અનુજ ટિક્કુની ક્યાંય કોઈ ભાળ મળી રહી ન હતી, જેના પછી પોલીસે CDR (કોલ ડિટેલ રેકોર્ડ) દ્વારા તેનું લોકેશન શોધી કાઢ્યું. અનુજ ટિક્કુનું લોકેશન, હત્યાના દિવસે પહેલા મુંબઈ અને પછી ગોવા નજીક ચિપલૂનમાં હતું.

હત્યાના 3 દિવસ પછી 10 એપ્રિલે અનુજ ટિક્કુની ચિપલૂનથી ધરપકડ કરવામાં આવી.

ધરપકડ પછી લેવાયેલી અનુજ ટિક્કુની તસવીર.

તેમની સાથે હાજર વ્યક્તિ કરણ સૂદની પણ ધરપકડ કરવામાં આવી. બંનેની ફિંગરપ્રિન્ટ્સ લેવામાં આવી. ધરપકડ પછી અનુજને પોલીસ દ્વારા જણાવવામાં આવ્યું કે તેમના પિતાની હત્યા કરી દેવામાં આવી છે.

તે દિવસને યાદ કરતા અનુજ ટિક્કુ કહે છે, ‘હું બેહોશ થઈ ગયો હતો. મારો ચહેરો એકદમ સફેદ થઈ ગયો હતો. મારી સામે અંધારું છવાઈ ગયું હતું, જેનો અનુભવ મેં મારા જીવનમાં ક્યારેય કર્યો ન હતો. મારું શરીર એક તરફથી સુન્ન થઈ ગયું હતું. એટલો ડર હતો, ધ્રુજારી આવી રહી હતી.’

હત્યાના કેસમાં અનુજને કસ્ટડીમાં લઈને પૂછપરછ શરૂ કરવામાં આવી. પોલીસે પહેલો સવાલ કર્યો, જે સમયે તમારા પિતાની હત્યા થઈ, તમે ક્યાં હતા?

અનુજે જવાબ આપ્યો- ‘હું ગોવામાં હતો. મારો મિત્ર કરણ સૂદ મને પોતાની સાથે કસિનો બતાવવા ગોવા લઈ ગયો હતો. અમે ચિપલૂનમાં રોકાયા હતા.’

જ્યારે પોલીસે પૂછ્યું કે આખરે 7 એપ્રિલના રોજ શું થયું. જવાબ મળ્યો- ‘મારા પિતા 7 એપ્રિલે જ મુંબઈ આવ્યા હતા. અમે અમારો ફ્લેટ ભાડે આપી રહ્યા હતા, તેઓ ફક્ત રેન્ટલ એગ્રીમેન્ટ જોવા આવ્યા હતા. બીજી સવારે તેમને ફરી દિલ્હી પાછા ફરવાનું હતું.’

અનુજ દિવ્ય ભાસ્કર સાથેની વાતચીતમાં 7 એપ્રિલનો તે ભયાનક દિવસ યાદ કરીને કહે છે, ‘સવારે મારી ક્રિએટિવ રાઇટિંગ ચાલતી હતી. મારી એક કંપની હતી, જેમાં અમે ટીવી શો લખતા હતા. ત્યારે મારા મિત્ર તિવારીજી આવ્યા. અમે લંચ પર ગયા, ઢોસા ખાધા. લગભગ 7 વાગ્યે મારી પાસે કરણનો ફોન આવ્યો. હું તેને હોટેલિયર કરણ સૂદ તરીકે ઓળખતો હતો. તેણે કહ્યું ગોવા જઈએ, તને કસિનો બતાવીશ. તે મને મર્સિડીઝમાં ફેરવતો હતો.’

‘તે જ દિવસે મારા પિતા રેન્ટલ એગ્રીમેન્ટ ચેક કરવા આવ્યા. બીજા દિવસે સવારે તેમની વાપસી હતી. મેં પિતાજી સાથે જમ્યું અને પછી હું 8-9 વાગ્યે કરણ સૂદ સાથે ગોવા નીકળી ગયો. મારા નીકળવાના 5-10 મિનિટ પહેલા જ મનોજ અને ધનંજય આવ્યા હતા. મેં પપ્પાને કહ્યું કે આ લોકો પેઇન્ટ-વેઇન્ટ કરવા માંગે છે. પછી હું નીકળી ગયો.’

