ટેકનોલોજીના જમાનામાં Google Gemini AIનો ઉપયોગ વધ્યો છે. તાજેતરમાં ગૂગલના અદ્યતન AI મોડેલ ‘જેમિની’ ને લઈને મોટી અપડેટ સામે આવી. સામે આવેલા અહેવાલો મુજબ સાયબર સિક્યોરિટી ટેસ્ટિંગ દરમિયાન Google Gemini AI દ્વારા 3 મોટી કંપનીઓનું નેટવર્ક હેક કરવાની ઘટના સામે આવી છે. વોલ સ્ટ્રીટ જર્નલના અહેવાલ અનુસાર, આ ઘટના સાયબર સિક્યોરિટી ફર્મ ‘ઇરેગ્યુલર’ દ્વારા હાથ ધરવામાં આવેલા એક પરીક્ષણ દરમિયાન બની હતી. ઇન્ટરનેટ કનેક્ટિવિટી ચાલુ રહી જતાં, મોડેલે કાલ્પનિક લક્ષ્યને બદલે વાસ્તવિક કોર્પોરેટ સિસ્ટમમાં પ્રવેશ કરી લીધો હતો.

અનધિકૃત પ્રવેશ અને ગૂગલનો બચાવ

પરીક્ષણ દરમિયાન જેમિનીએ પાસવર્ડ્સનું અનુમાન લગાવીને તથા ઓનલાઇન ઉપલબ્ધ ઓળખપત્રોનો ઉપયોગ કરીને સિસ્ટમમાં અનધિકૃત ઍક્સેસ મેળવી હતી. જોકે, ગૂગલે સ્પષ્ટતા કરી છે કે મોડેલને જ્યારે ભૂલનો ખ્યાલ આવ્યો ત્યારે તેણે તરત જ હુમલો અટકાવી દીધો હતો અને ડિસ્કનેક્ટ થઈ ગયું હતું. ગૂગલે આ સમગ્ર બાબતને બગ બાઉન્ટી પ્રોગ્રામ સમાન ગણાવી હતી અને દાવો કર્યો હતો કે કોઈ કંપનીને નુકસાન પહોંચ્યું નથી.

નિષ્ણાતોની ચિંતા અને કારણો

બીજી તરફ, સાયબર સિક્યોરિટી નિષ્ણાતોએ આ ઘટનાને માનવ નિયંત્રણ અને સુરક્ષા પ્રોટોકોલની ગંભીર નિષ્ફળતા ગણાવી છે. આ ઘટના ‘કેપ્ચર-ધ-ફ્લેગ’ ટેસ્ટિંગ દરમિયાન માનવ ભૂલને કારણે થઈ હતી, જેમાં બંધ વાતાવરણને બદલે ઇન્ટરનેટ કનેક્ટિવિટી ખુલ્લી રહી ગઈ હતી. ગૂગલે આ મામલે સત્તાવાળાઓ અને અસરગ્રસ્ત કંપનીઓને જાણ કરી દીધી છે, પરંતુ કંપનીઓના નામ જાહેર કરવાનું ટાળ્યું છે.

આ પણ વાંચો : Apple હજુ આઇફોન-18 સિરીઝના નવા મોડલ લોન્ચ કરશે, 2027માં આવશે iPhone 18, iPhone Air 2 અને iPhone 18e