ફ્રાન્સ અને સ્પેન 20 વર્ષ પછી ફિફા વર્લ્ડ કપમાં આમને-સામને થશે. બંને ટીમો વચ્ચે 2026 વર્લ્ડ કપની પ્રથમ સેમિફાઇનલ બુધવારે રાતે 12:30 વાગ્યે ડલાસ સ્ટેડિયમમાં રમાશે. વર્લ્ડ કપમાં આ પહેલા બંનેની છેલ્લી ટક્કર 2006માં થઈ હતી, જ્યારે ફ્રાન્સે રાઉન્ડ-16માં સ્પેનને 3-1થી હરાવ્યું હતું. એકંદરે, બંને ટીમો વચ્ચે અત્યાર સુધીમાં 38 મેચ રમાઈ છે, જેમાં સ્પેને 18 અને ફ્રાન્સે 13 મેચ જીતી છે, જ્યારે 7 મેચ ડ્રો રહી છે. ફ્રાન્સના કેપ્ટન કિલિયન એમ્બાપ્પે શાનદાર ફોર્મમાં છે. તે વર્તમાન વર્લ્ડ કપમાં સૌથી વધુ 8 ગોલ કરીને ગોલ્ડન બૂટની રેસમાં સૌથી આગળ છે. બીજી તરફ, સ્પેનની આશાઓ 19 વર્ષીય સ્ટાર લામિન યમાલ પર ટકેલી હશે. યમાલે આખી ટુર્નામેન્ટમાં ઘણી શ્રેષ્ઠ તકો ઊભી કરી છે, જોકે અત્યાર સુધી તેના નામે માત્ર એક ગોલ છે. બંને ટીમો છેલ્લી વાર 2025ની નેશન્સ લીગ સેમિફાઇનલમાં ટકરાઈ હતી, જ્યાં સ્પેને 5-4થી જીત મેળવી હતી. તે મેચમાં યમાલે બે ગોલ કર્યા હતા. ફ્રાન્સે તમામ મેચ જીતી ફ્રાન્સે આ ટુર્નામેન્ટમાં તેની તમામ 6 મેચ જીતી છે. ગ્રુપ સ્ટેજમાં ફ્રાન્સે સેનેગલને 3-1, ઇરાકને 3-0 અને નોર્વેને 4-1થી હરાવ્યું. ત્યારબાદ રાઉન્ડ ઓફ 32માં ટીમે સ્વીડન સામે 3-0થી જીત મેળવી. પછી રાઉન્ડ ઓફ 16માં પેરાગ્વેને 1-0થી અને ક્વાર્ટર ફાઇનલમાં મોરોક્કોને 2-0થી હરાવ્યું. જો ફ્રાન્સ જીતશે તો… જો ફ્રાન્સ આ મેચ જીતે છે, તો તે સતત ત્રીજી વખત વર્લ્ડ કપ ફાઇનલમાં પહોંચશે. આ પહેલા તેણે 2018નો વર્લ્ડ કપ જીત્યો હતો. 2022માં આર્જેન્ટિના સામે ફાઇનલમાં હાર મળી હતી. સ્પેન ટુર્નામેન્ટમાં અજેય સ્પેન ટુર્નામેન્ટમાં અત્યાર સુધી કોઈ મેચ હાર્યું નથી. ટીમે 6 મેચમાં 5 જીત અને એક ડ્રો રમ્યો. ગ્રુપ સ્ટેજમાં સ્પેને સાઉદી અરેબિયાને 4-0 અને ઉરુગ્વેને 1-0થી હરાવ્યું. કાબો વર્ડે સામેની મેચ 0-0થી ડ્રો રહી. રાઉન્ડ ઓફ 32માં ઓસ્ટ્રિયા સામે 3-0થી જીત્યું. પછી રાઉન્ડ ઓફ 16માં પોર્ટુગલને 1-0 અને ક્વાર્ટર ફાઇનલમાં બેલ્જિયમને 2-1થી હરાવ્યું. જો સ્પેન જીતશે તો… સ્પેન 2010માં ખિતાબ જીત્યા બાદ પહેલીવાર વર્લ્ડ કપ ફાઇનલ રમશે. તેમણે 2010માં નેધરલેન્ડને 1-0થી હરાવ્યું હતું. ફ્રાન્સનો એટેક Vs સ્પેનનો ડિફેન્સ ફ્રાન્સ પાસે એમ્બાપે અને ઉસ્માન ડેમ્બેલેની એટેકિંગ જોડી છે. એમ્બાપે ઉપરાંત ડેમ્બેલે ટુર્નામેન્ટમાં 5 ગોલ કરી ચૂક્યા છે. તેમની સામે સ્પેનનો ડિફેન્સ હશે, જેણે ટુર્નામેન્ટમાં માત્ર એક ગોલ ખાધો છે. સ્પેનના એટેકની જવાબદારી લામિન યમાલ અને મિકેલ મેરિનો સંભાળશે. મેરિનોએ ટીમ તરફથી સૌથી વધુ 2 ગોલ કર્યા છે. બંને ટીમોની સંભવિત સ્ટાર્ટિંગ-11: ફ્રાન્સ: માઈક મેગ્નન, જુલ્સ કૌંડે, ઉપામેકાનો, વિલિયમ સલીબા, થિયો હર્નાન્ડેઝ, ચુઆમેની, એડ્રિયન રેબિયો, ઉસ્માન ડેમ્બેલે, એન્ટોઈન ગ્રીઝમેન, બાર્કોલા, કિલિયન એમ્બાપ્પે. સ્પેન: ડેવિડ રાયા, ડેની કાર્વહાલ, રોબિન લે નોર્મેન્ડ, આયમેરિક લાપોર્ટ, માર્ક કુકુરેલા, રોડ્રી, ફેબિયન રુઈઝ, પેડ્રી, લામિન યમાલ, અલ્વારો મોરાટા, નિકો વિલિયમ્સ.