સોનું ખરીદવામાં મેકિંગ ચાર્જ, ચોરી થવાનો ડર અને શુદ્ધતાની ચિંતા હંમેશા રહે છે. આવા સમયે, ગોલ્ડ ETF સોનામાં રોકાણ કરવા માટે એક અત્યંત આધુનિક, સુરક્ષિત અને સસ્તું માધ્યમ તરીકે ઉભરી આવ્યું છે. આ એક એવું મ્યુચ્યુઅલ ફંડ છે, જે ઘરેલું બજારમાં 99.5% શુદ્ધ સોનાની વાસ્તવિક કિંમત પર નજર રાખે છે અને શેરબજારમાં શેરની જેમ જ ખરીદ-વેચાણ થાય છે.

તમે જ્યારે તેનો 1 યુનિટ ખરીદો છો, ત્યારે તેનો અર્થ એ થાય છે કે તમે ડિજિટલ સ્વરૂપમાં શુદ્ધ સોનું સુરક્ષિત કરી લો છો, જેની કસ્ટડી ફંડ હાઉસ પાસે હોય છે.

ગોલ્ડ ETF શું છે?

સામાન્ય રીતે, એક ગોલ્ડ ETF યુનિટનું મૂલ્ય 1 ગ્રામ શુદ્ધ સોના (99.5% શુદ્ધતા) બરાબર હોય છે. જોકે, કેટલાક ફંડ્સમાં તે 0.01 ગ્રામનું પણ હોય છે. તેની કિંમતો ભારતીય બુલિયન બજારમાં સોનાના ભાવ મુજબ રીઅલ ટાઇમમાં બદલાતી રહે છે. તેનો સૌથી મોટો ફાયદો એ છે કે જ્વેલરીની જેમ તેમાં કોઈ મેકિંગ ચાર્જ કે બેંક લોકરનું ભાડું ચૂકવવું પડતું નથી. તેને શેરબજાર (NSE/BSE) ના કાર્યકારી કલાકોમાં તમે જ્યારે ઇચ્છો ત્યારે વેચીને પૈસા સીધા બેંક ખાતામાં મેળવી શકો છો.

કોણ કરી શકે છે ગોલ્ડ ETF માં રોકાણ

કોઈપણ વ્યક્તિ જે સોનું ખરીદી શકે છે, તે ગોલ્ડ ETF પણ ખરીદી શકે છે. જોકે, ગોલ્ડ ETF માં રોકાણ માટે 3in1 એકાઉન્ટ સેટઅપ હોવું જરૂરી છે.

ગોલ્ડ ETFમાં રોકાણ કરવાની સ્ટેપ બાય સ્ટેપ પ્રોસેસ

તમે Zerodha, Groww, Angel One, Upstox વગેરે જેવા કોઈપણ રજિસ્ટર્ડ બ્રોકરની એપ કે વેબસાઇટનો ઉપયોગ કરીને 5 મિનિટમાં રોકાણ શરૂ કરી શકો છો.

• બ્રોકિંગ એપ પર એકાઉન્ટ બનાવો: મનપસંદ બ્રોકર એપ ડાઉનલોડ કરો અને KYC પ્રક્રિયા પૂર્ણ કરો. આ માટે પાન કાર્ડ, ઓળખ/સરનામાનો પુરાવો અને બેંક વિગતોની જરૂર પડે છે.
• વોલેટમાં ફંડ ઉમેરો: તમારા લિંક કરેલા બેંક ખાતામાંથી UPI અથવા નેટ બેંકિંગ દ્વારા બ્રોકિંગ એપના વોલેટમાં પૈસા ટ્રાન્સફર કરો.
• મનપસંદ ગોલ્ડ ETF શોધો: સર્ચ બારમાં Gold ETF ટાઈપ કરો. તમારી સામે ટોપ રેટેડ ETF દેખાશે, જેમ કે Nippon India ETF Gold BeES, HDFC Gold ETF, SBI Gold ETF, ICICI Prudential Gold ETF.
• બાય ઓર્ડર સબમિટ કરો: ETF સિલેક્ટ કરીને Buy બટન દબાવો. યુનિટ્સની સંખ્યા પસંદ કરો. તરત ખરીદવા માટે Market Price અથવા મનપસંદ ભાવ માટે Limit Price સેટ કરીને ઓર્ડર પ્લેસ કરો.

