જાહ્નવી કપૂર સંબંધિત અશ્લીલ અને વાંધાજનક ઓનલાઈન કન્ટેન્ટના મામલે દિલ્હી હાઈકોર્ટે મોટો ચુકાદો આપ્યો છે. કોર્ટે 552 URLમાંથી આવું કન્ટેન્ટ હટાવવાનો આદેશ આપ્યો છે, જેમાં એક્ટ્રેસની ઓળખ અને તસવીરોનો કથિત રીતે અશ્લીલ ઉપયોગ કરવામાં આવ્યો હતો.

જોકે, કોર્ટે લગભગ 6,884 URLને એકસાથે હટાવવાની માંગ સ્વીકારી ન હતી. જસ્ટિસ અનૂપ જયરામ ભંભાણીએ કહ્યું કે, અલગ-અલગ પ્રકારના કન્ટેન્ટ પર એકસરખો આદેશ આપી શકાય નહીં. કોર્ટે સ્પષ્ટ કર્યું કે, માત્ર કોઈ સેલિબ્રિટીના નામ કે તસવીરવાળા દરેક ફેન પેજને ગેરકાયદેસર માની શકાય નહીં.

જાહ્નવી કપૂરે 11 ઓગસ્ટ 2026ના રોજ દિલ્હી હાઈકોર્ટમાં 6,884 URL હટાવવાની માંગ કરી હતી.

552 URL પર કોર્ટે ટેકડાઉનનો આદેશ આપ્યો

ટાઈમ્સ નાઉ નવભારતના રિપોર્ટ અનુસાર, જાહ્નવી કપૂરે પોતાના પર્સનાલિટી રાઈટ્સ સંબંધિત મામલામાં ઈન્ટરનેટ પર ઉપલબ્ધ લગભગ 6,884 URL સામે કાર્યવાહીની માંગ કરી હતી. આમાં કથિત અશ્લીલ કન્ટેન્ટ ઉપરાંત તસવીરો અને ઓળખના ખોટા ઉપયોગ સંબંધિત મામલાઓ પણ સામેલ હતા.

દિલ્હી હાઈકોર્ટે શરૂઆતમાં 552 URL પર ઉપલબ્ધ સામગ્રીને અત્યંત અશ્લીલ અથવા પોર્નોગ્રાફિક માની અને તેને હટાવવાનો નિર્દેશ આપ્યો. કોર્ટે માન્યું કે આ કન્ટેન્ટ ઓનલાઈન રહેવાથી એક્ટ્રેસને ભરપાઈ ન થઈ શકે તેવું નુકસાન થઈ શકે છે. લાઈવ લો અનુસાર, કોર્ટે આ 552 URLના સંબંધમાં જાહ્નવીનો પ્રથમ દ્રષ્ટિએ કેસ મજબૂત જણાયો અને વચગાળાની રાહતને યોગ્ય ગણી.

6,884 URL પર એકસાથે આદેશ આપવાનો ઇનકાર

કોર્ટે જાહ્નવી કપૂરની તમામ 6,884 URLને એકસાથે હટાવવાની માંગ સ્વીકારી નહીં. અદાલતે કહ્યું કે આટલી મોટી સંખ્યામાં URL અલગ-અલગ પ્રકારના કન્ટેન્ટ સાથે સંકળાયેલા છે, તેથી બધા પર એકસરખો બ્લેન્કેટ ટેકડાઉન આદેશ આપવો યોગ્ય રહેશે નહીં.

કોર્ટે વિવાદાસ્પદ ઓનલાઈન સામગ્રીને અલગ-અલગ શ્રેણીઓમાં જોવાની જરૂરિયાત જણાવી. પ્રથમ શ્રેણીમાં અશ્લીલ અથવા પોર્નોગ્રાફિક કન્ટેન્ટ, બીજીમાં એક્ટ્રેસના પર્સનાલિટી રાઇટ્સથી સીધી કમાણી કરતું કન્ટેન્ટ અને ત્રીજીમાં તેમના નામ કે ઓળખનો ઉપયોગ કરીને પરોક્ષ રીતે કોઈ પ્રોડક્ટ કે સર્વિસને પ્રોત્સાહન આપતી સામગ્રીનો સમાવેશ થાય છે.

ફેન પેજને લઈને કોર્ટે શું કહ્યું?

કોર્ટે સ્પષ્ટ કર્યું કે કોઈ સેલિબ્રિટીના નામથી ચાલતું દરેક ફેન પેજ આપમેળે ગેરકાનૂની નથી બની જતું. આવા પેજ પર કલાકારની તસવીરો, વીડિયો, ફિલ્મો સંબંધિત માહિતી, પ્રશંસા કે ટીકા જેવી સામગ્રી હોઈ શકે છે.

રિપોર્ટ્સ અનુસાર, કોર્ટે આ જ આધાર પર તમામ ફેન પેજ અને URLs હટાવવાની માંગ સ્વીકારી ન હતી. જોકે, જો કોઈ એકાઉન્ટ અશ્લીલ સામગ્રી પોસ્ટ કરે છે અથવા સેલિબ્રિટીની ઓળખનો ઉપયોગ કરીને વ્યાવસાયિક લાભ મેળવે છે, તો તેની સામે કાર્યવાહી કરી શકાય છે.

AI અને ડીપફેક કન્ટેન્ટ પણ મુદ્દો બન્યો હતો

આ મામલામાં સામાન્ય ઓનલાઈન પોસ્ટ ઉપરાંત AI દ્વારા બનાવેલી તસવીરો, ડીપફેક અને એક્ટ્રેસની ઓળખનો ઉપયોગ કરતા એકાઉન્ટ્સ સંબંધિત મુદ્દાઓ પણ સામે આવ્યા હતા. કોર્ટે વાંધાજનક અને અશ્લીલ સામગ્રીને બાકીના કન્ટેન્ટથી અલગ કરીને જોવાનો નિર્ણય કર્યો.

દિવ્ય ભાસ્કરને Google પર મનપસંદ સોર્સ બનાવો