જે રેન્ટલ એગ્રીમેન્ટનો અનુજે ઉલ્લેખ કર્યો, તે તેમના અને એક વિદેશી મહિલા વચ્ચે બન્યો હતો. અનુજના સમર્થ આંગણ એપાર્ટમેન્ટમાં 3 ફ્લેટ હતા. એકમાં તે પોતે રહેતા હતા અને બાકીના ફ્લેટ તે બોલિવૂડના સ્ટ્રગલર એક્ટર ને ભાડે આપતા હતા. કેટલાક દિવસોથી બે ફ્લેટ ખાલી પડ્યા હતા. આવી સ્થિતિમાં તેમના મિત્ર કરણ સૂદે તેમને એક વિદેશી મહિલા સાથે મળાવ્યા, જે તે ફ્લેટ ભાડે લેવા માંગતી હતી. કરણે પોતે રેન્ટલ એગ્રીમેન્ટ બનાવ્યો હતો. આ ઉપરાંત, તેણે તેના બે નોકરો ધનંજય શિંદે અને મનોજ ગજકોશને મોકલીને ફ્લેટનું રિનોવેશન કરાવી રહ્યો હતો.

અનુજનું નિવેદન સાંભળતા જ, પોલીસને પહેલો શક તેમના મિત્ર કરણ સૂદ પર થયો, જેના બે નોકરોને છેલ્લી વાર તે ફ્લેટમાં અરુણ ટિક્કુ સાથે જોવામાં આવ્યા હતા.

મુંબઈ પોલીસના વરિષ્ઠ અધિકારી હિમાંશુ રોય આ કેસની તપાસ કરી રહ્યા હતા. જેમ જ તેમણે કરણ સૂદની પૂછપરછ કરી, તેઓ આશ્ચર્યચકિત થઈ ગયા. જે કરણ સૂદને અનુજ ટિક્કુ પોતાનો નજીકનો મિત્ર કહી રહ્યા હતા, તે કોઈ શ્રીમંત હોટેલિયર નહીં પણ મોસ્ટ વોન્ટેડ ગુનેગાર વિજય પલાંડે હતો, જેનું નામ અગાઉ પણ ઘણી હત્યાઓમાં સામે આવી ચૂક્યું હતું. જે સમયે વિજયને કોર્ટમાં રજૂ કરવામાં આવ્યો, તે કસ્ટડીમાંથી ભાગી છૂટ્યો. જોકે, થોડા સમય પછી તેને ચર્ચગેટથી ફરીથી પકડી લેવામાં આવ્યો.

વિજય પલાંડેને 1998માં ડબલ મર્ડર કેસમાં આજીવન કેદ થઈ હતી.

જ્યારે પોલીસે અનુજને પૂછ્યું કે આખરે તે વિજય પલાંડે ઉર્ફે કરણ સૂદને કેવી રીતે ઓળખે છે, તો અનુજે સિમરન સૂદનું નામ લીધું. સિમરન સૂદ એક એક્ટ્રેસ હતી, ઘણી ફિલ્મોમાં જોવા મળી હતી અને મુંબઈમાં મોડેલિંગ કરતી હતી.

સિમરન સૂદ જાણીતી મોડેલ હતી, જે બોલિવૂડ ફિલ્મ ‘અનોખા અનુભવ’માં જોવા મળી હતી.

અનુજે પોલીસને જણાવ્યું કે કરણ સૂદ, એક્ટ્રેસ સિમરન સૂદનો ભાઈ છે, જેના વિદેશમાં ઘણા હોટલ છે. આ બધું જૂઠાણું હતું. ન તો સિમરન સૂદનું અસલી નામ સિમરન હતું, ન તો કરણ સૂદે સાચી ઓળખ જણાવી હતી. સિમરનનું અસલી નામ સીમા દુસાંઝ હતું અને કરણ સૂદ વિજય પલાંડે હતો. બંને ભાઈ-બહેન પણ નહોતા. 1997માં તેમના લગ્ન થયા હતા.

એક્ટ્રેસ સિમરન સૂદની એન્ટ્રીથી કેસ વધુ ગૂંચવાઈ ગયો. જોકે, અનુજના નિવેદનથી પોલીસ સમજી ગઈ હતી કે તેમનો આ હત્યા સાથે કોઈ સંબંધ નથી. પૂછપરછ પછી, પોલીસ અધિકારી હિમાંશુ રોયે પ્રેસ કોન્ફરન્સ કરીને અનુજ ટિક્કુને કેસમાં ક્લીનચિટ આપી દીધી અને તેમને સરકારી સાક્ષી બનાવવામાં આવ્યા.

