ભારતીય ક્રિકેટ કંટ્રોલ બોર્ડ (BCCI) ખેલાડીઓની સતત વધી રહેલી ઈજાઓને લઈને ગંભીર બન્યું છે. બોર્ડ ટૂંક સમયમાં ટીમના મુખ્ય ફિઝિયો કમલેશ જૈનના કામકાજની સમીક્ષા કરશે.

કમલેશ 2022માં નિતિન પટેલની જગ્યાએ ભારતીય ટીમના મુખ્ય ફિઝિયો બન્યા હતા. તાજેતરના મહિનાઓમાં ઘણા મુખ્ય ખેલાડીઓ ઈજાગ્રસ્ત થયા છે. ફાસ્ટ બોલર જસપ્રીત બુમરાહ આ યાદીમાં સામેલ થનાર તાજેતરનો ખેલાડી છે.

બુમરાહ ઉપરાંત હર્ષિત રાણા અને નીતિશ કુમાર રેડ્ડી પણ ઈજાને કારણે પસંદગી માટે ઉપલબ્ધ નહોતા. વોશિંગ્ટન સુંદર પ્રથમ ટેસ્ટ રમી શક્યો નહોતો અને બીજી ટેસ્ટમાં પણ તેના રમવા પર શંકા છે. જ્યારે સાઈ સુદર્શનને પણ BCCIના સેન્ટર ઓફ એક્સેલન્સ (CoE) તરફથી ફિટનેસ ક્લિયરન્સ મળ્યા પછી જ ટીમમાં સામેલ કર્યો હતો.

કેપ્ટન અને કોચ નારાજ

ઇંગ્લેન્ડમાં તાજેતરમાં યોજાયેલી વ્હાઇટ-બોલ સિરીઝ દરમિયાન આ વિષય પર ઘણી વખત ચર્ચા થઈ છે. કેપ્ટન શુભમન ગિલ અને કોચ ગૌતમ ગંભીર ખેલાડીઓના વારંવાર ઇજાગ્રસ્ત થવાથી નાખુશ છે. બંને માટે આ સમય નિરાશાજનક રહ્યો છે, કારણ કે તેમને ફિટનેસ સમસ્યાઓના કારણે તેમની પ્રથમ પસંદગીની ટીમ સાથે રમવાનો મોકો મળ્યો નથી.

લોર્ડ્સમાં મળેલી હાર પછી ગિલે કહ્યું હતું કે સવારે મેદાન પર આવીને એ જાણવું કે કોઈ ખેલાડી ઇજાગ્રસ્ત છે, તે ખૂબ મુશ્કેલ હોય છે. તેમણે કહ્યું કે જો કોઈ ખેલાડી 80 ટકા ફિટ હોય અને તમે પાંચ બોલરો સાથે રમી રહ્યા હો, તો આવા સંજોગોમાં જો તે ખેલાડી પાંચ ઓવર પછી બહાર થઈ જાય, તો બોલિંગ કોણ કરશે. તેણે સ્વીકાર્યું કે ટીમને પોતાની ફિટનેસમાં સુધારો કરવાની જરૂર છે.

ભારતીય ટેસ્ટ અને વન-ડે ટીમના કેપ્ટન શુભમન ગિલ અને તેની સાથે ટીમ ઈન્ડિયાના હેડ કોચ ગૌતમ ગંભીર.

CoE અને સપોર્ટ સ્ટાફ પર ઉઠ્યા સવાલ

વધતી ઈજાઓ વચ્ચે બેંગલુરુ સ્થિત સેન્ટર ઑફ એક્સેલન્સ (CoE) અને મેડિકલ સપોર્ટ સિસ્ટમ પર પણ સવાલો ઉઠી રહ્યા છે. સૂત્રો અનુસાર, કેટલાક સિનિયર ખેલાડીઓ સારવાર અને સલાહ માટે BCCI બહારના નિષ્ણાતોનો પણ સંપર્ક કરી રહ્યા છે.

આ ઉપરાંત, પૂર્વ સ્ટ્રેન્થ એન્ડ કન્ડિશનિંગ કોચ સોહમ દેસાઈની જગ્યાએ એડ્રિયન લે રૂના આગમન પછી થયેલા ફેરફારોને લઈને પણ કેટલાક ખેલાડીઓ સંપૂર્ણપણે સહજ નથી.

બોર્ડ જવાબદારી નક્કી કરવાની તૈયારીમાં

BCCI સાથે સંકળાયેલા એક સૂત્રએ જણાવ્યું કે જ્યારે કેપ્ટન અને કોચને તેમની પ્રથમ પસંદગીના 15 ખેલાડીઓ જ ઉપલબ્ધ નહીં હોય, ત્યારે શ્રેષ્ઠ પ્લેઇંગ-11 પસંદ કરવું મુશ્કેલ બનશે.

સૂત્ર અનુસાર, ટીમમાં સ્થાન મેળવવાની સખત સ્પર્ધાને કારણે ઘણા ખેલાડીઓ પોતાને જરૂર કરતાં વધુ દબાણ હેઠળ મૂકે છે. આવી સ્થિતિમાં, સપોર્ટ સ્ટાફ અને સેન્ટર ઑફ એક્સેલન્સની જવાબદારી છે કે તેઓ સમયસર ખેલાડીઓની ફિટનેસ પર યોગ્ય નિર્ણય લે અને જોખમ ન ઉઠાવે. આ જ કારણોસર બોર્ડ હવે સમગ્ર મેડિકલ અને સપોર્ટ સિસ્ટમની સમીક્ષા કરવાની તૈયારીમાં છે.

શ્રીલંકા સિરીઝ પછી મોટા ફેરફારોના સંકેત

ભારતનું ક્રિકેટ કેલેન્ડર ઘણું વ્યસ્ત છે, જેમાં શ્રીલંકા સામેની બે ટેસ્ટ મેચનો સમાવેશ થાય છે. આ સિરીઝ સમાપ્ત થયા પછી BCCI હેડ ફિઝિયોથેરાપિસ્ટ અને ટીમ ડોક્ટરના પદો માટે નવા નામો પર વિચાર કરી શકે છે. હાલમાં કમલેશ જૈન અને ડો. રિઝવાન ખાન આ બે પદો પર કાર્યરત છે.

દિવ્ય ભાસ્કરને Google પર મનપસંદ સોર્સ બનાવો