ભારતીય સાયબર સુરક્ષા એજન્સી, CERT-In (ઇન્ડિયન કમ્પ્યુટર ઇમરજન્સી રિસ્પોન્સ ટીમ) એ એપલના વિવિધ ઉપકરણો વાપરતા યુઝર્સ માટે એક મહત્વપૂર્ણ એડવાઈઝરી જારી કરી છે. 26 માર્ચ, 2026ના રોજ બહાર પાડવામાં આવેલી આ ચેતવણી મુજબ, આઇફોન (iPhone), આઈપેડ (iPad), મેક (Mac) અને એપલ વોચ (Apple Watch) માં કેટલીક ગંભીર નબળાઈઓ જોવા મળી છે, જેનો ફાયદો ઉઠાવીને સાયબર ગુનેગારો તમારા ડિવાઇસ પર કબજો જમાવી શકે છે.

શું છે આ ખતરો?

CERT-In ના અહેવાલ મુજબ, એપલની સુરક્ષા સિસ્ટમ અને સોફ્ટવેર ઇકોસિસ્ટમમાં કેટલીક એવી ખામીઓ રહી ગઈ છે જે હુમલાખોરોને ફાયર વોલ્સ તોડવામાં મદદ કરે છે. જો આ ખામીઓ દૂર કરવામાં ન આવે, તો હેકર્સ રિમોટલી તમારા ડિવાઇસમાં ઘૂસીને તમારો સંવેદનશીલ ડેટા, અંગત ફોટા અને સૌથી ખતરનાક રીતે તમારી બેંકિંગ વિગતો ચોરી શકે છે. એટલું જ નહીં, આ નબળાઈઓનો ઉપયોગ કરીને ડિવાઇસમાં માલવેર ફેલાવી શકાય છે અથવા સિસ્ટમને સંપૂર્ણપણે ક્રેશ કરી શકાય છે.

કયા ડિવાઇસ અને સોફ્ટવેર જોખમમાં છે?

જો તમે નીચેનામાંથી કોઈ પણ જૂના વર્ઝન વાપરતા હોવ, તો તમે જોખમ હેઠળ છો:

iOS અને iPadOS: 26.4 અને 18.7.7 પહેલાના તમામ વર્ઝન.

macOS: Tahoe (26.4), Sequoia (15.7.5), અને Sonoma (14.8.5) ના જૂના વર્ઝન.

Safari Browser: 26.4 પહેલાના સંસ્કરણો.

watchOS, tvOS અને visionOS: જે 26.4 પહેલાના છે.

બચવા માટે શું કરવું?

સાયબર સુરક્ષા નિષ્ણાતોનું કહેવું છે કે આ પ્રકારના જોખમોથી બચવાનો એકમાત્ર અને શ્રેષ્ઠ રસ્તો ‘અપડેટ’ છે. ઘણીવાર યુઝર્સ નોટિફિકેશન આવવા છતાં સોફ્ટવેર અપડેટ કરવાનું ટાળતા હોય છે, પરંતુ આ જ ભૂલ હેકર્સ માટે રસ્તો ખોલી આપે છે.

1. તરત જ અપડેટ કરો: તમારા સેટિંગ્સમાં જઈને સોફ્ટવેર અપડેટ ચેક કરો અને નવીનતમ સુરક્ષા પેચ (Security Patch) ઇન્સ્ટોલ કરો.

2. ઓટોમેટિક અપડેટ ચાલુ રાખો: જેથી જ્યારે પણ કંપની નવું સિક્યુરિટી અપડેટ બહાર પાડે, ત્યારે તે આપોઆપ ઇન્સ્ટોલ થઈ જાય.

3. અજાણી લિંક્સથી બચો: સુરક્ષા નબળી હોય ત્યારે અજાણી લિંક પર ક્લિક કરવાથી હેકર્સ માટે એક્સેસ મેળવવું સરળ બની જાય છે.

આ પણ વાંચોઃ Lifestyle: દાળ રાંધતા પહેલા આ ભૂલ તો નથી કરતા ને? જાણો કયા કઠોળને કેટલો સમય પલાળવા જોઈએ