ભારતીય ઓલરાઉન્ડર અક્ષર પટેલે કહ્યું કે ઇંગ્લેન્ડ સામેની પ્રથમ વન-ડેમાં તેની મેચ વિનિંગ ઇનિંગ્સનું રહસ્ય તાકાતને બદલે ટાઇમિંગ પર ભરોસો રાખવાનું હતું. પ્લેયર ઑફ ધ મેચ રહેલા અક્ષરે કહ્યું કે તે T20 સિરીઝ દરમિયાન બોલને જરૂરિયાત કરતાં વધુ જોરથી મારવાનો પ્રયાસ કરી રહ્યો હતો, જ્યારે વન-ડેમાં તેણે પરિસ્થિતિઓ અનુસાર બેટિંગ કરી. અક્ષરે કહ્યું- ‘એજબેસ્ટનની પીચ શરૂઆતમાં બેટર્સ માટે મુશ્કેલ હતી. નવા બેટર્સને સેટ થવા માટે સમય જોઈતો હતો. એકવાર સેટ થયા પછી અમારું ધ્યાન પાર્ટનરશીપ બનાવવામાં હતું.’ અક્ષરે ઇંગ્લેન્ડ સામે 52 બોલમાં 57 રનની મહત્વપૂર્ણ ઇનિંગ્સ રમી અને ટીમને જીત અપાવી હતી. તેણે 9.5 ઓવરમાં 4 વિકેટ પણ ઝડપી. આ માટે તેમને પ્લેયર ઑફ ધ મેચ પસંદ કરવામાં આવ્યો. પીચ મુશ્કેલ હતી, સેટ થવામાં સમય લાગ્યો: અક્ષર અક્ષરે કહ્યું કે એજબેસ્ટનની પીચ શરૂઆતમાં બેટર્સ માટે સરળ નહોતી અને નવા બેટર્સને સેટ થવા માટે સમય જોઈતો હતો. અક્ષરે કહ્યું, ‘જે પણ નવો બેટર ક્રિઝ પર આવ્યો, તેને શરૂઆતમાં મુશ્કેલી પડી. જો રૂટ અને લિયામ ડૉસન માટે પણ રન બનાવવા ત્યારે સરળ બન્યા જ્યારે ભાગીદારી બની ગઈ. આવી પીચ પર આવતા જ મોટા શોટ રમી શકાતા નથી, કારણ કે બોલ સ્વિંગ અને સીમ બંને કરી રહ્યો હતો. પહેલા પોતાને સમય આપવો જરૂરી હતો.’ સિનિયર્સના પરત ફરવાથી આત્મવિશ્વાસ વધ્યો અક્ષરે કહ્યું કે રોહિત શર્મા, વિરાટ કોહલી, જસપ્રીત બુમરાહ અને કેએલ રાહુલ જેવા અનુભવી ખેલાડીઓની વાપસીથી ટીમમાં આત્મવિશ્વાસ અને શાંતિનું વાતાવરણ બન્યું છે. અક્ષરે કહ્યું, ‘અમે લાંબા સમયથી સાથે રમી રહ્યા છીએ. અમે સાથે મળીને ઘણા મેચ જીત્યા અને કેટલાક હાર્યા પણ છીએ. દરેક ખેલાડી પોતાની ભૂમિકા સારી રીતે જાણે છે. ટીમની અંદર સારી સમજ છે અને મેદાન પર ખેલાડીઓ વચ્ચે જે મસ્તી અને તાલમેલ દેખાય છે, તે જ ટીમને સહજ વાતાવરણ આપે છે.’ ભારતે 6 વિકેટે મેચ જીતી, સિરીઝમાં 1-0થી આગળ અક્ષર પટેલના ઓલરાઉન્ડ પ્રદર્શનની મદદથી ભારતે પહેલી વન-ડે 6 વિકેટે જીતી લીધી છે. બર્મિંગહામના એજબેસ્ટનમાં 259 રનના ટાર્ગેટને ચેઝ કરતા ભારતે 45.2 ઓવરમાં 4 વિકેટ ગુમાવીને 262 રન બનાવી મેચ પોતાના નામે કરી લીધી હતી. અક્ષરે અણનમ 57 રન બનાવ્યા હતા. કેપ્ટન શુભમન ગિલે 80 રનની ઇનિંગ રમી હતી, તે ક્રેમ્પ્સના કારણે રિટાયર્ડ હર્ટ થયો હતો. વોશિંગ્ટન સુંદરે પણ અણનમ 52 રનનું યોગદાન આપ્યું હતું. સંપૂર્ણ સમાચાર વાંચો…