ટેક્નોલોજી દિગ્ગજ એપલની લોકપ્રિય ડિજિટલ પેમેન્ટ સેવા ‘એપલ પે’ આ વર્ષે સપ્ટેમ્બરના અંત અથવા ઓક્ટોબર મહિના સુધીમાં ભારતમાં દસ્તક દઈ શકે છે. આ સેવાના આગમનથી ભારતીય આઈફોન યુઝર્સ માટે ડિજિટલ લેણદેણનો અનુભવ તદ્દન બદલાઈ જશે. રિપોર્ટ્સ અનુસાર, શરૂઆતના તબક્કામાં આ સર્વિસનું મુખ્ય ધ્યાન ક્રેડિટ કાર્ડ પેમેન્ટ પર રહેશે, જો કે હાલમાં તેમાં UPI નો સમાવેશ કરવામાં આવ્યો નથી.

આઈફોનથી કેવી રીતે થશે પેમેન્ટ?

એપલ પે ભારતમાં આવ્યા બાદ, વપરાશકર્તાઓ ખૂબ જ સરળતાથી તેમની ક્રેડિટ કાર્ડની વિગતો ‘એપલ વોલેટ’માં સુરક્ષિત રીતે સેવ કરી શકશે. કોઈપણ સ્ટોર પર ખરીદી કરતી વખતે, યુઝર્સે માત્ર તેમના આઈફોન અથવા આઈપેડને પીઓએસ (POS) મશીન સામે ટેપ કરવાનું રહેશે. આ કોન્ટેક્ટલેસ ચુકવણી એનએફસી ટેકનોલોજીના માધ્યમથી અત્યંત ઝડપથી પૂર્ણ થશે. અન્ય દેશોની જેમ જ શરૂઆતમાં આ સેવા વિઝા અને માસ્ટરકાર્ડ જેવા વૈશ્વિક કાર્ડ નેટવર્ક્સ સાથે કામ કરશે.

UPI માટે હજુ રાહ જોવી પડશે

ભારતીય બજારમાં લોન્ચ થતી વખતે Apple Pay માં UPI આધારિત ચુકવણીઓ ઉપલબ્ધ નહીં હોય. યુપીઆઈને એપલ પે સાથે એકીકૃત કરવા માટે કંપનીએ નેશનલ પેમેન્ટ્સ કોર્પોરેશન ઓફ ઈન્ડિયા (NPCI) પાસેથી જરૂરી મંજૂરીઓ મેળવવી પડશે અને પેમેન્ટ રૂટીંગ માટે કોઈ પ્રાયોજક બેંક સાથે ભાગીદારી કરવી પડશે. જોકે, એપલ દ્વારા સત્તાવાર રીતે આ અંગે કોઈ જાહેરાત કરવામાં આવી નથી, પરંતુ સૂત્રોના અહેવાલ મુજબ સપ્ટેમ્બર-ઓક્ટોબર સુધીમાં તૈયારીઓ પૂર્ણ થઈ શકે છે.

એપલની કમાણી અને બજાર પર અસર

ભારતમાં એપલ પે દ્વારા થનારા દરેક ક્રેડિટ કાર્ડ વ્યવહાર પર એપલને નિશ્ચિત ફી મળવાની સંભાવના છે. અહેવાલો મુજબ, એપલ પ્રત્યેક કાર્ડ વ્યવહાર પર ૧૫ થી ૨૦ બેસિસ પોઈન્ટ હિસ્સા માટે બેંકો સાથે ચર્ચા કરી રહી છે, જ્યારે કેટલીક પ્રમુખ બેંકો ૧૦ બેસિસ પોઈન્ટ ફી પર ભાર મૂકી રહી છે. ઉલ્લેખનીય છે કે એક બેસિસ પોઈન્ટ એટલે ૦.૦૧ ટકા. પેમેન્ટ ઇન્ડસ્ટ્રીના નિષ્ણાતો માને છે કે ભારતમાં એપલ પે ના પ્રવેશથી ડિજિટલ ક્રેડિટ કાર્ડ વ્યવહારોને વેગ મળશે અને ફિનટેક સેક્ટરમાં સ્પર્ધા વધુ તીવ્ર બનશે.

આ પણ વાંચોઃ Delhi Metroનો વૈશ્વિક ડંકો: હોંગકોંગ અને પેરિસને પાછળ છોડી રચ્યો નવો ઇતિહાસ!