સેમિફાઈનલમાં પહોંચ્યા બાદ ઉજવણી કરતી વખતે ત્રિસા જોલી (જમણે) અને ગાયત્રી ગોપીચંદ (ડાબે).

બેડમિન્ટન વર્લ્ડ ચેમ્પિયનશીપમાં ત્રિસા જોલી અને ગાયત્રી ગોપીચંદે ઇતિહાસ રચ્યો. ભારતીય જોડીએ શુક્રવારે વુમન્સ ડબલ્સની સેમિફાઈનલમાં સ્થાન મેળવ્યું. ત્રિસા અને ગાયત્રીએ ક્વાર્ટર ફાઈનલમાં વર્લ્ડ નંબર-4 ચીનની જિયા યી ફાન અને ઝાંગ શુ શિયાનને 16-21, 21-15, 21-13થી હરાવ્યા. આ સાથે જ ભારતનો ટુર્નામેન્ટની આ આવૃત્તિમાં એક મેડલ પાક્કો થઈ ગયો છે.

ભારતને વુમન્સ ડબલ્સમાં વર્લ્ડ ચેમ્પિયનશીપ મેડલ માટે 15 વર્ષ રાહ જોવી પડી. આ પહેલા 2011માં જ્વાલા ગુટ્ટા અને અશ્વિની પોનપ્પાની જોડીએ બ્રોન્ઝ મેડલ જીત્યો હતો.

પહેલા ગેમમાં પાછળ રહી, પછી શાનદાર કમબેક કર્યું

ચીનની જોડીએ મેચની શરૂઆત ઝડપી કરી અને ભારતીય જોડીને 4-0થી પાછળ કરી દીધી. ત્રિસા અને ગાયત્રીએ કમબેક કરતા અંતર ઘટાડ્યું, પરંતુ જિયા અને ઝાંગે દબાણ જાળવી રાખ્યું અને પહેલી ગેમ 21-16થી જીતી લીધી.

બીજી ગેમમાં ભારતીય જોડીએ પોતાની રમત સંપૂર્ણપણે બદલી નાખી. સારા ડિફેન્સ, ઝડપી સ્મેશ અને નેટ પર આક્રમક રમતની મદદથી તેમણે મુકાબલા પર પકડ બનાવી. બંને જોડીઓ વચ્ચે સખત મુકાબલો થયો, પરંતુ ત્રિસા-ગાયત્રીએ 21-15થી ગેમ જીતીને સ્કોર 1-1 કરી દીધો.

મેચ દરમિયાન એકબીજા સાથે વાત કરતી ત્રિસા અને ગાયત્રી.

નિર્ણાયક ગેમમાં ચીનને કોઈ તક ન આપી

ત્રીજી ગેમમાં પણ ચીને શરૂઆતમાં લીડ બનાવવાનો પ્રયાસ કર્યો, પરંતુ ભારતીય જોડીએ જલ્દી જ લય મેળવી લીધી. બ્રેક સુધી ત્રિસા-ગાયત્રી 11-5થી આગળ હતી. ત્યારબાદ તેમણે સતત દબાણ જાળવી રાખ્યું અને 21-13થી ગેમ જીતીને મુકાબલો પોતાના નામે કરી લીધો.

આ જીત એટલા માટે પણ ખાસ રહી કારણ કે ત્રિસા અને ગાયત્રી આ પહેલા જિયા યી ફાન અને ઝાંગ શુ શિયાન સામે ત્રણેય મેચ હારી ચૂકી હતી.

જાપાની જોડીને સીધા ગેમમાં હરાવી હતી

ક્વાર્ટર ફાઈનલ પહેલા ત્રિસા અને ગાયત્રીએ રાઉન્ડ ઓફ-16માં જાપાનની 7મી સીડ રિન ઇવાનાગા અને કી નાકાનિશીને સીધા ગેમમાં 21-16, 21-12થી હરાવી હતી.

ત્રિસાની ઈજામાંથી કમબેક બાદ આ જોડી શાનદાર ફોર્મમાં છે. બંને 2022 અને 2023માં સતત બે વર્ષ ઓલ ઇંગ્લેન્ડ ઓપનની સેમિફાઈનલ સુધી પણ પહોંચી ચૂકી છે અને 2022 કોમનવેલ્થ ગેમ્સમાં બ્રોન્ઝ મેડલ જીતી ચૂકી છે.

ભારતે સતત 11 સંસ્કરણોમાં ઓછામાં ઓછો એક મેડલ જીત્યો

ત્રિસા-ગાયત્રીના સેમિફાઈનલમાં પહોંચવા સાથે ભારતની વર્લ્ડ ચેમ્પિયનશીપ મેડલની સંખ્યા 16 થઈ ગઈ છે. જેમાં એક ગોલ્ડ, 4 સિલ્વર અને 11 બ્રોન્ઝ સામેલ છે. ભારત માટે પહેલો મેડલ 1983માં પ્રકાશ પાદુકોણે બ્રોન્ઝના રૂપમાં જીત્યો હતો, જ્યારે એકમાત્ર ગોલ્ડ પીવી સિંધુએ અપાવ્યો છે. ભારતે 2011થી સતત 11 વર્લ્ડ ચેમ્પિયનશીપ એડિશનમાં ઓછામાં ઓછો એક મેડલ જીત્યો છે.

સાત્વિક-ચિરાગથી બીજા મેડલની આશા

ભારત પાસે આ ચેમ્પિયનશીપમાં એક વધુ મેડલ જીતવાની તક છે. સાત્વિકસાઈરાજ રંકીરેડ્ડી અને ચિરાગ શેટ્ટી મેન્સ ડબલ્સના ક્વાર્ટર ફાઈનલમાં ઉતરશે. તેમણે રાઉન્ડ ઓફ-16માં મલેશિયાના જુનૈદી અરિફ અને રોય કિંગ યાપને 21-23, 21-19, 21-17થી હરાવ્યા હતા.

સાત્વિકસાઈરાજ રંકીરેડ્ડી અને ચિરાગ શેટ્ટી મેન્સ ડબલ્સના ક્વાર્ટર ફાઈનલમાં રમશે.

દિવ્ય ભાસ્કરને Google પર મનપસંદ સોર્સ બનાવો