‘જુરાસિક પાર્ક’ ફિલ્મ માટે જાણીતા ન્યુઝીલેન્ડના એક્ટર સેમ નીલનું મૃત્યુ ન્યુમોનિયાને કારણે થયું છે. સોમવારે 78 વર્ષની વયે તેમનું નિધન થયું હતું. તેમણે સિડનીની એક હોસ્પિટલમાં અંતિમ શ્વાસ લીધા હતા. ત્યારે તેમના પરિવારે મૃત્યુના કારણનો ખુલાસો કર્યો ન હતો.

બીબીસીના રિપોર્ટ અનુસાર, તેમના એજન્ટ ફિલિપ ગ્રેન્જે ગુરુવારે નિવેદન જારી કરીને જણાવ્યું કે સેમ નીલનું મૃત્યુ ન્યુમોનિયાને કારણે થયું છે. મીડિયામાં તેમના મૃત્યુ અંગે ચાલી રહેલી ખોટી ખબરો બાદ એજન્ટે આ માહિતી સ્પષ્ટ કરી છે.

સેમ નીલ લાંબા સમયથી બ્લડ કેન્સરથી પીડિત હતા, પરંતુ સારવાર બાદ તેઓ સંપૂર્ણપણે કેન્સર મુક્ત થઈ ગયા હતા. જ્યારે તેમનું નિધન થયું, ત્યારે તેમના શરીરમાં કેન્સર નહોતું.

‘મૃત્યુથી ડરતો નથી’ સેમ નીલે વર્ષ 2023માં આવેલા તેમના પુસ્તક ‘ડિડ આઈ એવર ટેલ યુ ધીસ?’માં તેમની બીમારી અને સારવારના દિવસોનો ઉલ્લેખ કર્યો હતો. કેન્સર વિશે વાત કરતા તેમણે બીબીસીને કહ્યું હતું કે, તેમને મૃત્યુથી ડર નથી લાગતો, પરંતુ તેઓ જીવવાનું છોડવા માંગતા નથી કારણ કે તેમને જીવનથી ખૂબ પ્રેમ છે.

સેમ નીલ કોણ હતા?

સેમ નીલ ન્યુઝીલેન્ડના સૌથી પ્રખ્યાત અભિનેતાઓમાંના એક હતા. તેમનું પૂરું નામ નાઇજલ જ્હોન ડર્મોટ “સેમ” નીલ હતું. તેમનો જન્મ 14 સપ્ટેમ્બર 1947ના રોજ ઉત્તરી આયર્લેન્ડના ઓમાઘમાં થયો હતો. જ્યારે તેઓ નાના હતા, ત્યારે તેમનો પરિવાર ન્યુઝીલેન્ડ જઈને વસ્યો, જ્યાં તેમનો ઉછેર થયો.

સેમ નીલે 1970ના દાયકામાં અભિનયની શરૂઆત કરી. તેમને પહેલી મોટી ઓળખ 1977ની ફિલ્મ સ્લીપિંગ ડોગ્સથી મળી. ત્યારબાદ 1979ની માય બ્રિલિયન્ટ કરિયરે તેમને આંતરરાષ્ટ્રીય ઓળખ અપાવી. 1980 અને 1990ના દાયકામાં તેમણે હોલિવૂડમાં પોતાની અલગ જગ્યા બનાવી. સેમ નીલ એ કલાકારોમાં સામેલ હતા, જેમણે 1970ના દાયકાના અંતમાં ઓસ્ટ્રેલિયન સિનેમાને દુનિયાભરમાં નવી ઓળખ અપાવી. તેમની ફિલ્મી કારકિર્દી પાંચ દાયકાથી વધુ લાંબી રહી અને તેમણે પોતાની શાનદાર અદાકારીથી કરોડો લોકોના દિલ જીત્યા.

