રિપોર્ટ દર્શાવે છે કે કાયદો અમલમાં આવ્યો હોવા છતાં કિશોરોમાં સોશિયલ મીડિયાના ઉપયોગમાં કોઈ અપેક્ષિત ઘટાડો થયો નથી.- પ્રતિકાત્મક ફોટો

ઓસ્ટ્રેલિયા 16 વર્ષથી નાની ઉંમરના બાળકોને સોશિયલ મીડિયાથી દૂર રાખવા માટેના પોતાના કાયદાને વધુ કડક બનાવવાની તૈયારીમાં છે.

કિશોરો માટે મુખ્ય સોશિયલ મીડિયા પ્લેટફોર્મ પર વય મર્યાદા લાગુ કરનાર ઓસ્ટ્રેલિયા દુનિયાનો પહેલો દેશ બન્યો હતો, પરંતુ શરૂઆતી પરિણામોથી સરકાર સંતુષ્ટ નથી. કાયદા હેઠળ સ્નેપચેટ, ઇન્સ્ટાગ્રામ અને યુટ્યુબ જેવા લોકપ્રિય પ્લેટફોર્મ માટે ન્યૂનતમ વય મર્યાદા નક્કી કરવામાં આવી છે. આ પછી બ્રિટન, કેનેડા, ઇન્ડોનેશિયા અને બ્રાઝિલ જેવા દેશોએ પણ આવા જ પગલાં લેવાનું શરૂ કર્યું છે.

જોકે, સરકારી રિપોર્ટ દર્શાવે છે કે કાયદો લાગુ થયા પછી પણ કિશોરોના સોશિયલ મીડિયાના ઉપયોગમાં અપેક્ષિત ઘટાડો થયો નથી. હજારો એકાઉન્ટ ચોક્કસ બંધ થયા છે, પરંતુ દસમાંથી સાત વાલીઓનું કહેવું છે કે તેમના બાળકોના એકાઉન્ટ હજુ પણ એક્ટિવ છે. સંશોધકોએ પણ શોધી કાઢ્યું છે કે મોટાભાગના ઓસ્ટ્રેલિયન કિશોરો કોઈને કોઈ સોશિયલ મીડિયા પ્લેટફોર્મનો ઉપયોગ કરી રહ્યા છે.

વડાપ્રધાન એન્થોની અલ્બેનીઝે જણાવ્યું હતું કે મોટી ટેક કંપનીઓ કાયદાનું પાલન સુનિશ્ચિત કરવા માટે પૂરતા પગલાં લઈ રહી નથી. તેમના મતે, હજુ પણ મોટી સંખ્યામાં બાળકો સોશિયલ મીડિયા પર હાજર છે. સંચાર મંત્રી અનિકા વેલ્સે આરોપ લગાવ્યો હતો કે ટેક કંપનીઓ નિયમોથી બચવા માટે ન્યૂનતમ પ્રયાસ કરી રહી છે અને પોતાની જૂની રણનીતિઓ અપનાવી રહી છે. બીજી તરફ, ટેક કંપનીઓએ આ કાયદાને અત્યંત કઠોર ગણાવતા કહ્યું છે કે તેમાં પ્લેટફોર્મ પર પહેલાથી જ હાજર સુરક્ષા ઉપાયોને અવગણવામાં આવ્યા છે. પ્રતિબંધિત પ્લેટફોર્મ રેડિટે તો ઓસ્ટ્રેલિયન સરકાર વિરુદ્ધ કેસ પણ કર્યો છે.

કંપનીની દલીલ છે કે આ કાયદો બાળકોના રાજકીય સંવાદ અને અભિવ્યક્તિના અધિકારોનું ઉલ્લંઘન કરે છે. આ દરમિયાન ઓસ્ટ્રેલિયાના ઈ-સેફ્ટી કમિશનરે ફેસબુક, ઇન્સ્ટાગ્રામ, સ્નેપચેટ, ટિકટોક અને યુટ્યુબ વિરુદ્ધ કાયદાના પાલનની તપાસ શરૂ કરી દીધી છે. કાયદા હેઠળ પ્રતિબંધિત 10 સોશિયલ મીડિયા પ્લેટફોર્મથી બાળકોને દૂર રાખવા સંબંધિત કંપનીઓની જવાબદારી છે.

ઓનલાઈન સેફ્ટી રેગ્યુલેટરના કાયદાકીય અધિકારો વધશે

કાયદો તોડનારી ટેકનોલોજી કંપનીઓ પર મહત્તમ દંડ બમણો વધારીને 660 કરોડ રૂપિયા કરવામાં આવશે. સરકારનું કહેવું છે કે, ઓનલાઈન સેફ્ટી રેગ્યુલેટરના કાયદાકીય અધિકારો વધારવામાં આવશે. કંપનીઓએ જણાવવું પડશે કે તેઓએ 16 વર્ષથી ઓછી ઉંમરના બાળકોને તેમના પ્લેટફોર્મથી દૂર રાખવા માટે કયા પગલાં લીધાં છે.

દિવ્ય ભાસ્કરને Google પર મનપસંદ સોર્સ બનાવો