સિમરન અને કરણ (વિજય પલાંડે) અનુજ ટિક્કુના ખાસ મિત્રો હતા. વર્ષ 2010માં જ અનુજની મિત્રતા એક્ટ્રેસ સિમરન સૂદ સાથે થઈ અને ટૂંક સમયમાં જ બંને એકબીજાના ઘરે આવવા-જવા લાગ્યા.

હવે સવાલ એ હતો કે આખરે જાણીતા એક્ટર અનુજ ટિક્કુની કુખ્યાત અપરાધી સાથે મિત્રતા કેવી રીતે અને શા માટે થઈ અને આ બધામાં એક્ટ્રેસ સિમરન સૂદને શું લેવાદેવા હતું. તે સિમરન જ હતી, જેણે સુનિયોજિત ષડયંત્ર હેઠળ અનુજ સાથે નિકટતા વધારી હતી.

સિમરન સાથે 2010માં થયેલી પહેલી મુલાકાતને યાદ કરતા અનુજ ટિક્કુ કહે છે, ‘2010માં, મર્ડરના લગભગ બે વર્ષ પહેલાં સિમરન સાથે મારી મુલાકાત થઈ હતી. હું એક સ્ટુડિયોમાં ડબિંગ માટે ગયો હતો. ત્યાં મ્યુઝિક ડિરેક્ટર જાન નિસાર મારા મિત્ર હતા. ત્યાં સિમરન પણ એક આલ્બમ કટ કરાવવા આવી હતી. મારા ડિરેક્ટર મિત્રએ જ મારો પરિચય સિમરન સાથે કરાવ્યો. અમારી મિત્રતા થઈ. બોલિવૂડમાં તમે ઘણા લોકોને મળો છો. દરરોજ ચાર-પાંચ લોકોને મળો છો, ડિરેક્ટર્સ, પ્રોડ્યુસર્સ. તે એક દિવસ ઘરે આવી તો ત્યાં મારી મૈત્રીપૂર્ણ મુલાકાત થઈ. અમે બંનેએ એકબીજા સાથે પુસ્તકોની આપ-લે કરી. તે મારા પુસ્તકો લઈ જતી હતી, મારી સીડી, વીડિયો લઈ જતી હતી. એક-બે વાર આમ જ તેનું ઘરે આવવા-જવાનું થયું. હું પણ તેના ઘરે જતો હતો.’

અનુજ આગળ જણાવે છે, ‘સિમરને કહ્યું હતું કે તે એક મોડેલ છે અને બે-ત્રણ ફિલ્મો કરી ચૂકી છે અને અહીં લોખંડવાલામાં નજીકમાં રહે છે અને વધારે કંઈ નહીં. મને યાદ છે કે મારા પિતાજીના મર્ડરના બે મહિના પહેલાથી તે મને વધારે મળવા લાગી હતી કારણ કે મને લાગે છે કે હું તેનો એક ટાર્ગેટ હતો.’ તે સિમરન જ હતી, જેણે અનુજની કરણ સૂદ (વિજય પલાંડે) સાથે પહેલી મુલાકાત કરાવી હતી. સિમરન મુંબઈમાં ઓબેરોય સ્પ્રિંગમાં રહેતી હતી. એક દિવસ ત્યાં જ અનુજની વિજય પલાંડે સાથે પહેલી મુલાકાત થઈ.

આના પર અનુજ કહે છે, ‘એક વાર હું સિમરનના ઘરે ગયો હતો. ત્યાં સિમરને મને વિજય પલાંડેને કરણ સૂદના નામથી ઇન્ટ્રોડ્યુસ કરાવ્યો. એમ કહીને કે આ મારો ભાઈ છે, આ હોટેલ બિઝનેસમાં છે, એના સ્પેનમાં હોટલ્સ વગેરે છે, વિદેશ આવતો-જતો રહે છે, ટ્રાવેલ કરે છે. મને પછીથી ખબર પડી કે તે વિજય પલાંડે હતો જ્યારે મારા પિતાનું મર્ડર થઈ ચૂક્યું હતું. પોલીસે જણાવ્યું કે આ વિજય પલાંડે છે અને એક કન્વિક્ટેડ મર્ડરર છે.’

