પાકિસ્તાન ક્રિકેટ ટીમ ઇંગ્લેન્ડ સામે લીડ્સ ટેસ્ટના પહેલા જ દિવસે બેકફૂટ પર છે. તેણે પ્રથમ ઇનિંગ્સમાં 171 રન બનાવ્યા. બુધવારે દિવસની રમત સમાપ્ત થઈ ત્યાં સુધીમાં ઇંગ્લેન્ડે તેની પ્રથમ ઇનિંગ્સમાં 2 વિકેટે 112 રન બનાવી લીધા છે. કેપ્ટન જો રૂટ 37 અને જોર્ડન કોક્સ 23 રન બનાવી અણનમ પાછા ફર્યા છે. ઓપનર બેન ડકેટે 15 અને ઇમિલિયો ગેએ 33 રન બનાવ્યા. મોહમ્મદ અબ્બાસ અને મોહમ્મદ અલીને એક-એક વિકેટ મળી. પાકિસ્તાને પ્રથમ બોલ પર વિકેટ ગુમાવી પાકિસ્તાનની શરૂઆત ખરાબ રહી. ટીમે પહેલા જ બોલ પર વિકેટ ગુમાવી દીધી. જ્યારે ઓલી રોબિન્સને ફુલર લેન્થના બોલ પર અઝાન અવેસને ઝીરો પર LBW આઉટ કર્યો. તેની જગ્યાએ બેટિંગ કરવા ઉતરેલા કેપ્ટન શાન મસૂદ પણ 5 રન બનાવીને પેવેલિયન પરત ફર્યો. તેને પણ રોબિન્સને LBW આઉટ કર્યો. લંચ બ્રેક સુધી પાકિસ્તાનનો સ્કોર 23/2 રહ્યો. જોકે, વરસાદને કારણે ઘણી વાર સુધી રમતને રોકવી પડી હતી. બીજા સેશનમાં 5 બેટર્સ આઉટ, શફીકની ફિફ્ટી વરસાદને કારણે પરત ફરેલી પાકિસ્તાની ટીમ તરફથી અબ્દુલ્લા શફીકે ફિફ્ટી ફટકારી. જ્યારે, ઓપનર ઇમામ ઉલ હકે 42 રન જોડ્યા. બંનેએ 91 રનની ભાગીદારી કરી. આ ભાગીદારીને ઓલી રોબિન્સને તોડી. તેણે શફીકને બોલ્ડ કર્યો. શફીકના આઉટ થયા બાદ ટીમની હાલત વધુ ખરાબ થઈ ગઈ. તેણે ટી-બ્રેક સુધીમાં 150 રનના સ્કોર પર 7 વિકેટ ગુમાવી દીધી હતી. પ્રથમ દિવસના બીજા સેશનમાં પાકિસ્તાની ટીમે 127 રન બનાવવામાં 5 વિકેટ ગુમાવી. છેલ્લા સેશનમાં ટીમને ઓલઆઉટ થવામાં સમય ન લાગ્યો. ઓલી રોબિન્સન અને જોશ ટંગે 5-5 વિકેટ ઝડપી.