હોર્મુઝ સ્ટ્રેટમાં 21 ભારતીય નાવિકોવાળા એક કન્ટેનર જહાજ પર ઈરાની નૌકાઓએ ફાયરિંગ કર્યું હતું. આ ઘટના 22 એપ્રિલે બની હતી. ભારતીય નાવિકોના સંગઠને હવે આ ઘટનાનો વીડિયો જાહેર કર્યો છે.

વીડિયોમાં ઈરાની રિવોલ્યુશનરી ગાર્ડ્સ (IRGC) સાથે સંકળાયેલી નૌકાઓને જહાજની આસપાસ જોઈ શકાય છે. જહાજ પર ફાયરિંગ બાદ કાચ તૂટેલા અને સામાન વેરવિખેર થયેલો દેખાય છે. એક જગ્યાએ રોકેટ-પ્રોપેલ્ડ ગ્રેનેડ છોડવામાં આવ્યા હોવાનું દૃશ્ય પણ દેખાય છે.

હુમલા દરમિયાન જહાજના ક્રૂ પોતાનો જીવ બચાવવા માટે અંદર સંતાઈ ગયા હતા. જહાજ પર 21 ભારતીય નાવિકો સવાર હતા અને બધા સુરક્ષિત રહ્યા.

જુઓ વીડિયો…

જુઓ ફોટોઝ…

હુમલા બાદ જહાજના કંટ્રોલ રૂમના ફ્લોર પર સામાન વેરવિખેર થયેલો દેખાઈ રહ્યો છે.

ફુટેજમાં જહાજની સામેથી IRGCની સ્પીડ બોટ્સ પસાર થતી દેખાઈ રહી છે.

તસવીરમાં જહાજના નાવિક હુમલાથી બચવા માટે સંતાયેલાં દેખાઈ રહ્યા છે.

તસવીર ઈરાની ફાસ્ટ બોટ પર હાજર IRGCના ઉગ્રવાદીની છે. તેણે હાથમાં રોકેટ લોન્ચર ગન પકડી રાખી છે.

હોર્મુઝમાં ભારતીય નાવિકોની તૈનાતી પર રોક લગાવી ચૂકી છે સરકાર

ખાડી ક્ષેત્રમાં વધતા સુરક્ષા ખતરા વચ્ચે ભારતે 16 જુલાઈએ હોર્મુઝ સ્ટ્રેટમાંથી પસાર થતા જહાજો પર ભારતીય નાવિકોની નવી તૈનાતી પર રોક લગાવી દીધી હતી. આ રોક આગામી આદેશ સુધી લાગુ છે.

આ નિર્ણય એવા સમયે લેવામાં આવ્યો હતો, જ્યારે હોર્મુઝ સ્ટ્રેટ અને આસપાસના વિસ્તારોમાં થયેલા હુમલાઓમાં ભારતીય નાવિકોના મોત થયા હતા. રિપોર્ટ્સ અનુસાર, 28 ફેબ્રુઆરીથી અત્યાર સુધી આ ક્ષેત્રમાં થયેલા હુમલાઓમાં ઓછામાં ઓછા 14 ભારતીય નાવિકોના જીવ ગયા છે.

ભારતે જહાજ માલિકો, જહાજ મેનેજમેન્ટ કંપનીઓ અને નાવિકોની ભરતી કરતી RPSL કંપનીઓને અરબની ખાડી, હોર્મુઝ સ્ટ્રેટ અને આસપાસના દરિયાઈ વિસ્તારોમાં વધારાની સતર્કતા રાખવાના નિર્દેશ આપ્યા હતા.

આ રોક ભારતીય નાવિકોની નવી તૈનાતી પર છે. ભારતની બહારથી વિદેશી શિપિંગ કંપનીઓ દ્વારા ભરતી કરાયેલા નાવિકો પર આ આદેશ સીધો લાગુ પડશે નહીં.

સોમાલિયા નજીક 6 ભારતીયોવાળું જહાજ હાઈજેક

સોમાલિયાના પંટલેન્ડ તટ નજીક એક કાર્ગો જહાજને દરિયાઈ લૂંટારાઓએ હાઈજેક કરી લીધું. કેમરૂનના ધ્વજવાળા M/V LUTUFમાં 10 લોકો સવાર હતા, જેમાં 6 ભારતીયો, 1 તુર્કી નાગરિક, 1 જ્યોર્જિયન અને 2 સર્બિયન સુરક્ષા ગાર્ડ સામેલ હતા.

જહાજને 17 ઓગસ્ટે ઈયલ જિલ્લામાં મારાયાથી લગભગ 3.5 નોટિકલ માઈલ દૂર કબજે કરવામાં આવ્યું. લૂંટારાઓ તેને નૂગાલ તટ તરફ લઈ ગયા. જહાજ પર મોગાદિશુના તુર્કી સૈન્ય પ્રશિક્ષણ કેન્દ્ર માટે હથિયારો, સંચાર અને સેટેલાઇટ ઉપકરણો હતા.

સોમાલી અધિકારી અનુસાર, 8 દરિયાઈ લૂંટારાઓએ જહાજ પર કબજો કર્યો. બાદમાં બે તુર્કી જહાજો પહોંચ્યા અને હેલિકોપ્ટર-ડ્રોનથી દેખરેખ શરૂ થઈ.

મંગળવારે જહાજ પાસે એક નાની બોટ પહોંચી. તેના પાછા ફર્યા બાદ થયેલા હવાઈ હુમલામાં 4 લોકો માર્યા ગયા અને 2 ઘાયલ થયા. જોકે, તે સ્પષ્ટ નથી કે હુમલો કોણે કર્યો અને માર્યા ગયેલા લોકો હાઈજેકમાં સામેલ હતા કે નહીં. જહાજ અને ક્રૂની વર્તમાન સ્થિતિની જાણકારી પણ સ્પષ્ટ નથી.

હૂતી હુમલામાં માર્યા ગયેલા 2 પાકિસ્તાની નાવિકોના મૃતદેહ કરાચી પહોંચ્યા

હૂતી હુમલામાં માર્યા ગયેલા 2 પાકિસ્તાની નાવિકોના મૃતદેહ ગુરુવારે કરાચી પહોંચી ગયા. હુમલામાં ઘાયલ થયેલા 6 પાકિસ્તાની નાવિકો પણ સુરક્ષિત પાકિસ્તાન પરત ફર્યા છે.

11 ઑગસ્ટના રોજ તાંઝાનિયાના ધ્વજવાળા ‘તિહામા’ જહાજ પર બાબ-અલ-મંદેબ સ્ટ્રેટમાં હુતીઓએ હુમલો કર્યો હતો. જેમાં 3 પાકિસ્તાની અને 1 ઇન્ડોનેશિયન નાવિકનાં મોત થયા હતા.

બે ઘાયલ નાવિક અને બંને મૃત નાવિકોના મૃતદેહ સાઉદી એરલાઇન્સની ફ્લાઇટથી કરાચી પહોંચ્યા, જ્યારે બાકીના 4 ઘાયલ PIAની ફ્લાઇટથી પાછા ફર્યા. પાકિસ્તાનના વિદેશ મંત્રી ઇશાક ડારે હુમલાની નિંદા કરી અને કહ્યું કે દરિયાઈ નાવિકોની સુરક્ષા કોઈપણ ભોગે સુનિશ્ચિત થવી જોઈએ.

દિવ્ય ભાસ્કરને Google પર મનપસંદ સોર્સ બનાવો