સ્કોટલેન્ડના ફોર્થહિલમાં ICC ક્રિકેટ વર્લ્ડ કપ લીગ-2ની ટ્રાઇ-સિરીઝ મેચ રમાઈ રહી છે. આમાં સ્કોટલેન્ડના 23 વર્ષીય ઑફ-સ્પિનર લાઈલ રોબર્ટસને વન-ડે ડેબ્યૂ પર 6 વિકેટ લીધી. આ સાથે તે ડેબ્યૂ પર 6 વિકેટ લેનાર ચોથો બોલર બન્યો અને સાઉથ આફ્રિકાના કાગીસો રબાડા અને વેસ્ટ ઇન્ડીઝના ફિડેલ એડવર્ડ્સના રેકોર્ડની બરાબરી કરી. જ્યારે, સ્કોટલેન્ડના ચાર્લી કેસલ ડેબ્યૂ મેચમાં સૌથી વધુ 7 વિકેટ લેનાર બોલર છે. આ મેચમાં સ્કોટલેન્ડે કેનેડાને 170 રનથી હરાવ્યું. છેલ્લા 15 બોલમાં 5 વિકેટ રોબર્ટસને કેનેડાની ઇનિંગ્સના છેલ્લા ભાગમાં મેચનો માહોલ સંપૂર્ણપણે સ્કોટલેન્ડની તરફેણમાં કરી દીધો. તેણે તેના છેલ્લા 15 બોલમાં 5 વિકેટ લીધી. શ્રેયસ મૌવા અને ઝાહિદ શીર્ઝાદને સતત બોલ પર આઉટ કર્યા. ત્યારબાદ કલીમ સનાને બોલ્ડ કરીને કેનેડાની ઇનિંગ્સ સમાપ્ત કરી. બેરીંગ્ટનની સાતમી વન-ડે સદી, સ્કોટલેન્ડ માટે સૌથી વધુ છગ્ગાનો રેકોર્ડ બનાવ્યો કેપ્ટન રિચી બેરીંગ્ટને 120 રનની ઇનિંગ રમીને સ્કોટલેન્ડને 50 ઓવરમાં 7 વિકેટે 347 રન સુધી પહોંચાડ્યું. આ તેની વન-ડે કારકિર્દીની સાતમી સદી છે. તેણે પોતાની ઇનિંગમાં 4 છગ્ગા ફટકાર્યા અને વન-ડેમાં તેના કુલ છગ્ગાની સંખ્યા 90 થઈ ગઈ. આ સાથે તેણે જ્યોર્જ મુન્સેના 87 છગ્ગાનો રેકોર્ડ તોડીને સ્કોટલેન્ડ માટે વન-ડેમાં સૌથી વધુ છગ્ગા ફટકારવાનો રેકોર્ડ પોતાના નામે કર્યો. બેરીંગ્ટને બ્રેન્ડન મેકમુલન સાથે ત્રીજી વિકેટ માટે 140 રનની ભાગીદારી કરી. મેકમુલને 64 રન બનાવ્યા. માઈકલ જોન્સે 41 અને મેથ્યુ ક્રોસે અણનમ 51 રન બનાવ્યા. છેલ્લી ઓવરોમાં જેક જાર્વિસે 14 બોલમાં 30 રન બનાવી ટીમને 347 રન સુધી પહોંચાડી. કેનેડાની ટીમ 177 રનમાં ઓલઆઉટ 348 રનના ટાર્ગેટને ચેઝ કરવા ઉતરેલી કેનેડાની શરૂઆત ખરાબ રહી. ટીમે શરૂઆતની ઓવરોમાં જ વિકેટ ગુમાવી દીધી. પરગટ સિંહે 42 રન બનાવી સંઘર્ષ કર્યો, પરંતુ તેને અન્ય બેટર્સનો પૂરતો સાથ મળ્યો નહીં. રોબર્ટસન ઉપરાંત સ્કોટલેન્ડના બોલરોએ પણ સતત દબાણ જાળવી રાખ્યું અને કેનેડાની આખી ટીમ 35 ઓવરમાં 177 રનમાં ઓલઆઉટ થઈ ગઈ. લીગ-2માં સ્કોટલેન્ડ ટોચ પર આ જીત પછી સ્કોટલેન્ડ ICC ક્રિકેટ વર્લ્ડ કપ લીગ-2ના પોઇન્ટ્સ ટેબલમાં ટોચ પર પહોંચી ગયું. ટીમે પહેલાથી જ વર્લ્ડ કપ ક્વોલિફાયર માટે જગ્યા પાક્કી કરી લીધી છે. હવે લીગ-2માં આ જીત સાથે સ્કોટલેન્ડે પોતાનું અભિયાન ટોચના સ્થાને પુરું કર્યું.