ગોલ્ડ ETFમાં બે રીતે રોકાણ કરી શકાય છે

તમે તમારી નાણાકીય ક્ષમતા અનુસાર આ બે રીતે રોકાણ શરૂ કરી શકો છો.

• એકસાથે (Lump Sum): જ્યારે પૂરતું ફંડ હોય, ત્યારે એક જ વારમાં ઘણા યુનિટ્સ એકસાથે ખરીદી લો. જ્યારે બજારમાં ઘટાડો હોય અને તમે મોટું ફંડ રોકવા માંગતા હો.
• SIP (Systematic Investment Plan): દર મહિને એક નિશ્ચિત તારીખે 1 કે 2 યુનિટ્સ નિયમિતપણે ખરીદતા રહો. નાના રોકાણકારો માટે, જેઓ કોસ્ટ એવરેજિંગનો લાભ મેળવવા માંગે છે.

ધ્યાનમાં રાખવા જેવી બાબતો

• બ્રોકરેજ અને સરકારી શુલ્ક: ટ્રાન્ઝેક્શન દરમિયાન બ્રોકરનો નોમિનલ બ્રોકરેજ ચાર્જ અને નિયમ મુજબ STT/GST લાગુ પડે છે.
• એક્સપેન્સ રેશિયો: ફંડ હાઉસ ETF મેનેજમેન્ટ માટે વાર્ષિક આશરે 0.5% થી 1% ફી ચાર્જ લે છે, જે NAV માં જ એડજસ્ટ થયેલો હોય છે.
• કેપિટલ ગેઇન્સ ટેક્સ: ગોલ્ડ ETF વેચવાથી મળતા રિટર્ન પર રોકાણકારના વર્તમાન ઇનકમ ટેક્સ સ્લેબ અનુસાર ટેક્સ લાગુ પડે છે.

નોંધ: આ રોકાણની સલાહ નથી. કોઈ પણ પ્રકારનું રોકાણ કરતાં પહેલાં નિષ્ણાંતની સલાહ લો.

———————————

આ સમાચાર પણ વાંચો:

શેરબજાર હવે 23 કલાક ખુલ્લું રહેશે!:રાત્રે એક કલાકનો બ્રેક, નાસ્ડેકે શરૂ કરી તૈયારી; જાણો રોકાણકારોને ક્યારથી મળશે નવી સુવિધા

દુનિયાની કેટલીક મોટી ટેક કંપનીઓના શેર્સને ટ્રેક કરનાર નાસ્ડેકે એવી યોજના તૈયાર કરી છે જેનાથી દિવસના 24 માંથી 23 કલાક ટ્રેડિંગ થઈ શકશે. સીએનબીસી-ટીવીના રિપોર્ટ અનુસાર નાસ્ડેકની યોજના રાત્રે 9 વાગ્યાથી સવારે 4 વાગ્યા સુધી ET (ઈસ્ટર્ન ટાઈમ ઝોન) નવું ઓવરનાઈટ ટ્રેડિંગ સેશન શરૂ કરવાની છે.

જો આ યોજના હેઠળ ટ્રેડિંગ શરૂ થાય છે તો નાસ્ડેક સ્ટોક માર્કેટમાં અઠવાડિયામાં પાંચ દિવસ લગભગ દરરોજ 23 કલાક ટ્રેડિંગ શક્ય બનશે. નવું સેશન હાલમાં 6 ડિસેમ્બર 2026 થી શરૂ થવાની અપેક્ષા છે. વાંચો સંપૂર્ણ સમાચાર…

દિવ્ય ભાસ્કરને Google પર મનપસંદ સોર્સ બનાવો