બ્રોન્કો ટેસ્ટમાં પાંચ સેટ હોય છે. દરેક સેટમાં ખેલાડીઓએ 20 મીટર અપ-ડાઉન, 40 મીટર અપ-ડાઉન અને 60 મીટર અપ-ડાઉનની દોડ લગાવવી પડે છે. એટલે કે, એક સેટમાં કુલ 240 મીટર દોડવું પડે છે. આખા ટેસ્ટમાં આવા પાંચ સેટ લગાવવાના હોય છે. સેટની વચ્ચે કોઈ બ્રેક હોતો નથી. પહેલા આખા ટેસ્ટ માટે 6 મિનિટનો સમય હતો. હવે તેમાં 40 સેકન્ડ સુધીનો ઘટાડો કરવામાં આવ્યો છે.

બ્રોન્કો ટેસ્ટ ઉપરાંત ખેલાડીઓએ 2 કિલોમીટરની રનિંગ પણ કરવી પડે છે. પહેલા આ એક સ્ટેન્ડ અલોન ટેસ્ટ હતો. એટલે કે, તેને બ્રોન્કો સાથે લેવામાં આવતો ન હતો. જૂના નિયમ મુજબ ફાસ્ટ બોલરોએ 8 મિનિટ 15 સેકન્ડમાં 2 કિલોમીટર દોડવું પડતું હતું. બાકીના ખેલાડીઓ માટે 8 મિનિટ 30 સેકન્ડનો સમય નિર્ધારિત હતો.

હવે 2 કિલોમીટરની રનિંગ બ્રોન્કો ટેસ્ટ પછી તરત જ કરવી પડશે. સમયમાં થોડી છૂટછાટ આપવામાં આવી છે. ખેલાડીઓ 2 કિલોમીટરની દોડ 9થી 10 મિનિટમાં પૂરી કરી શકે છે. બંને ટેસ્ટ બેક ટુ બેક હશે, તેથી ખેલાડીઓ માટે આ પહેલા કરતા વધુ પડકારજનક છે.

બ્રોન્કો ટેસ્ટ કેમ, અનફિટ હર્ષિત-નીતિશને ક્લિયરન્સ મળી હતી

• BCCI સૂત્રો અનુસાર, છેલ્લા એક વર્ષમાં ફિટનેસ ટેસ્ટના ધોરણોનું કડકપણે પાલન કરવામાં આવ્યું ન હતું.
• કેટલાક સિનિયર ખેલાડીઓને ફિટનેસ ટેસ્ટમાં પાસ કરાવવા માટે પ્રમાણમાં સરળ લક્ષ્યો આપવામાં આવ્યા હતા.
• ટીમ મેનેજમેન્ટની માંગ પર CoE સ્ટાફે હર્ષિત રાણા અને નીતિશ કુમાર રેડ્ડીને સંપૂર્ણપણે ફિટ ન હોવા છતાં ક્લિયરન્સ આપી દીધી હતી.
• ઇંગ્લેન્ડ પ્રવાસ દરમિયાન હર્ષિત રાણાને વધુ વજનને કારણે ટીમમાંથી પાછા મોકલવામાં આવ્યા હતા.
• ટીમ મેનેજમેન્ટ અનુસાર તે સમયે હર્ષિતનું વજન 97 કિલો હતું.
• હવે CoEએ તેમના માટે વજન 96 કિલોથી ઓછું રાખવાનું લક્ષ્ય નક્કી કર્યું છે.
• હાલમાં હર્ષિતનું વજન 94 કિલો છે અને આવતા અઠવાડિયા સુધીમાં તેને ફિટ જાહેર કરી શકાય છે.

વારંવારની ઈજાઓ પર ફિઝિયો પાસેથી જવાબ

ખેલાડીઓના સતત ઈજાગ્રસ્ત થવા અને ઈંગ્લેન્ડના અનુકૂળ વાતાવરણમાં પણ સ્નાયુઓમાં ખેંચાણ એટલે કે ક્રેમ્પ્સની ફરિયાદો બાદ BCCI સેક્રેટરી દેવજીત સાકિયા અને ટીમ મેનેજમેન્ટે ટીમના ફિઝિયો કમલેશ જૈન પાસેથી જવાબ માગ્યો છે.

