બાંગ્લાદેશના નવા રમતગમત મંત્રી અમીનુલ હક BCCI અને ભારત સાથે સંબંધો સુધારવા માગે છે. તેમણે કહ્યું કે તેઓ આ મુદ્દાને જલ્દી ઉકેલવા માગે છે. તેમણે બાંગ્લાદેશના વર્તમાન T20 વર્લ્ડ કપમાં ભાગ ન લેવાનો ઉલ્લેખ કર્યો.

હકે કહ્યું- શપથ લીધા પછી હું સંસદ ભવનમાં ભારતના ડેપ્યુટી હાઈ કમિશનરને મળ્યો. મેં તેમની સાથે T-20 વર્લ્ડ કપ વિશે વાત કરી. આ એક સારી વાતચીત હતી. મેં તેમને કહ્યું કે અમે આ મુદ્દાને વાતચીત દ્વારા જલ્દી ઉકેલવા માગીએ છીએ કારણ કે અમે અમારા બધા પડોશી દેશો સાથે મૈત્રીપૂર્ણ સંબંધો જાળવી રાખવા માગીએ છીએ.

આ T-20 વર્લ્ડ કપમાં બાંગ્લાદેશને તેની મેચો મુંબઈ અને કોલકાતામાં રમવાની હતી. જોકે, સુરક્ષા કારણો ટાંકીને ટીમે ભારત પ્રવાસે આવવાનો ઇનકાર કર્યો. આ પછી ICCએ બાંગ્લાદેશની જગ્યાએ સ્કોટલેન્ડને ટુર્નામેન્ટમાં સામેલ કરવાનો નિર્ણય કર્યો હતો.

PM મોદીએ તારિક રહેમાનને જીતની શુભેચ્છા પાઠવી હતી

આ પહેલા 13 ફેબ્રુઆરીના રોજ PM મોદી અને રહેમાન વચ્ચે પહેલી ફોન પર વાતચીત થઈ હતી. મોદીએ તારિક રહેમાનને જીતની શુભેચ્છા પાઠવી હતી. તેમણે કહ્યું કે તેઓ બંને દેશોના સંબંધોને મજબૂત કરવા અને સામાન્ય વિકાસ લક્ષ્યોને આગળ વધારવા માટે સાથે કામ કરવા ઉત્સુક છે.

BNPએ X પર એક પોસ્ટમાં મોદીના અભિનંદન સંદેશ માટે આભાર માન્યો. પાર્ટીએ કહ્યું, ‘અમે ભારત સાથે રચનાત્મક રીતે જોડાવા તૈયાર છીએ. અમારા સંબંધો પરસ્પર સન્માન, એકબીજાની ચિંતાઓ પ્રત્યે સંવેદનશીલતા અને ક્ષેત્રમાં શાંતિ, સ્થિરતા અને સમૃદ્ધિની સામાન્ય પ્રતિબદ્ધતાથી આગળ વધશે.’

બાંગ્લાદેશે ભારતમાં રમવાનો ઇનકાર શા માટે કર્યો, જાણો 2 કારણો

1. બાંગ્લાદેશમાં હિંદુઓની સતત થઈ રહેલી હત્યાઓના વિરોધમાં ભારતીય ક્રિકેટ કંટ્રોલ બોર્ડ (BCCI) એ બાંગ્લાદેશી પેસર મુસ્તફિઝુર રહેમાનને IPL માંથી બહાર કરાવી દીધો. BCB એ તેનો વિરોધ કર્યો.

2. મુસ્તફિઝુરને બહાર કરાતા બાંગ્લાદેશની રાજકીય પાર્ટીઓએ મુદ્દો બનાવી દીધો. પછી યુનુસ સરકારે પોતાના દેશમાં IPL પ્રસારણ પર પ્રતિબંધ લગાવી દીધો. આ પછી ક્રિકેટ બોર્ડે ભારતમાં વર્લ્ડ કપ ન રમવાની માગ કરી, જેને ICC એ ઠુકરાવી દીધી.

ભારતમાં ખેલાડીઓની સુરક્ષાની ચિંતા- નઝરુલ

બાંગ્લાદેશ સરકારના પૂર્વ રમતગમત મંત્રી આસિફ નઝરુલે નેશનલ ટીમને ભારત મોકલવાની ના પાડી હતી. તેમણે કહ્યું હતું કે, ‘અમે વર્લ્ડ કપ રમવા માગીએ છીએ, પરંતુ ભારતમાં અમારા ખેલાડીઓ અને સપોર્ટ સ્ટાફની સુરક્ષાને લઈને ચિંતા છે.’

મુસ્તફિઝુર રહેમાનને IPLમાંથી બહાર કરવા પર વિવાદ

બાંગ્લાદેશમાં હિંદુઓની હત્યાના કારણે BCCIએ મુસ્તફિઝુર રહેમાનને IPLમાં રમવાની મંજૂરી આપી ન હતી. તેને KKRએ 3 જાન્યુઆરીએ BCCIના કહેવા પર ટીમમાંથી બહાર કર્યો હતો.

તેનાથી ગુસ્સે ભરાયેલી બાંગ્લાદેશ સરકારે પોતાના દેશમાં IPL મેચોના પ્રસારણ પર પ્રતિબંધ મૂક્યો. આ પછી ખેલાડીઓની સુરક્ષાનો હવાલો આપીને 7 ફેબ્રુઆરીથી શરૂ થનારા T20 વર્લ્ડ કપમાં સ્થળ બદલવાની માગ પણ કરી.

KKRએ મુસ્તફિઝુરને ₹9.2 કરોડમાં ખરીદ્યો હતો 16 ડિસેમ્બરે IPL મિની ઓક્શનમાં કોલકાતા નાઈટ રાઈડર્સ (KKR)એ બાંગ્લાદેશી બોલર મુસ્તફિઝુર રહેમાનને 9.20 કરોડ રૂપિયામાં ખરીદ્યો હતો. આ પછી બાંગ્લાદેશમાં હિંદુઓની હત્યાના કારણે ભારતમાં મુસ્તફિઝુરનો વિરોધ થવા લાગ્યો. ત્યાં 7 હિંદુઓની હત્યા કરવામાં આવી છે. પછીથી BCCIએ મુસ્તફિઝુરને IPL રમવાની મંજૂરી આપી ન હતી અને 3 જાન્યુઆરીએ KKRએ તેને રિલીઝ કરી દીધો.

દિવ્ય ભાસ્કરને Google પર મનપસંદ સોર્સ બનાવો