અનુજ કહે છે, ‘જો હું તમને કરણ સૂદ સાથે મળાવું તો તમે કહેશો કે આ તો બહુ સારો અને ભલો માણસ છે. મને ક્યારેય શંકા કરવાનું મન થયું નથી. જેવો હું તેને મળ્યો, મેં હેન્ડશેક કર્યો. તે સમયે તે લંડન જઈ રહ્યો હતો. તેણે કહ્યું- પછી મળીશું. તેણે ચાર બોટલ વ્હિસ્કી મારા હાથમાં પકડાવી દીધી. “ચલો, એન્જોય યોરસેલ્ફ, જ્યારે હું આવીશ ત્યારે મળીશું.” ખૂબ જ મૈત્રીપૂર્ણ રીતે તેણે પોતાને રજૂ કર્યો જેના કારણે મને તેના પર બિલકુલ શંકા ન થઈ.’

અનુજના પિતા અરુણ ટિક્કુની પણ વિજય સાથે મુલાકાત થઈ હતી

અરુણ ટિક્કુના મર્ડરના બરાબર બે મહિના પહેલા જ અનુજે તેમની મુલાકાત વિજય અને સિમરન સાથે કરાવી હતી. અરુણ, દિલ્હી આવ્યા હતા, ત્યારે અનુજ તેમને સિમરનના ઘરે લઈ ગયા. ત્યાં બધાએ ચાઈનીઝ ઓર્ડર કર્યું, સાથે ડિનર કર્યું. બધાએ ઘણી વાર સુધી વાત કરી. ત્યારે કરણ સૂદ ઉર્ફ વિજયે અરુણ ટિક્કુને કહ્યું હતું કે તે જલ્દી જ અનુજને પણ પોતાની સાથે હોટેલ બિઝનેસમાં જોડી લેશે.

અરુણ ટિક્કુ હત્યાકાંડની તપાસ ચાલી જ રહી હતી કે પોલીસને વિજય પલાંડેના બેંક લોકરમાંથી એક સુસાઈડ નોટ મળી. આ નોટ અનુજ ટિક્કુના હસ્તાક્ષરમાં હતી અને તેના પર તેમની સહી પણ હતી. અનુજ ફરી શંકાના ઘેરામાં આવી ગયા, જેના પછી ઘણા મોટા સવાલો ઊભા થયા.

પહેલો સવાલ- શું અનુજે પિતાની હત્યા કરાવી અને પછી આત્મહત્યાનો પ્રયાસ કર્યો?

બીજો સવાલ- અનુજ ટિક્કુની સુસાઈડ નોટ કુખ્યાત અપરાધી વિજય પલાંડેના લોકરમાં કેમ હતી?

ત્રીજો સવાલ- શું વિજય પલાંડે અને સિમરને અરુણ ટિક્કુની હત્યા કરાવી કે નોકર આ માટે જવાબદાર હતા?

ચોથો સવાલ- વિજય પલાંડે અને સિમરને અચાનક અનુજ સાથે મિત્રતા કેમ વધારી?

પાંચમો સવાલ- શું અનુજ ટિક્કુ હત્યાકાંડ પહેલા પણ વિજય પલાંડેએ ખરેખખર ઘણી હત્યાઓ કરી હતી?

આ તમામ સવાલોના જવાબ આવતીકાલે 13 ફેબ્રુઆરીએ, અરુણ ટિક્કુ મર્ડર કેસના પાર્ટ-2માં, ફક્ત દિવ્ય ભાસ્કર એપ પર.

………………………………………

પાર્ટ-2, એક્ટર અનુજને વિદેશમાં વીંધી નાખવાનો હતો પ્લાન: નશામાં લખાવી નકલી સુસાઈડ નોટ, પિતાની હત્યાથી બગડ્યો એક્ટ્રેસ-ગેંગસ્ટરનો પ્લાન

કરણ સૂદ (વિજય પલાંડે) અને સિમરન સૂદે પોલીસ નિવેદનમાં અનુજ ટિક્કુને પિતાની હત્યાનો માસ્ટરમાઇન્ડ કહ્યો. તેમણે કહ્યું કે અનુજના પિતા સાથેના સંબંધો સારા નહોતા. તે ડ્રગ એડિક્ટ હતો અને સમર્થ આંગણ સોસાયટીના ઘણા લોકો તેની વિરુદ્ધ ફરિયાદ કરી ચૂક્યા હતા. આવી સ્થિતિમાં, વારંવાર ફરિયાદો મળ્યા પછી અરુણ ટિક્કુ, તેમને દિલ્હી પાછા લઈ જવા માટે મુંબઈ આવ્યા હતા, પરંતુ મુંબઈમાં રહેવા અને પિતા પાસેથી ફ્લેટ હડપવા માટે અનુજે પિતાની હત્યા કરાવી દીધી.

આખી વાર્તા વાંચો આવતીકાલે, અરુણ ટિક્કુ હત્યાકાંડના પાર્ટ-2માં.