તેમને સ્પષ્ટપણે કહેવામાં આવ્યું છે કે કોઈપણ ખેલાડીના કદ કે સ્ટાર સ્ટેટસની પરવા કર્યા વિના, જો ફિટનેસમાં ઘટાડો જોવા મળે તો તેની તાત્કાલિક જાણ કરવી. મેનેજમેન્ટનું માનવું છે કે ઘણા ખેલાડીઓની મેદાન પરની ગતિશીલતા ઘટી છે અને લાંબા સમય સુધી બેટિંગ દરમિયાન સિનિયર બેટર્સને દોડીને રન લેવામાં મુશ્કેલી પડી રહી છે.

કમલેશ જૈન વર્ષ 2022માં નીતિન પટેલની જગ્યાએ ટીમ ઈન્ડિયાના ફિઝિયો બન્યા હતા.

બુમરાહ શ્રીલંકા ટેસ્ટ સિરીઝમાંથી બહાર

સેન્ટર ઓફ એક્સેલન્સ (CoE) અને ટીમ મેનેજમેન્ટ વચ્ચે તાલમેલનો અભાવ પણ સામે આવ્યો છે. બુમરાહને 15 ઓગસ્ટથી શ્રીલંકા સામે શરૂ થનારી ટેસ્ટ સિરીઝની પ્રથમ મેચ સુધી ફિટ કરવાનું આશ્વાસન આપવામાં આવ્યું હતું, પરંતુ CoE તેમ કરી શક્યું નહીં.

જ્યારે સેન્ટ્રલ કોન્ટ્રાક્ટ ધરાવતા ખેલાડીઓને નવા ફિટનેસ પેરામીટર્સની જાણકારી પણ મોડી મળી. મોહમ્મદ સિરાજ જ્યારે શ્રીલંકા પ્રવાસ પહેલા CoE પહોંચ્યા ત્યારે અચાનક બ્રોન્કો અને 2K ટેસ્ટ કરાવવામાં આવતા તેઓ આશ્ચર્યચકિત થઈ ગયા. હવે નોન-ટેસ્ટ ખેલાડીઓને પણ આ જ નવા માપદંડો અનુસાર તૈયારી કરવા માટે કહેવામાં આવ્યું છે.

ઓવર-ટ્રેનિંગથી બર્નઆઉટનો ખતરો વધી રહ્યો છે

2023 વનડે વર્લ્ડ કપ, 2024 ટી20 વર્લ્ડ કપ અને 2025 ચેમ્પિયન્સ ટ્રોફી દરમિયાન ભારતનું ઇન્જરી મેનેજમેન્ટ ખૂબ જ અસરકારક રહ્યું હતું. તે સમયે ખેલાડીઓ પર વધારાનું દબાણ નાખ્યા વિના ફિટનેસ જાળવી રાખવા પર ભાર મૂકવામાં આવતો હતો. યો-યો ટેસ્ટ પણ છ મહિનામાં એકવાર અથવા ઇજામાંથી પાછા ફરતી વખતે જ કરાવવામાં આવતો હતો.

હવે CoEમાં ખેલાડીઓ પાસેથી વારંવાર યો-યો, બ્રોન્કો અને 2K ટેસ્ટ કરાવવામાં આવી રહ્યા છે. નિષ્ણાતોનું માનવું છે કે ઈજા નિવારણ પર ધ્યાન કેન્દ્રિત કરવાને બદલે જરૂરિયાત કરતાં વધુ વર્કલોડ આપવાથી ખેલાડીઓ માનસિક અને શારીરિક રીતે થાકી શકે છે, જેનાથી ઈજાનું જોખમ પણ વધી શકે છે.

દિવ્ય ભાસ્કરને Google પર મનપસંદ સોર્સ બનાવો