102 મેચ, 31 દિવસ અને 46 ટીમ પછી ફૂટબોલ વર્લ્ડ કપ 2026 ને બે ફાઈનલિસ્ટ મળી ગયા છે. ડિફેન્ડિંગ ચેમ્પિયન આર્જેન્ટિના સતત બીજી વખત ટાઇટલ મેચમાં પહોંચ્યું છે, જ્યારે સ્પેન 16 વર્ષ પછી ફાઈનલ રમશે. બંને ટીમ 19 જુલાઈની રાત્રે 12:30 વાગ્યે ટ્રોફી માટે આમને-સામને હશે.

ફાઈનલ સુધી પહોંચવાનો રસ્તો બંને ટીમ માટે સરળ રહ્યો નથી. ક્યાંક છેલ્લી મિનિટમાં મેચ પલટાઈ, ક્યાંક એક્સ્ટ્રા ટાઈમમાં જીત મળી તો ક્યાંક ગોલકીપરે શાનદાર બચાવ કરીને ટીમને બહાર થવાથી બચાવી. આર્જેન્ટિના અને સ્પેનની આ સફરમાં 10 ખેલાડીઓ એવા રહ્યા, જે જીતનું સૌથી મોટું કારણ બન્યા.

આર્જેન્ટિનાના ટૉપ-5 પ્લેયર્સ

1. લિયોનેલ મેસ્સી, કેપ્ટન, ફોરવર્ડ

39 વર્ષના મેસ્સી ફરી એકવાર આર્જેન્ટિનાના સૌથી મોટા મેચ વિનર સાબિત થયો. ગ્રુપ સ્ટેજમાં અલ્જીરિયા સામે હેટ્રિક ફટકારી. સેમિફાઈનલમાં ઇંગ્લેન્ડ સામે ટીમ 85 મિનિટ સુધી 0-1થી પાછળ હતી, પરંતુ છેલ્લા સાત મિનિટમાં મેસ્સીએ બે આસિસ્ટ આપીને મેચ પલટી નાખી. તેના નામે આખી ટુર્નામેન્ટમાં સૌથી વધુ 8 ગોલ છે.

2. એન્ઝો ફર્નાન્ડિઝ, મિડફિલ્ડર

સેમિફાઈનલમાં એન્ઝોએ ઇંગ્લેન્ડ સામે 25 યાર્ડ દૂરથી શાનદાર શોટ મારીને બરાબરી કરાવી. ડિફેન્સ અને એટેક વચ્ચે તાલમેલ બેસાડવામાં, બોલ પર નિયંત્રણ રાખવામાં અને રમતની ગતિ નક્કી કરવામાં તેની ભૂમિકા અત્યંત મહત્વની રહી.

3. લૌટારો માર્ટિનેઝ, સ્ટ્રાઈકર

ઇંગ્લેન્ડ સામેની સેમિફાઈનલ મેચ 1-1થી બરાબરી પર હતી. લૌટારો સબસ્ટિટ્યુટ તરીકે રમવા ઉતર્યો. ઈજાના સમયના બીજા મિનિટમાં તેણે હેડરથી ગોલ કરીને આર્જેન્ટિનાને સતત બીજી વર્લ્ડ કપ ફાઈનલમાં પહોંચાડી દીધું.

4. ક્રિસ્ટિયન રોમેરો, સેન્ટર બેક

રાઉન્ડ ઑફ-16માં ઇજિપ્ત સામે આર્જેન્ટિના 0-2થી પાછળ હતું. 79મી મિનિટે રોમેરોએ ગોલ કરીને કમબેકની શરૂઆત કરી અને આગામી 13 મિનિટમાં ટીમે ત્રણ ગોલ કરીને મેચ પલટી દીધી. ડિફેન્સમાં તેના ટેકલ અને ઇન્ટરસેપ્શને ઘણી મજબૂત ટીમના હુમલા રોક્યા.

રોમેરોના ગોલે આર્જેન્ટિનાની કમબેકની આશાઓ જગાવી હતી.

5. જુલિયન અલ્વારેઝ, સ્ટ્રાઈકર

સ્વિટ્ઝર્લેન્ડ સામે ક્વાર્ટર ફાઈનલ એક્સ્ટ્રા ટાઇમ સુધી લંબાઈ ગયો હતો. 112મી મિનિટે અલ્વારેઝે બોક્સની બહારથી શાનદાર ગોલ કરીને આર્જેન્ટિનાને સેમિફાઈનલની ટિકિટ અપાવી.

સ્પેનના 5 ગેમચેન્જર

1. ઉનાઈ સિમોન, ગોલકીપર

સ્પેન ફાઈનલ સુધી પહોંચવાનું સૌથી મોટું કારણ તેની મજબૂત ડિફેન્સ હતી અને તે ડિફેન્સની સૌથી મજબૂત કડી ગોલકીપર ઉનાઈ સિમોન રહ્યો. તેણે આખી ટુર્નામેન્ટમાં માત્ર એક ગોલ ખાધો. ફ્રાન્સ સામેની સેમિફાઈનલમાં એમબાપ્પેના ઘણા શોટ રોક્યા. તેણે બધી મેચ મળીને 609 મિનિટ સુધી ગોલ ન ખાવાનો રેકોર્ડ પણ બનાવ્યો.

2. લામિન યમાલ, રાઇટ વિંગર

યમાલે પોતાની સ્પીડ અને ડ્રિબ્લિંગથી દરેક મેચમાં ડિફેન્ડરોને પરેશાન કર્યા. ફ્રાન્સ સામેની સેમિફાઈનલમાં તેણે બોક્સની અંદર ફાઉલ મેળવ્યો, જેના પર મળેલી પેનલ્ટીને મિકેલ ઓયારજાબાલે ગોલમાં ફેરવી.

3. મિકેલ ઓયારઝાબાલ, સ્ટ્રાઈકર

સ્પેનના સૌથી ભરોસાપાત્ર ફિનિશર ઓયારઝાબાલે સેમિફાઈનલમાં પેનલ્ટી પર ગોલ કરીને ટીમને શરૂઆતી લીડ અપાવી. આખી ટુર્નામેન્ટમાં તેણે પાંચ ગોલ અને એક આસિસ્ટ કર્યો.

4. પૌ કુબાર્સી, ડિફેન્ડર

19 વર્ષીય કુબાર્સી ગ્રુપ સ્ટેજના દરેક મિનિટ મેદાન પર રહેનાર એકમાત્ર ટીનેજર રહ્યો. તેણે 295માંથી 290 પાસ પૂરા કર્યા. 16 વખત બોલ રિકવર કર્યો અને માત્ર એક ફાઉલ કર્યો. એમ્બાપ્પે અને રોનાલ્ડો જેવા સ્ટાર ખેલાડીઓ સામે પણ તેનું પ્રદર્શન શાનદાર રહ્યું.

કુબાર્સીએ એમબાપ્પે, રોનાલ્ડો સામે પણ ડિફેન્ડ કર્યું.

5. પેડ્રો પોરો, મિડફિલ્ડર

પોરોએ મિડફિલ્ડ અને એટેક વચ્ચે સૌથી મજબૂત કડી તરીકે કામ કર્યું. નાના પાસ અને ઉત્તમ મૂવમેન્ટથી તેણે વિરોધી ડિફેન્સને સતત તોડ્યું. ફ્રાન્સ સામે સેમિફાઈનલમાં બીજો ગોલ કરીને સ્પેનની ફાઈનલમાં જગ્યા પાકી કરી દીધી.

દિવ્ય ભાસ્કરને Google પર મનપસંદ સોર્સ બનાવો