આ આર્જેન્ટિનાનો સાતમો વર્લ્ડ કપ ફાઇનલ હશે. ટીમ આ પહેલા 1930, 1978, 1986, 1990, 2014 અને 2022માં ફાઇનલ રમી ચૂકી છે. આર્જેન્ટિના 1978, 1986 અને 2022માં વર્લ્ડ કપ જીતી ચૂક્યું છે. હવે તેની પાસે સતત બીજી વાર અને કુલ ચોથો ખિતાબ જીતવાની તક છે.

બ્યુનોસ આયર્સમાં આર્જેન્ટિનાના ચાહકોનું સેલિબ્રેશન થયું.

બ્યુનોસ આયર્સમાં મોટી સંખ્યામાં ચાહકો રસ્તાઓ પર ઉતરી આવ્યા.

પ્રથમ હાફ- ફૂટબોલ ઓછું, લડાઈ વધુ

મેચની શરૂઆતથી જ સ્પષ્ટ થઈ ગયું હતું કે મુકાબલો માત્ર ફૂટબોલનો નથી. ત્રીજી જ મિનિટમાં ઇંગ્લેન્ડના ઇલિયટ એન્ડરસન પર ટેકલ કર્યા બાદ બંને ટીમના ખેલાડીઓ સામસામે આવી ગયા. રેફરી ઇસ્માઇલ એલફાથને વચ્ચે પડવું પડ્યું. આખા પ્રથમ હાફમાં ઘણી વખત ખેલાડીઓ ભીડાયા અને ફાઉલની ભરમાર રહી.

ઇંગ્લેન્ડના ઇલિયટ એન્ડરસન પર ફાઉલ કર્યા પછી બંને ટીમના ખેલાડીઓ એકબીજા સાથે ટકરાઈ ગયા.

33મી મિનિટે ઇંગ્લેન્ડને પહેલી તક મળી. ડેક્લન રાઇસની ફ્રી-કિક પર જ્હોન સ્ટોન્સે હેડર માર્યો, પરંતુ બોલ નેટને અડીને બહાર નીકળી ગયો. આર્જેન્ટિના તરફથી એન્ઝો ફર્નાન્ડેઝે 38મી મિનિટે બોક્સની બહારથી શોટ માર્યો, જે ગોલપોસ્ટની ઉપરથી નીકળી ગયો.

37મી મિનિટે લિયોનેલ મેસ્સી આગળ વધ્યો, પરંતુ ઇલિયટ એન્ડરસને તેને રોકવા માટે ફાઉલ કર્યું. આના પર એન્ડરસનને યલો કાર્ડ મળ્યું. 42મી મિનિટે જુડ બેલિંગહામની જર્સી ખેંચવા બદલ આર્જેન્ટિનાના લિસાન્ડ્રો માર્ટિનેઝને પણ કાર્ડ બતાવવામાં આવ્યું. હાફ ટાઈમની સીટી વાગ્યા પછી પણ બંને ટીમના ખેલાડીઓ રેફરી સાથે દલીલ કરતા રહ્યા અને મેસ્સી સૌથી છેલ્લે મેદાનમાંથી બહાર ગયો.

હાફ ટાઈમ પછી રેફરી સાથે વાત કરતો મેસ્સી.

બીજા હાફની શરૂઆતમાં ઇંગ્લેન્ડનો ગોલ

બ્રેક પછી આર્જેન્ટિનાએ ઝડપી શરૂઆત કરી. જુલિયન અલ્વારેઝે 48મી મિનિટે પહેલો ઓન-ટાર્ગેટ શોટ માર્યો, જેને જોર્ડન પિકફોર્ડે શાનદાર રીતે રોકી દીધો. 55મી મિનિટે મેચનો પહેલો ગોલ ઇંગ્લેન્ડે કર્યો.

હેરી કેનના લાંબા પાસ પર આર્જેન્ટિનાનો ડિફેન્સ સંપૂર્ણપણે ક્લિયરન્સ કરી શક્યો નહીં. ડેક્લન રાઇસે બોલ મોર્ગન રોજર્સને આપ્યો. રોજર્સે જમણી બાજુથી સચોટ ક્રોસ નાખ્યો, જેના પર એન્થોની ગોર્ડને બોક્સમાંથી સરળ ફિનિશ કર્યું. આ ટુર્નામેન્ટમાં ગોર્ડનનો પહેલો ગોલ હતો અને ઇંગ્લેન્ડ 1-0થી આગળ થઈ ગયું.

