આજના સમયમાં ઇન્ટરનેટ વિના જીવનની કલ્પના કરવી મુશ્કેલ છે, ખાસ કરીને જ્યારે આપણે મુસાફરી કરતા હોઈએ. એરપોર્ટ પર ફ્લાઇટની રાહ જોતી વખતે કે કાફેમાં કોફી પીતી વખતે ‘Free Wi-Fi’ નું બોર્ડ જોઈને આપણને જાણે કોઈ કિંમતી ભેટ મળી હોય તેવો આનંદ થાય છે. સોશિયલ મીડિયા અપડેટ કરવા કે વીડિયો જોવા માટે આપણે તરત જ કનેક્ટ થઈ જઈએ છીએ, પરંતુ આ “મફત” ની કિંમત ઘણીવાર ખૂબ મોંઘી સાબિત થાય છે.

હેકર્સની માયાજાળ: ‘ઈવિલ ટ્વિન’ એટેક

સાયબર ગુનેગારો ખૂબ જ ચતુર હોય છે. તેઓ જાહેર સ્થળોએ અસલ નેટવર્ક જેવું જ નામ ધરાવતું નકલી વાઇ-ફાઇ નેટવર્ક બનાવે છે. ઉદાહરણ તરીકે, જો એરપોર્ટનું સત્તાવાર નેટવર્ક “Airport_Free_WiFi” હોય, તો હેકર “Free_Airport_WiFi” નામનું નેટવર્ક બનાવશે. એકવાર તમે તેની સાથે કનેક્ટ થાઓ, એટલે તમારા ફોનનો તમામ ડેટા – જેમ કે પાસવર્ડ, બેંક વિગતો અને ખાનગી ફોટા સીધા હેકરના હાથમાં પહોંચી શકે છે.

સુરક્ષિત રહેવા માટેના મહત્ત્વના પગલાં

1. ‘ઓટો-કનેક્ટ’ ને કહો અલવિદા:

આપણા સ્માર્ટફોન અગાઉ ઉપયોગમાં લીધેલા નેટવર્ક સાથે આપમેળે જોડાઈ જવાની ક્ષમતા ધરાવે છે. હેકર્સ આ સુવિધાનો દુરુપયોગ કરે છે. તમારા ફોનના સેટિંગમાં જઈને ‘Ask to Join Networks’ અથવા ‘Auto-Join’ ને બંધ કરો. આનાથી તમારો ફોન તમારી પરવાનગી વિના કોઈપણ અજાણ્યા નેટવર્ક સાથે જોડાશે નહીં.

2. બેકગ્રાઉન્ડ એપ્સ પર નિયંત્રણ:

ઘણી એપ્લિકેશનો તમે વાપરતા ન હોવ તો પણ ઇન્ટરનેટનો ઉપયોગ કરીને ડેટા ટ્રાન્સફર કરતી હોય છે. સાર્વજનિક વાઇ-ફાઇ પર આ જોખમી છે. મુસાફરી દરમિયાન માત્ર જરૂરી એપ્સને જ ડેટા એક્સેસ આપો અને બેકગ્રાઉન્ડ ડેટા રિસ્ટ્રિક્ટ કરો.

3. બ્રાઉઝિંગને સુરક્ષિત બનાવો:

જાહેર નેટવર્ક પર તમે કઈ વેબસાઈટ ખોલો છો તે ટ્રેક થઈ શકે છે. તમારા બ્રાઉઝરમાં ‘DNS-over-HTTPS’ સેટિંગ ચાલુ કરવાથી સુરક્ષાનું એક વધારાનું સ્તર ઉમેરાય છે. આ સિવાય, હંમેશા ખાતરી કરો કે વેબસાઈટ ‘https://’ થી શરૂ થાય છે, જે સુરક્ષિત કનેક્શન સૂચવે છે.

4. ટ્રાવેલ એકાઉન્ટનો ઉપયોગ:

જો તમે લેપટોપ સાથે મુસાફરી કરો છો, તો તેમાં એક અલગ ‘User Profile’ બનાવો જેમાં તમારી અંગત ફાઇલો કે બેંકિંગ ડેટા ન હોય. જો ભૂલેચૂકે લેપટોપ હેક થાય, તો પણ તમારી મુખ્ય ફાઇલો સુરક્ષિત રહેશે.

5. VPN નો ઉપયોગ શ્રેષ્ઠ વિકલ્પ:

જાહેર વાઇ-ફાઇ વાપરવું જ પડે તેમ હોય, તો ‘Virtual Private Network’ (VPN) નો ઉપયોગ કરો. તે તમારા ડેટાને એન્ક્રિપ્ટ કરે છે, જેથી હેકર તેને વાંચી શકતો નથી.

આ પણ વાંચોઃ Cancer ના ખતરાને ઓછું કરે છે આ 5 સુપર હેલ્ધી ફૂડ્સ, આજે જ ડાયેટમાં કરો સામેલ