આજના સમયમાં સ્માર્ટફોન આપણા જીવનનો મહત્વનો ભાગ બની ગયો છે. ફોટો પાડવાથી લઈને વીડિયો કોલ અને અનેક જરૂરી કામો સુધી, આપણે દરરોજ ફોનના કેમેરાનો ઉપયોગ કરીએ છીએ. આવી સ્થિતિમાં સવાલ થાય છે કે શું કોઈ અન્ય વ્યક્તિ છુપાઈને આપણા ફોનના કેમેરા સુધી પહોંચ બનાવી રહી છે? જો ફોનમાં કોઈ ખોટી એપ અથવા જોખમી સોફ્ટવેર આવી જાય, તો તે કેમેરાની પરવાનગીનો દુરુપયોગ કરી શકે છે. જોકે ફોનમાં થતી દરેક સમસ્યાનો અર્થ હેકિંગ નથી. તેમ છતાં, જો કેટલાક ફેરફારો સતત જોવા મળે તો તેની તપાસ કરવી જરૂરી છે.

ફોનનો કેમેરા કેવી રીતે હેક થઈ શકે?

ઘણી વખત લોકો અજાણી વેબસાઇટ પરથી એપ ડાઉનલોડ કરી લે છે અથવા કોઈ શંકાસ્પદ મેસેજમાં આવેલી લિંક પર ક્લિક કરી દે છે. કેટલીક ખોટી એપ્સ કેમેરા અને માઇક્રોફોન જેવી સુવિધાઓની પરવાનગી માંગે છે. જો આવી કોઈ એપને કેમેરાની પરવાનગી મળી જાય, તો તે તેનો દુરુપયોગ કરવાનો પ્રયાસ કરી શકે છે. તેથી કોઈપણ અજાણી એપને વિચાર્યા વગર પરવાનગી આપવી યોગ્ય નથી.

કારણ વગર કેમેરાનું લીલું નિશાન દેખાવું

આજકાલ ઘણા ફોનમાં કેમેરા અથવા માઇક્રોફોન ચાલુ થાય ત્યારે સ્ક્રીન પર લીલા રંગનું નાનું નિશાન દેખાય છે. જો તમે કેમેરા કે વીડિયો કોલ શરૂ કર્યો ન હોય અને તેમ છતાં આ નિશાન વારંવાર દેખાય, તો કેમેરાની પરવાનગી ધરાવતી એપ્સની તપાસ કરો. જોકે ક્યારેક સામાન્ય એપ અથવા ફોનની ટેક્નિકલ સમસ્યાને કારણે પણ આવું થઈ શકે છે.

કેમેરા ખોલતી વખતે વિચિત્ર મેસેજ આવવો

જો કેમેરા ખોલતી વખતે ફોનમાં એવું દેખાય કે કેમેરાનો ઉપયોગ પહેલેથી જ કોઈ અન્ય એપ કરી રહી છે, તો ધ્યાન આપવું જરૂરી છે. પહેલા તાજેતરમાં ખોલેલી તમામ એપ્સ બંધ કરો અને ત્યારબાદ ફરી કેમેરા ખોલીને જુઓ. જો આ સમસ્યા વારંવાર આવે, તો કેમેરાની પરવાનગી ધરાવતી એપ્સ તપાસો.

ગેલેરીમાં અજાણ્યા ફોટા કે વીડિયો મળવા

જો ફોનની ગેલેરીમાં એવા ફોટા કે વીડિયો જોવા મળે જે તમે પોતે બનાવ્યા નથી, તો તેની પાછળનું કારણ જાણવાનો પ્રયાસ કરો. શક્ય છે કે અન્ય કોઈ વ્યક્તિએ ફોનથી ફોટો પાડ્યો હોય અથવા કોઈ એપ આપમેળે તસવીર સેવ કરી રહી હોય. પરંતુ જો આવી ફાઇલો કોઈ કારણ વગર વારંવાર જોવા મળે, તો ફોનની સુરક્ષા તપાસવી વધુ સારું છે.

ફોન ગરમ થવો અથવા બેટરી ઝડપથી ખતમ થવી

જો ફોનનો ઉપયોગ કર્યા વગર પણ તે ગરમ રહે અથવા બેટરી અગાઉની સરખામણીમાં ઝડપથી ખતમ થવા લાગે, તો કોઈ એપ બેકગ્રાઉન્ડમાં સતત ચાલી રહી હોવાની શક્યતા છે. ફોનની બેટરી સેટિંગ્સમાં જઈને તપાસો કે કઈ એપ સૌથી વધુ બેટરીનો ઉપયોગ કરી રહી છે. જો કોઈ અજાણી એપ વધારે બેટરી વાપરતી હોય, તો તેની તપાસ કરવી જોઈએ.

ફોનને સુરક્ષિત કેવી રીતે રાખવો?

સૌથી પહેલા ફોનની સેટિંગ્સમાં જઈને કેમેરાની પરવાનગી ધરાવતી એપ્સ તપાસો. જે એપ્સને કેમેરાની જરૂર નથી, તેમની પરવાનગી દૂર કરી દો. જે એપ્સ ઓળખમાં આવતી નથી અથવા જેની જરૂર નથી, તેને ડિલીટ કરો ફોન અને એપ્સને સમયાંતરે અપડેટ કરતા રહો. અજાણી વેબસાઇટ પરથી એપ ડાઉનલોડ ન કરો અને શંકાસ્પદ લિંક પર ક્લિક કરવાથી બચો. ધ્યાનમાં રાખો કે માત્ર લીલું નિશાન દેખાવું, ફોન ગરમ થવો અથવા બેટરી ઝડપથી ખતમ થવી એ વાતનો પુરાવો નથી કે ફોન હેક થઈ ગયો છે. પરંતુ જો એકસાથે અનેક સંકેતો જોવા મળે, તો ફોનની સુરક્ષાની તપાસ કરવી જરૂરી છે.

વધુ સમાચાર વાંચવા ડાઉનલોડ કરો સંદેશ ન્યૂઝ એપ