આર્જેન્ટિનાના ગોલકીપર ગોર્ડનના શોટને રોકી શક્યો નહીં.

અંગ્રેજોને હાર ન પચી, આર્જેન્ટિના સાથે કર્યો ટપલી દાવ

રેફરીએ મેચ પત્યા બાદ સીટી વગાડી તે સાથે જ ઇંગ્લેન્ડનું વર્લ્ડ કપ જીતવાનું સપનું તૂટી ગયું હતું. મેચ હાર્યા બાદ ઇંગ્લેન્ડનો સ્ટાર મિડફિલ્ડર જુડ બેલિંગહામ પિચ પર એકલો ઊભો હતો અને મેચના પરિણામ વિશે વિચારીને અત્યંત નિરાશ દેખાતો હતો. આ વર્લ્ડ કપમાં 6 ગોલ કરનાર આ ખેલાડી માટે આ ઝટકો ઘણો મોટો હતો. બેલિંગહામને આ સ્થિતિમાં જોઈને આર્જેન્ટિનાના એક ખેલાડીએ રમતગમતની ભાવના બતાવીને સૌથી પહેલા તેની પાસે જઈને તેને સાંત્વના આપી હતી.

થોડી જ વારમાં આર્જેન્ટિનાનો ખેલાડી વેલેન્ટિન બાર્કો પોતાના સાથી ખેલાડીઓ સાથે જીતની ઉજવણી કરતો અને એકબીજાને ગળે મળતો બેલિંગહામની નજીક પહોંચ્યો. આ દરમિયાન બાર્કોએ બેલિંગહામને ઉદ્દેશીને કંઈક કમેન્ટ કરી હતી. બાર્કોની વાત સાંભળીને ઇંગ્લેન્ડનો આ મિડફિલ્ડર પોતાનો ગુસ્સો કાબૂમાં રાખી શક્યો નહીં. તેને આ વાત એટલી ખરાબ લાગી કે તેણે ગુસ્સામાં આવીને તરત જ બાર્કોના માથા પર ટપલી મારી.

આ પછી આર્જેન્ટિનાના ખેલાડી બાર્કોએ પણ વળતો પ્રહાર કર્યો અને બેલિંગહામને પાછળ ધકેલી દીધો. મેદાન પર સ્થિતિ ગંભીર બનતી જોઈને બંને ટીમના બીજા ખેલાડીઓ અને સપોર્ટ સ્ટાફ તરત જ વચ્ચે આવી ગયા હતા અને મામલો વધુ બગડે તે પહેલાં જ બંનેને અલગ કરીને શાંત પાડ્યા હતા.

મેચની બબાલના 4 PHOTOs

‘ફોકલેન્ડ’ બેનર વિવાદ?

મેદાન પરની હિંસા સિવાય આ મેચ એક મોટા રાજકીય વિવાદનું કેન્દ્ર બની છે. મેચ પૂરી થયા બાદ આર્જેન્ટિનાના ચાહકો અને સપોર્ટ સ્ટાફ દ્વારા સ્ટેડિયમમાં એક વિવાદાસ્પદ બેનર પ્રદર્શિત કરવામાં આવ્યું હતું, જેના પર લખ્યું હતું: “Las Malvinas son Argentinas” (માલવિનાસ/ફોકલેન્ડ આર્જેન્ટિનાનું છે). આર્જેન્ટિના જેને ‘માલવિનાસ’ કહે છે, તેને યુકે (ઇંગ્લેન્ડ) ‘ફોકલેન્ડ આઇલેન્ડ’ (Falklands) તરીકે ઓળખે છે. 1982માં આ ટાપુઓ પર નિયંત્રણ મેળવવા માટે બંને દેશો વચ્ચે ભીષણ યુદ્ધ થયું હતું, જેમાં બ્રિટનનો વિજય થયો હતો. ફિફા (FIFA)ના કડક નિયમો અનુસાર, ફૂટબોલના મેદાન પર કોઈ પણ પ્રકારના રાજકીય, ધાર્મિક કે વ્યક્તિગત સંદેશાઓ પ્રદર્શિત કરવા પર સખત પ્રતિબંધ છે. ઇંગ્લેન્ડ સામેની મેચમાં આર્જેન્ટિના તરફથી કરાયેલા આ રાજકીય પ્રદર્શને સ્પોર્ટ્સમેનસ્પિરિટ પર સવાલો ઉભા કર્યા છે.

મેદાન વચ્ચે પોસ્ટર લહેરાવ્યું

દિવ્ય ભાસ્કરને Google પર મનપસંદ સોર્સ બનાવો