ઓસ્ટ્રેલિયાએ ઝિમ્બાબ્વે અને સાઉથ આફ્રિકાના પ્રવાસ માટે 17 સભ્યોની ટીમ જાહેર કરી છે. ખરાબ ફોર્મ સામે ઝઝૂમી રહેલા માર્નસ લાબુશેનને ટીમમાં સ્થાન મળ્યું નથી. જ્યારે જોએલ ડેવિસને પહેલીવાર વન-ડે ટીમમાં પસંદ કર્યો છે. મિચેલ માર્શ અને ટ્રેવિસ હેડની વાપસી થઈ છે, જ્યારે પેટ કમિન્સ અને મિચેલ સ્ટાર્ક સાઉથ આફ્રિકા સામેની વન-ડે સિરીઝમાં ટીમ સાથે જોડાશે. લાબુશેને 2023 વન-ડે વર્લ્ડ કપ ફાઇનલમાં અડધી સદી ફટકારી લાબુશેન લાંબા સમયથી ઓસ્ટ્રેલિયાની વન-ડે ટીમનો ભાગ રહ્યા છે. તેણે 2023 વન-ડે વર્લ્ડ કપની ફાઇનલમાં ભારત સામે અણનમ અડધી સદી ફટકારીને ટીમને જીત અપાવવામાં મહત્વની ભૂમિકા ભજવી હતી. જોકે, વર્તમાન ફોર્મને જોતા તેને આ પ્રવાસ માટે ટીમમાં સામેલ કર્યો નથી. લાબુશેને છેલ્લી 18 વન-ડે ઇનિંગ્સમાં 21.87ની સરેરાશથી રન બનાવ્યા છે. જોએલ ડેવિસને પહેલીવાર વન-ડે ટીમમાં સ્થાન ઓલરાઉન્ડર જોએલ ડેવિસને પહેલીવાર ઓસ્ટ્રેલિયાની વન-ડે ટીમમાં પસંદ કર્યો છે. તેણે જૂનમાં બાંગ્લાદેશ સામે ઓસ્ટ્રેલિયા માટે આંતરરાષ્ટ્રીય ક્રિકેટમાં ડેબ્યૂ કર્યું હતું. યુવા ઓલી પીક પણ ટીમમાં પોતાની જગ્યા જાળવી રાખવામાં સફળ રહ્યો છે. કૂપર કોનોલીને પણ ટીમમાં જાળવી રાખ્યો છે. સિલેક્ટર જ્યોર્જ બેલીએ કહ્યું કે ઝિમ્બાબ્વે અને સાઉથ આફ્રિકામાં યોજાનારી 6 મેચની સિરીઝ આવતા વર્ષના વર્લ્ડ કપની તૈયારીની દ્રષ્ટિએ મહત્વપૂર્ણ છે. 2027નો વન-ડે વર્લ્ડ કપ સાઉથ આફ્રિકા, ઝિમ્બાબ્વે અને નામિબિયામાં રમાવાનો છે. ઝિમ્બાબ્વેમાં માર્શ, સાઉથ આફ્રિકામાં કમિન્સ કેપ્ટન ઝિમ્બાબ્વે સામેની ત્રણ વન-ડે મેચમાં માર્શ ટીમની કેપ્ટનશીપ કરશે. નિયમિત કેપ્ટન પેટ કમિન્સ સાઉથ આફ્રિકા સિરીઝમાં ટીમ સાથે જોડાશે. જોકે, કમિન્સે સંકેત આપ્યો છે કે તે સાઉથ આફ્રિકાની તમામ ત્રણ વન-ડે નહીં રમે, આવી સ્થિતિમાં માર્શ ફરીથી આગેવાનીની જવાબદારી સંભાળી શકે છે. સ્ટાર્ક પણ સાઉથ આફ્રિકા સિરીઝમાં વન-ડે ટીમમાં કમબેક કરશે. જોશ હેઝલવુડ બંને સિરીઝ માટે ટીમમાં છે. સ્પેન્સર જોન્સન પણ એક વર્ષથી વધુ સમય પછી વન-ડે ક્રિકેટમાં વાપસી કરશે, જ્યારે બિલી સ્ટેનલેકને પણ ઝડપી બોલિંગ આક્રમણમાં સામેલ કર્યો છે. 15 સપ્ટેમ્બરથી ઝિમ્બાબ્વેમાં સિરીઝ ઓસ્ટ્રેલિયા અને ઝિમ્બાબ્વે વચ્ચે ત્રણ વન-ડે 15, 18 અને 20 સપ્ટેમ્બરે હરારેમાં રમાશે. આ પછી સાઉથ આફ્રિકામાં 24 સપ્ટેમ્બરે ડરબન, 27 સપ્ટેમ્બરે જોહાનિસબર્ગ અને 30 સપ્ટેમ્બરે પોટચેફસ્ટ્રૂમમાં ત્રણ વન-ડે રમાશે. આ પછી ઓસ્ટ્રેલિયાને સાઉથ આફ્રિકા સામે ત્રણ ટેસ્ટ મેચ રમવાની છે. પ્રથમ ટેસ્ટ 9 ઓક્ટોબરથી ડરબનમાં શરૂ થશે. ઓસ્ટ્રેલિયાની વન-ડે ટીમ ઝેવિયર બાર્ટલેટ, એલેક્સ કેરી, કૂપર કોનોલી, પેટ કમિન્સ (સાઉથ આફ્રિકા સિરીઝ), જોએલ ડેવિસ, નાથન એલિસ, કેમરૂન ગ્રીન, જોશ હેઝલવુડ, ટ્રેવિસ હેડ, જોશ ઇંગ્લિસ, સ્પેન્સર જોન્સન, મિચેલ માર્શ, ઓલી પીક, મેથ્યુ રેનશો, બિલી સ્ટેનલેક, મિચેલ સ્ટાર્ક (સાઉથ આફ્રિકા સિરીઝ), એડમ ઝામ્પા.