મોહમ્મદ નબી પુત્ર હસન ઇસાખિલને ડેબ્યૂ કેપ આપી.

બાંગ્લાદેશ પ્રીમિયર લીગ (BPL)માં 11 જાન્યુઆરીના રોજ અફઘાનિસ્તાનના ઓલરાઉન્ડર મોહમ્મદ નબી અને તેના પુત્ર હસન ઈસાખિલે ઇતિહાસ રચ્યો. બંનેએ નોઆખાલી એક્સપ્રેસ તરફથી રમતા શાનદાર પ્રદર્શન કર્યું અને ટોપ-ટિયર T20 લીગમાં એકસાથે બેટિંગ કરનાર પ્રથમ પિતા-પુત્રની જોડી બન્યા.

ઢાકા કેપિટલ્સ સામેની મેચમાં નબી અને હસને ચોથી વિકેટ માટે 30 બોલમાં 53 રન જોડ્યા. 19 વર્ષના હસને ઓપનિંગ કરતા 60 બોલમાં 92 રનની શાનદાર ઇનિંગ રમી, જેમાં 7 ચોગ્ગા અને 5 છગ્ગા સામેલ હતા. જ્યારે, નબીએ 13 બોલમાં 17 રન બનાવ્યા. હસનને પ્લેયર ઓફ ધ મેચ તરીકે પસંદ કર્યો.

નબી (જમણે) અને પુત્ર હસને ચોથી વિકેટ માટે 30 બોલમાં 53 રનની ભાગીદારી કરી.

નોઆખાલીએ ઢાકાને 41 રનથી હરાવ્યું નોઆખાલી એક્સપ્રેસે પ્રથમ બેટિંગ કરતા 184 રન બનાવ્યા. જવાબમાં ઢાકા કેપિટલ્સની ટીમ 143 રનમાં ઓલઆઉટ થઈ ગઈ. નબીએ બોલિંગમાં પણ સારો દેખાવ કર્યો અને બે વિકેટ ઝડપી.

અમે સામાન્ય પિતા-પુત્ર જેવા છીએ – હસન મેચ પૂરી થયા બાદ નબી અને હસન પ્રેસ કોન્ફરન્સમાં સાથે આવ્યા. અહીં જ્યારે હસનને પૂછવામાં આવ્યું કે શું તેના પિતા કડક છે, તો તેણે જવાબ આપ્યો, ના, ના. અમે સામાન્ય પિતા-પુત્ર જેવા છીએ. અમે મિત્રો છીએ.

હસને આગળ કહ્યું, મને 100 રન ન બનાવી શકવાનો અફસોસ નથી, કારણ કે હું મારી ટીમને મોટો સ્કોર આપવા માગતો હતો. તેણે કહ્યું, હું મારા પિતાની નકલ કરતો નથી, પરંતુ મારી રીતે રમું છું.

હું દીકરા સાથે રમવા માગતો હતો- નબી નબીએ કહ્યું, હું લાંબા સમયથી મારા દીકરા સાથે રમવા માગતો હતો. મેં તેને એક પ્રો ક્રિકેટર તરીકે તૈયાર કર્યો છે. તેણે કહ્યું, મેં મેચ પહેલા હસનને બોલરોની રણનીતિ અને પરિસ્થિતિઓ વિશે સમજાવ્યું, જેના કારણે હસને સારું પ્રદર્શન કર્યું.