‘જુરાસિક પાર્ક’એ બનાવી દીધા સુપરસ્ટાર

1993માં રિલીઝ થયેલી જુરાસિક પાર્ક, સેમ નીલના કરિયરની સૌથી મોટી ફિલ્મ સાબિત થઈ. તેમાં તેમણે ડો. એલન ગ્રાન્ટ નામના પેલિયોન્ટોલોજિસ્ટ (ડાયનાસોર નિષ્ણાત)નું પાત્ર ભજવ્યું. આ રોલ એટલો લોકપ્રિય થયો કે તેમણે બાદમાં જુરાસિક પાર્ક 3 (2001) અને જુરાસિક વર્લ્ડ ડોમિનિયન (2022)માં પણ આ જ પાત્ર ભજવ્યું.

આ ફિલ્મોથી પણ મળી ઓળખ

‘જુરાસિક પાર્ક’ ઉપરાંત સેમ નીલે ઘણી યાદગાર ફિલ્મોમાં કામ કર્યું. જેમાં મુખ્ય છે-

તેમણે ફિલ્મો ઉપરાંત ‘પીકી બ્લાઇન્ડર્સ’, ‘ધ ટ્યુડર્સ’, ‘મર્લિન’ અને ‘ઇન્વેઝન’ જેવી ટીવી સિરીઝમાં પણ દમદાર અભિનય કર્યો હતો.

બ્લડ કેન્સરને આપી ચૂક્યા હતા માત

વર્ષ 2023માં સેમ નીલે જણાવ્યું હતું કે તેમને એન્જીઓઇમ્યુનોબ્લાસ્ટિક ટી-સેલ લિમ્ફોમા, જે એક દુર્લભ બ્લડ કેન્સર છે, થયો હતો. તેમણે કીમોથેરાપી અને પછી CAR-T સેલ થેરાપી કરાવી હતી. સારવાર પછી તેઓ કેન્સર-મુક્ત થઈ ગયા હતા અને તેમણે પોતાની બીમારી વિશે ખુલ્લેઆમ વાત કરી હતી જેથી લોકોમાં જાગૃતિ વધી શકે.

ફિલ્મો ઉપરાંત વાઇનયાર્ડના માલિક હતા

સેમ નીલ માત્ર અભિનેતા જ નહોતા, પરંતુ ન્યુઝીલેન્ડમાં ટુ પેડૉક નામનો પોતાનો વાઇનયાર્ડ (દ્રાક્ષનો બગીચો) પણ ચલાવતા હતા. તેમને ખેતી, પ્રાણીઓ અને પ્રકૃતિ પ્રત્યે ખૂબ લગાવ હતો. સોશિયલ મીડિયા પર તેઓ અવારનવાર પોતાના ફાર્મ અને ત્યાંના પ્રાણીઓની તસવીરો અને વીડિયો શેર કરતા હતા.

બે સંબંધો અને ચાર બાળકો

1980ના દાયકામાં તેમની મુલાકાત એક્ટ્રેસ લીસા હારો સાથે થઈ. બંને થોડા સમય સુધી સાથે રહ્યા અને તેમને એક દીકરો થયો.

1989માં સૅમ નીલે મેકઅપ આર્ટિસ્ટ નોરીકો વાતાનાબી સાથે લગ્ન કર્યા. આ લગ્નથી તેમને એક દીકરી થઈ. તેમણે નોરીકોના પહેલા લગ્નથી થયેલી દીકરીને પણ પોતાની દીકરીની જેમ અપનાવી.

તેમની યુવાનીમાં, સેમ નીલ બીજા દીકરાના પિતા બન્યા હતા, જેને જન્મ પછી દત્તક આપી દેવામાં આવ્યો હતો. 1994માં ઘણા વર્ષો પછી, તેમની તે દીકરા સાથે ફરી મુલાકાત થઈ.

સેમ નીલને 4 બાળકો હતા અને તેમને 8 પૌત્ર-પૌત્રીઓ હતા.

દિવ્ય ભાસ્કરને Google પર મનપસંદ સોર્સ બનાવો