પ્રતિષ્ઠિત બ્યુટી પેજન્ટ ‘મિસ વર્લ્ડ’ની 75મી એનિવર્સરીની આવૃત્તિ વિયેતનામમાં યોજાવા જઈ રહી છે. ‘મિસ વર્લ્ડ 2026’માં પડોશી દેશ પાકિસ્તાન ઇતિહાસ રચવા જઈ રહ્યો છે. ‘મિસ વર્લ્ડ’ના 73 વર્ષના ઇતિહાસમાં પાકિસ્તાન પહેલીવાર ભાગ લઈ રહ્યું છે. આ પ્રતિયોગિતામાં 24 વર્ષની અનિકા મિરાજ પાકિસ્તાનનું પ્રતિનિધિત્વ કરશે.

અનિકા મિરાજ 24 વર્ષની છે.

‘મિસ વર્લ્ડ’ની 75મી એનિવર્સરી એડિશન 9 ઓગસ્ટથી 5 સપ્ટેમ્બર 2026 દરમિયાન વિયેતનામમાં યોજાશે. તેનું ગ્રાન્ડ ફિનાલે દરિયાકાંઠાના શહેર ન્હા ટ્રાંગમાં યોજાશે. આ બ્યુટી પેજન્ટમાં પાકિસ્તાન પહેલીવાર ઓફિશયલ ભાગ લઈ રહ્યું છે. અનિકા મિરાજને પાકિસ્તાનના લાહૌરમાં ‘મિસ વર્લ્ડ પાકિસ્તાન 2026’નો તાજ પહેરાવવામાં આવ્યો છે.

અનિકાએ લાહૌરમાં ‘મિસ વર્લ્ડ પાકિસ્તાન 2026’નો તાજ જીત્યો.

કોણ છે અનિકા મિરાજ?

24 વર્ષીય અનિકા જમાલ મિરાજ બિઝનેસ એડમિનિસ્ટ્રેશન અને ઇકોનોમિક્સમાં બેચલર્સ ડિગ્રી ધરાવે છે. હાલમાં તે ઓડિટિંગ અને અકાઉન્ટિંગમાં માસ્ટર્સ ડિગ્રીનો અભ્યાસ કરી રહી છે.

જોકે, અનિકા ઇન્ટરનેશનલ બ્યુટી પેજન્ટ્સથી અજાણી નથી. નવભારત ટાઇમ્સના અહેવાલ મુજબ તે પહેલાં પણ ‘મિસ અર્થ’, ‘મિસ ગ્લોબલ’, ‘મિસ કોસ્મો’, ‘મિસ ઇકો ઇન્ટરનેશનલ’ અને ‘મિસ ઓરા ઇન્ટરનેશનલ’માં પાકિસ્તાનનું પ્રતિનિધિત્વ કરી ચૂકી છે. તેને કોસોવોમાં આયોજીત ‘મિસ ફ્રીડમ ઓફ ધ વર્લ્ડ’ સ્પર્ધામાં ચાર ખિતાબ જીત્યા બાદ આંતરરાષ્ટ્રીય ઓળખ મળી હતી.

અનિકા બિઝનેસ એડમિનિસ્ટ્રેશન અને ઇકોનોમિક્સમાં બેચલર્સ ડિગ્રી ધરાવે છે.

અનિકાએ ‘મિસ વર્લ્ડ’માં પાકિસ્તાનનું પ્રતિનિધિત્વ કરવાને સન્માનની વાત ગણાવી છે. તેણે જણાવ્યું કે, આનાથી દેશની સમૃદ્ધ સંસ્કૃતિ, મજબૂતી અને વૈવિધ્યતાને વિશ્વ સમક્ષ લાવવામાં મદદ મળશે. અનિકાએ કહ્યું કે, ‘મારી ભવિષ્યની આકાંક્ષા સ્ટેટ-ઓથોરાઇઝ્ડ પબ્લિક અકાઉન્ટન્ટ બનવાના મારા સ્વપ્નને સાકાર કરવાની છે. સાથે જ પાકિસ્તાનના ઉજ્જવળ ભવિષ્યના નિર્માણમાં મદદ કરવા માટે બાળકોના અધિકારો અને બાળકીઓના શિક્ષણની સક્રિયપણે વકીલાત કરવાની છે.’

અનિકા પબ્લિક અકાઉન્ટન્ટ બનવા માંગે છે.

મિસ પાકિસ્તાન વર્લ્ડ ઓર્ગેનાઇઝેશનની મહત્ત્વની ભૂમિકા

વાસ્તવમાં ઇસ્લામિક રિપબ્લિક પાકિસ્તાનમાં યુવતીઓ માટે મૉડેલિંગ કરવું મુશ્કેલીભર્યું રહ્યુ છે. ફેશન શો કે તે સંબંધિત કાર્યક્રમોમાં મોટાભાગે દક્ષિણપંથી સંગઠનો દ્વારા વિરોધ કરવામાં આવે છે. અનિકાનું આ બ્યુટી પેજન્ટમાં ભાગ લેવું પણ ઇસ્લામિક કટ્ટરપંથિયોને નારાજ કરી શકે છે. જોકે, પાકિસ્તાનમાં 2002માં સ્થાપિત ‘મિસ પાકિસ્તાન વર્લ્ડ ઓર્ગનાઇઝેશન’ બે દાયકાથી પાકિસ્તાની મહિલાઓને આંતરરાષ્ટ્રીય બ્યુટી પેજન્ટ માટે તૈયાર કરી રહી છે.

અનિકા અગાઉ પણ ઘણા આંતરરાષ્ટ્રીય બ્યુટી પેજન્ટમાં પાકિસ્તાનનું પ્રતિનિધિત્વ કરી ચૂકી છે.

મિસ પાકિસ્તાન વર્લ્ડ ઓર્ગેનાઇઝેશનની પ્રમુખ સોનિયા અહેમદે ‘મિસ વર્લ્ડ’માં પાકિસ્તાનની ભાગીદારીને એક ઐતિહાસિક ક્ષણ ગણાવી છે. તેમનું કહેવું છે કે, ‘મિસ વર્લ્ડ’માં પાકિસ્તાનની પહેલી સત્તાવાર ભાગીદારી વૈશ્વિક મંચ પર રાષ્ટ્રીય પ્રતિનિધિત્વ માટે મોટી ઉપલબ્ધિ છે. પાકિસ્તાની મહિલાઓ આંતરરાષ્ટ્રીય મંચો પર પણ પોતાની કાબેલિયત સાબિત કરી રહી છે.

દિવ્ય ભાસ્કરને Google પર મનપસંદ સોર્સ બનાવો