ઇંગ્લિશ ક્લબ હેમ્પશાયર ક્રિકેટે બળાત્કાર કેસમાં નિર્દોષ છૂટેલા ઓલરાઉન્ડર સ્કોટ કુગલેઇનને ન રમાડવાનો નિર્ણય કર્યો છે. ચાહકોએ ન્યુઝીલેન્ડના આ ખેલાડીને કાઉન્ટી ચેમ્પિયનશિપ માટે ટીમમાં સામેલ કરવાનો વિરોધ કર્યો હતો. 34 વર્ષીય કુગલેઇનને વોરવિકશાયર સામેની મેચ પહેલા હેમ્પશાયરની 15 સભ્યોની ટીમમાં સામેલ કરવામાં આવ્યા હતા. જોકે, તે સમયે ક્લબે વિદેશી ખેલાડી તરીકે તેમના આગમનની ઔપચારિક જાહેરાત કરી ન હતી. ચાહકોના વિરોધ બાદ ક્લબે નિર્ણય બદલ્યો. ઘણા ચાહકોએ કુગલેઇનને ટીમમાં સામેલ કરવાને ‘શરમજનક’, ‘ખૂબ જ ખોટું’ અને ‘ક્લબ માટે નવી પડતી’ ગણાવ્યું હતું. હેમ્પશાયરે આ પોસ્ટ દ્વારા કુગલેઇનને ન રમાડવાની જાણકારી આપી… હેમ્પશાયરે કહ્યું- કુગલેઇન ક્લબ માટે નહીં રમે વિરોધ બાદ હેમ્પશાયરે X પર નિવેદન જારી કરીને કહ્યું- ‘પોતાના સ્ટાફ અને સમર્થકોની પ્રતિક્રિયાઓ બાદ હેમ્પશાયર ક્રિકેટ પુષ્ટિ કરે છે કે સ્કોટ કુગલેઈન ક્લબ માટે નહીં રમે. અમે અમારા ચાહકોના જુસ્સાને મહત્વ આપીએ છીએ.’ ક્લબે કહ્યું, ‘હવે અમારું ધ્યાન આ સિઝનની કાઉન્ટી ચેમ્પિયનશિપની બાકીની ચાર મેચોમાં ટીમને સમર્થન આપવા પર છે. અમે બધાને ટીમ સાથે એકજૂટ થવાની અપીલ કરીએ છીએ, કારણ કે અમે અભિયાનના મહત્વપૂર્ણ તબક્કામાં પ્રવેશી રહ્યા છીએ.’ 11 વર્ષ પહેલા કુગલેઈન પર 2 આરોપ લાગ્યા હતા, એકમાં નિર્દોષ છૂટ્યા કુગલેઈન પર 2015માં 2 અલગ-અલગ ફરિયાદીઓ સાથે સંકળાયેલા બળાત્કાર દ્વારા જાતીય ઉલ્લંઘન અને અશોભનીય હુમલાના આરોપ લાગ્યા હતા. પહેલા ટ્રાયલમાં જ્યુરી કોઈ નિર્ણય પર પહોંચી શકી ન હતી, જેના પછી બીજા ટ્રાયલમાં તેમને આરોપોમાંથી નિર્દોષ છોડી દેવામાં આવ્યા. નિર્દોષ છૂટ્યા હોવા છતાં, કુગલેઈનને ન્યુઝીલેન્ડ અને સ્થાનિક ટીમોમાં પસંદ કરવા પર પહેલા પણ વિરોધ થયો છે. 2019માં ઈડન પાર્કમાં ચાહકોએ ન્યુઝીલેન્ડની ટીમમાં તેમના સમાવેશના વિરોધમાં પોસ્ટર બતાવ્યા હતા. હેમ્પશાયર ડિવિઝન વનમાં છેલ્લા સ્થાને 2026 કાઉન્ટી ચેમ્પિયનશિપના ડિવિઝન-1ના પોઈન્ટ્સ ટેબલમાં હેમ્પશાયર 10મા અને છેલ્લા સ્થાને છે. ટીમ પર ડિવિઝન-1માંથી રેલિગેટ થવાનો ખતરો છે. બેન બ્રાઉનની ટીમે 10 મેચમાંથી 86 પોઈન્ટ મેળવ્યા છે. તે 9મા સ્થાને રહેલા લીસેસ્ટરશાયરથી 16 પોઈન્ટ પાછળ છે, જ્યારે આઠમા સ્થાને રહેલા સરેથી 19 પોઈન્ટ દૂર છે. હાલમાં આઠમું સ્થાન જ સુરક્ષિત સ્થિતિ છે.