવવા માટે ભારત આવ્યા.

તેની સાથે રહીને મિત્રોએ પ્રાર્થના કરી અને તેનું ધ્યાન બીમારીથી ભટકાવવામાં મદદ કરી. મેધાની આ પોસ્ટ પર સ્વપ્નિલ જોશી અને નીના કુલકર્ણી જેવી મરાઠી ફિલ્મ હસ્તીઓએ કોમેન્ટ કરીને તેનો ઉત્સાહ વધાર્યો છે અને તે જલ્દી સ્વસ્થ થાય તેવી પ્રાર્થના કરી છે.

મહેશ માંજરેકરે ‘વોન્ટેડ’, ‘વાસ્તવ’ સહિતની ફિલ્મોમાં મહત્ત્વની ભૂમિકા ભજવી છે.

2021માં મહેશ માંજરેકરને પણ કેન્સર થયું હતું માંજરેકર પરિવાર માટે કેન્સરની આ બીજી મોટી લડાઈ છે. આ પહેલા વર્ષ 2021માં ખુદ મહેશ માંજરેકરને હાઈ-ગ્રેડ યુરિનરી બ્લેડર કેન્સર થયું હતું. તે સમયે મુંબઈની એક હોસ્પિટલમાં તેની મોટી સર્જરી થઈ હતી, જેના પછી તે સંપૂર્ણપણે સ્વસ્થ થઈ ગયા હતા.

મહેશની સારવાર સમયે મેધાએ આખા પરિવારને ભાવનાત્મક રીતે સંભાળ્યો હતો અને મજબૂતી આપી હતી. હવે જ્યારે મેધા પોતે આ બીમારી સામે ઝઝૂમી રહી છે, ત્યારે મહેશ અને આખો પરિવાર તેની સાથે મજબૂતીથી ઊભો છે.

‘દબંગ 3’માં સલમાન સાથે મેધા અને મહેશની દીકરી સઈ માંજરેકર.

‘દબંગ 3’થી દીકરી સઈએ બોલિવૂડમાં ડેબ્યૂ કર્યું હતું મેધા અને મહેશ માંજરેકરના લગ્ન વર્ષ 1995માં થયા હતા. વર્ષ 2001માં તેમની દીકરી સઈ માંજરેકરનો જન્મ થયો. માતા-પિતાના પગલે ચાલતા સઈએ વર્ષ 2019માં સલમાન ખાનની ફિલ્મ ‘દબંગ 3’થી બોલિવૂડમાં ડેબ્યૂ કર્યું હતું.

આ ફિલ્મમાં મેધા માંજરેકરે પણ જાનકીનો રોલ કર્યો હતો. મેધા ‘નટસમ્રાટ’ (2016), ‘કાકસ્પર્શ’ (2012) અને ‘દે ધક્કા’ (2008) જેવી શાનદાર મરાઠી ફિલ્મો માટે જાણીતી છે. તે છેલ્લે મરાઠી ફિલ્મ ‘એક રાધા એક મીરા’ માં જોવા મળી હતી.

દિવ્ય ભાસ્કરને Google પર મનપસંદ સોર્સ બનાવો