સમાજવાદી પાર્ટીના સાંસદ પ્રિયા સરોજ અને ક્રિકેટર રિંકુ સિંહના લગ્નની તારીખ નક્કી થઈ ગઈ છે. બંને 4 ડિસેમ્બરે લખનઉની રમાડા હોટલમાં લગ્નના બંધનમાં બંધાશે. લગ્નની તારીખ નક્કી થયા બાદથી બંનેના પરિવારો તેની તૈયારીઓમાં લાગી ગયા છે. લગ્નમાં પરિવારના સભ્યો ઉપરાંત નજીકના સંબંધીઓ અને ખાસ મહેમાનો હાજર રહી શકે છે. રિંકુ સિંહ ભારતીય ક્રિકેટ ટીમના જાણીતા ખેલાડીઓમાંના એક છે. જ્યારે, પ્રિયા સરોજ ઉત્તર પ્રદેશના મછલીશહરથી સમાજવાદી પાર્ટીના સાંસદ છે. 8 જૂન, 2025ના રોજ બંનેની સગાઈ થઈ હતી 8 જૂન, 2025ના રોજ ક્રિકેટર રિંકુ સિંહ અને સપા સાંસદ પ્રિયા સરોજની રિંગ સેરેમની લખનઉની ‘ધ સેન્ટ્રમ’ હોટલમાં થઈ હતી. ત્યારે રિંકુ અને પ્રિયા એકબીજાનો હાથ પકડીને હોલમાં પહોંચ્યા હતા. સ્ટેજ પર રિંકુએ પ્રિયાને વીંટી પહેરાવી, ત્યારે તે ભાવુક થઈ ગઈ અને ધ્રુસકે ધ્રુસકે રડી પડી હતી. ત્યારબાદ બંનેએ હાથ ઊંચા કરીને પ્રેમનો ઇઝહાર કર્યો અને સેરેમનીમાં આવેલા લોકોને થેંક્યુ કહ્યું હતું. આ દરમિયાન પ્રિયાએ પિંક લહેંગો પહેર્યો હતો અને રિંકુ વ્હાઇટ શેરવાની પહેર્યા હતા. રિંગ સેરેમનીના સમયે બેકગ્રાઉન્ડમાં શાહરૂખ ખાનની ફિલ્મ ડંકીનું ગીત ઓ માહી, ઓ માહી વાગી રહ્યું હતું. રિંગ સેરેમની પછી રિંકુ અને પ્રિયાએ કેક કાપી અને એકબીજાને ખવડાવી હતી. ત્યારબાદ મહેમાનો અને પરિવારજનો સાથે પ્રિયા-રિંકુએ જબરદસ્ત ડાન્સ કર્યો હતો. સગાઈની તસવીર જુઓ- પ્રિયા-રિન્કુએ એકબીજાને ડિઝાઇનર રિંગ પહેરાવી હતી પ્રિયાએ રિન્કુને કોલકાતાથી મંગાવેલી ડિઝાઇનર રિંગ પહેરાવી, જ્યારે રિન્કુએ પ્રિયાને મુંબઈથી ખરીદેલી ડિઝાઇનર રિંગ પહેરાવી હતી. બંને વીંટીઓની કિંમત 2.5 લાખ રૂપિયા હતી. પ્રિયાનો લહેંગો દિલ્હીની પ્રખ્યાત ફેશન ડિઝાઇનર મહિમા મહાજને અને રિન્કુની શેરવાની મુંબઈના એક ડિઝાઇનરે તૈયાર કરી હતી. અખિલેશ સહિત 300 VIP મહેમાનો હાજર રહ્યા હતા રિંગ સેરેમનીમાં અખિલેશ યાદવ, ડિમ્પલ યાદવ, જયા બચ્ચન, શિવપાલ યાદવ, ઇકરા હસન સહિત 300 વીઆઇપી મહેમાનો હાજર રહ્યા હતા. અખિલેશે બંને સાથે ફોટો પડાવ્યો હતો. સમારોહમાં BCCI ઉપાધ્યક્ષ રાજીવ શુક્લા, પૂર્વ ક્રિકેટર પીયૂષ ચાવલા અને પ્રવીણ કુમાર પણ હાજર રહ્યા હતા. આ ઉપરાંત, બોલર યશ દયાલ પણ સમારોહમાં પહોંચ્યા હતા, જેમની બોલ પર રિંકુએ સતત 5 છગ્ગા ફટકારીને ક્રિકેટમાં સ્ટારડમ હાંસલ કર્યું હતું. ક્રિકેટરના લગ્નમાં પહેલીવાર મળ્યા હતા રિંકુ-પ્રિયા રિંકુ અને પ્રિયાની લવ સ્ટોરી રસપ્રદ છે. વાત લગભગ 3 વર્ષ પહેલાની છે. IPL 2023માં રિંકુએ સતત પાંચ છગ્ગા ફટકારીને કોલકાતા નાઈટ રાઈડર્સને છેલ્લી ઓવરમાં જીત અપાવી હતી. આ પછી રિંકુની ટીમના સિનિયર ક્રિકેટરો સાથે નિકટતા વધી. આ દરમિયાન, એક સિનિયર ક્રિકેટરના દિલ્હીમાં લગ્ન થયા હતા. તે જ સમારોહમાં ક્રિકેટરે રિંકુ અને પોતાની પત્નીની મિત્ર પ્રિયાને બોલાવ્યા. રિંકુ અને પ્રિયા પહેલીવાર આ જ પાર્ટીમાં મળ્યા. ક્રિકેટરની પત્નીએ બંનેનો પરિચય કરાવ્યો અને અહીંથી જ વાતચીત શરૂ થઈ હતી. રિન્કુના પરિવાર સાથે જોડાયેલા એક વ્યક્તિએ જણાવ્યું હતું કે KKRના ક્રિકેટરની પત્ની અને પ્રિયા દિલ્હી યુનિવર્સિટીમાંથી ભણેલાં છે. પ્રિયા સરોજે દિલ્હી યુનિવર્સિટીમાંથી બીએ એલએલબી કર્યું છે. ભણતર દરમિયાન જ બંનેની મિત્રતા થઈ હતી. 25 વર્ષની ઉંમરે સાંસદ બન્યા હતા પ્રિયા સરોજ પ્રિયા સરોજ વારાણસી જિલ્લાના પિંડરા તાલુકાના કરખિયાંવના રહેવાસી છે. તેમનો જન્મ 23 નવેમ્બર 1998ના રોજ થયો હતો. 18 વર્ષની ઉંમર પાર કરતા જ તેમણે સપાની માત્ર સક્રિય સદસ્યતા જ નહોતી લીધી, પરંતુ પાર્ટીના વિવિધ કાર્યક્રમોમાં પણ સક્રિય ભાગીદારી નિભાવે છે. માત્ર 25 વર્ષની ઉંમરે, તેઓ ભાજપના બીપી સરોજને હરાવીને લોકસભા પહોંચવામાં સફળ રહ્યા. પ્રિયા સરોજના પિતા તુફાની સરોજ પણ મછલીશહર લોકસભા બેઠક પરથી ત્રણ વખત સાંસદ રહી ચૂક્યા છે. તેઓ વર્ષ 1999, 2004 અને 2009માં લોકસભા ચૂંટણી જીત્યા હતા. રિંકુના પિતા ગેસ સિલિન્ડર ડિલિવરીનું કામ કરતા હતા KKR ને આપેલા એક ઇન્ટરવ્યુમાં રિંકુએ પોતાના જીવન વિશે વાત કરી હતી. તેમણે જણાવ્યું હતું કે – પરિવારમાં 5 ભાઈઓ છે. પપ્પા સિલિન્ડર ડિલિવરીનું કામ કરતા હતા. અમે પાંચેય ભાઈઓ પાસેથી પણ કામ કરાવતા, જ્યારે કોઈ ન મળતું ત્યારે લાકડીથી મારતા હતા. અમે બધા ભાઈઓ બાઇક પર 2-2 સિલિન્ડર રાખીને હોટલો અને ઘરોમાં ડિલિવર કરવા જતા હતા. બધાએ પપ્પાને પણ સપોર્ટ કર્યો અને જ્યાં પણ મેચ થતી ત્યાં બધા ભાઈઓ એકસાથે જ રમવા જતા હતા. મોહલ્લામાં 6-7 બીજા છોકરાઓ હતા, જેમની સાથે પૈસા ભેગા કરીને બોલ લાવતા. ટેનિસ અને લેધર બોલથી ક્રિકેટ રમવાનું શરૂ કર્યું હતું. યુપીના અલીગઢમાં મોર્ડન સ્કૂલમાંથી પણ ક્રિકેટ રમ્યો. ઇન્ટર સ્કૂલ ટુર્નામેન્ટમાં 32 બોલમાં 54 રનની નોટઆઉટ ઇનિંગ્સ રમી. શરૂઆતમાં ક્લબ ક્રિકેટ રમવાના પૈસા નહોતા, તેથી સરકારી સ્ટેડિયમમાં કાર્ડ બનાવીને પ્રેક્ટિસ કરતો હતો. મેચ રમવા માટે પૈસા લાગતા, ઘરવાળા પાસે માંગો તો કહેતા કે ભણાઈ કર. પપ્પા રમવા માટે હંમેશા ના પાડતા હતા, મમ્મી થોડો સપોર્ટ કરતી હતી. શહેર પાસે એક ટુર્નામેન્ટ થઈ, તેના માટે પૈસા જોઈતા હતા. મમ્મીએ દુકાનમાંથી એક હજાર રૂપિયા ઉધાર લઈને આપ્યા હતા.