આજના ડિજિટલ યુગમાં બાળકોને મોબાઇલ ફોનથી સંપૂર્ણપણે દૂર રાખવા લગભગ અશક્ય બની ગયું છે. ઓનલાઈન અભ્યાસ, શૈક્ષણિક વીડિયો અને મિત્રો સાથે જોડાવા માટે બાળકોના રોજિંદા જીવનમાં મોબાઈલ એક અનિવાર્ય અંગ બની ગયો છે. જો કે, એકવાર બાળકને ફોન આપવામાં આવે ત્યારે માતા-પિતાની ચિંતાઓ પણ વધી જાય છે. સોશિયલ મીડિયા, અયોગ્ય સામગ્રી, ઓનલાઈન ગેમ્સ અને સાયબર જોખમોથી બાળકોને સુરક્ષિત રાખવા માટે તેમની ડિજિટલ પ્રવૃત્તિઓ પર દેખરેખ રાખવી અત્યંત જરૂરી છે. સારા સમાચાર એ છે કે આ માટે કોઈ મોંઘા સ્પાયવેર કે સોફ્ટવેર ખરીદવાની જરૂર નથી, કારણ કે એન્ડ્રોઇડ અને આઇફોન બંનેમાં શક્તિશાળી પેરેંટલ કંટ્રોલ ટૂલ્સ ઉપલબ્ધ છે.

મોબાઈલ પ્રવૃત્તિનું નિરીક્ષણ કરવાનો હેતુ બાળકોની ગોપનીયતામાં દખલ કરવાનો નથી, પરંતુ તેમને ડિજિટલ જોખમોથી બચાવવાનો અને યોગ્ય માર્ગદર્શન આપવાનો છે. એન્ડ્રોઇડ ફોનમાં આ માટે ‘ગૂગલ ફેમિલી લિંક’નો ઉપયોગ થાય છે, જ્યારે આઇફોનમાં ‘સ્ક્રીન ટાઇમ’ અને ‘ફેમિલી શેરિંગ’ જેવા ફીચર્સ આપવામાં આવ્યા છે.

એન્ડ્રોઇડમાં ગૂગલ ફેમિલી લિંકનો ઉપયોગ કેવી રીતે કરવો?

ગૂગલ ફેમિલી લિંક માતા-પિતાને બાળકના દૈનિક સ્ક્રીન ટાઇમ પર નજર રાખવામાં મદદ કરે છે.

આ ટૂલ દ્વારા બાળક કઈ એપ્લિકેશન પર કેટલો સમય વિતાવે છે તેની માહિતી મળે છે.

તે નવા એપ્લિકેશન ડાઉનલોડ્સ પર નિયંત્રણ રાખવા અને ડિવાઇસનું લોકેશન ટ્રેક કરવાની સગવડ આપે છે.

માતા-પિતા હોમવર્ક કે સૂવાના સમયે બાળકના ફોનને રિમોટલી લોક પણ કરી શકે છે.

આ સુવિધાનો ઉપયોગ કરવા માટે માતા-પિતાએ પોતાના ફોનમાં ગૂગલ ફેમિલી લિંક ઇન્સ્ટોલ કરવાનું રહે છે અને બાળકના ગૂગલ એકાઉન્ટ સાથે તેને કનેક્ટ કરવાનું રહે છે.

આઇફોનમાં પેરેંટલ કંટ્રોલ કેવી રીતે સેટ કરવું?

જો તમારા બાળક પાસે આઇફોન છે, તો તેના સેટિંગ્સમાં જઈને ‘સ્ક્રીન ટાઇમ’ વિકલ્પ પસંદ કરો. ‘આ મારા બાળકનો આઇફોન છે’ તેવું સિલેક્ટ કરીને એક પાસકોડ બનાવો. આના દ્વારા તમે એપ મર્યાદાઓ, ડાઉનટાઇમ અને કન્ટેન્ટ ફિલ્ટર્સ સેટ કરી શકો છો, જેથી બાળક અયોગ્ય વેબસાઇટ્સ કે એપ્સથી દૂર રહે. આ પદ્ધતિઓ અપનાવીને માતા-પિતા પોતાના ઘરમાં આરામથી બેસીને બાળકના ડિજિટલ ઉપયોગને સુરક્ષિત અને નિયંત્રિત બનાવી શકે છે.

આ પણ વાંચોઃ  Champu Khangpok: જમીન નહીં પાણી પર વસેલું છે આ સુંદર ગામ, ચાલતા પણ હલવા માંડે છે ધરતી!