બોલિવૂડનો ‘હીરો નં.1’ ગોવિંદા આ દિવસોમાં પોતાના અંગત જીવન અને પત્ની સુનીતા આહુજા સાથે ચાલી રહેલા વિવાદને કારણે ચર્ચામાં છે. આ દરમિયાન ગોવિંદાનો એક નવો વીડિયો સામે આવ્યો છે, જેમાં તે થાઈલેન્ડના પટ્ટાયા સ્થિત એક ક્લબમાં ડાન્સ કરતો જોવા મળી રહ્યો છે. સ્વતંત્રતા દિવસના અવસરે આયોજિત એક કાર્યક્રમમાં ગોવિંદા પોતાના હિટ ગીતો પર થિરકતો જોવા મળ્યો. બ્લેક એન્ડ વ્હાઇટ સૂટ પહેરેલો ગોવિંદા બેકગ્રાઉન્ડ ડાન્સર્સ સાથે પોતાની સિગ્નેચર સ્ટેપ્સ કરતો જોવા મળ્યો. પટ્ટાયાના ક્લબમાં ‘સોની દે નખરે’ પર પરફોર્મન્સ આપ્યું
ક્લબમાં પરફોર્મન્સ દરમિયાન ગોવિંદા બ્લેક એન્ડ વ્હાઇટ રંગના ફોર્મલ સૂટમાં જોવા મળ્યો. સ્ટેજ પર તેની સાથે બેકગ્રાઉન્ડ ડાન્સર્સની ટીમ પણ હાજર હતી, જે તેના ગીતોની બીટ્સ પર તાલ મિલાવી રહી હતી. વાયરલ થઈ રહેલા વીડિયોમાં ગોવિંદાએ પોતાની સુપરહિટ ફિલ્મોના ગીતો ‘સોની દે નખરે’ અને ‘યુપી વાલા ઠુમકા’ પર ડાન્સ કર્યો. તે સ્ટેજ પર પૂરા જોશ સાથે પોતાની જૂની સ્ટાઈલમાં ડાન્સ સ્ટેપ્સ કરતો જોવા મળી રહ્યો છે. કોમલ રાણી સ્વર્ણકાર સાથે દેખાતા અફેરની ચર્ચા
આ વીડિયો એવા સમયે સામે આવ્યો છે, જ્યારે ગોવિંદા અને તેની પત્ની સુનીતા આહુજા વચ્ચે અણબનાવના સમાચાર ચાલી રહ્યા છે. થોડા સમય પહેલા ગોવિંદા મુંબઈ એરપોર્ટ પર તેની આગામી ફિલ્મની ડેબ્યૂ એક્ટ્રેસ કોમલ રાણી સ્વર્ણકાર સાથે જોવા મળ્યો હતો. અગાઉ સુનીતાએ કહ્યું હતું કે, તેને કોમલ નામથી નફરત છે. તેવામાં બંનેનો સાથેનો વીડિયો વાયરલ થયા બાદ મીડિયા રિપોર્ટ્સમાં તેમના અફેરની અટકળો લગાવવામાં આવી રહી હતી. ‘દીકરીની ઉંમરની છોકરી ફેરવી રહ્યો છે’ એક્ટ્રેસ સાથે દેખાતા સુનીતાએ કહ્યું, ‘ગોવિંદા પોતાની દીકરીની ઉંમરની છોકરીને લઈને ફરી રહ્યો છે અને તેને આ વાત પર થોડી શરમ આવવી જોઈએ.’ સુનીતા આહુજાએ ગોવિંદા સાથે દેખાયેલી એક્ટ્રેસ કોમલના ડ્રેસિંગ સેન્સ પર પણ ટિપ્પણી કરી. તેણે કહ્યું કે, ‘જો સામેવાળાનો શુગર ડેડી એટલો અમીર છે, તો ઓછામાં ઓછા કપડાં તો યોગ્ય પહેરવા જોઈએ.’ સુનીતાએ આગળ કહ્યું હતું કે, ‘માણસનું પોતાનું એક સ્ટાન્ડર્ડ હોવું જોઈએ.’ સુનીતાએ પોતાનું ઉદાહરણ આપતા કહ્યું કે, લોકોએ જોવું જોઈએ કે તેઓ કઈ રીતે સ્ટાઈલ સાથે રહે છે. તેણે આખી ઘટનાને ખૂબ જ ખરાબ અને હલકી વિચારસરણી ગણાવી. ‘હદમાં રહો, બદનામ ન કરો’ પત્ની સુનીતાના વાંધાજનક નિવેદનો પર ગોવિંદા ભડકી ગયો. ગોવિંદાએ ચેતવણી આપીને કહ્યું છે કે, તેને (સુનીતાને) હદમાં રહેવું જોઈએ. સાથે જ એક્ટરે કોમલ રાનીનો બચાવ પણ કર્યો અને કહ્યું કે, ‘સુનીતા તેને બદનામ કરવામાં કોઈ કસર છોડી રહી નથી.’