ભારતીય રસોડામાં મેથીના દાણાનો ઉપયોગ મુખ્યત્વે મસાલા તરીકે થાય છે, પરંતુ સ્વાસ્થ્ય પ્રત્યે જાગ્રત લોકો આજકાલ વજન ઘટાડવા અને બ્લડ સુગર નિયંત્રણમાં રાખવા માટે રાત્રે પલાળેલા મેથીના દાણા ખાવાનું કે તેનું પાણી પીવાનું ખૂબ પસંદ કરે છે. ફાઇબર, આયર્ન, મેગ્નેશિયમ અને વિટામિન સી જેવા પોષક તત્વોથી ભરપૂર આ દાણા સ્વાસ્થ્ય માટે અનેક રીતે ગુણકારી સાબિત થાય છે. જો કે, નિષ્ણાતોના મતે મેથીના દાણા દરેક વ્યક્તિ માટે ફાયદાકારક નથી હોતા અને કેટલાક ખાસ સંજોગોમાં તેનું સેવન નુકસાનકારક પણ બની શકે છે.

કોણે ન કરવું જોઈએ મેથીના દાણાનું સેવન?

ડાયાબિટીસ નિષ્ણાત અને ફિઝિશિયનના જણાવ્યા અનુસાર, ગર્ભાવસ્થા દરમિયાન મહિલાઓએ મેથીના દાણા અથવા તેના પાણીનું સેવન કરવાનું ટાળવું જોઈએ, કારણ કે તે ગર્ભાશયને ઉત્તેજિત કરી શકે છે. આ ઉપરાંત સ્તનપાન કરાવતી માતાઓએ પણ ડૉક્ટરની સલાહ લીધા વિના તેનું સેવન ન કરવું જોઈએ. જો કોઈ વ્યક્તિ કોઈપણ પ્રકારની સર્જરીનું આયોજન કરી રહી હોય, તો ઓપરેશનના ઓછામાં ઓછા બે અઠવાડિયા અગાઉથી મેથીના દાણા ખાવાનું બંધ કરી દેવું જરૂરી છે, કેમ કે તે રક્તસ્ત્રાવ પર અસર કરી શકે છે.

દવાઓ અને અન્ય સ્વાસ્થ્ય સમસ્યાઓમાં સાવચેતી

જે લોકો લોહી પાતળી કરવાની દવાઓ (જેવા કે વોરફેરિન કે એસિટ્રોમ)નું સેવન કરી રહ્યા છે તેમણે પણ મેથીથી દૂર રહેવું જોઈએ, કારણ કે તે રક્તસ્ત્રાવનું જોખમ વધારી શકે છે. વળી, પાચન સંબંધી ગંભીર સમસ્યાઓ (જેમ કે IBS)થી પીડાતા લોકો માટે પણ તેનું નિયમિત સેવન હાનિકારક બની શકે છે. ડાયાબિટીસના દર્દીઓ જો ઇન્સ્યુલિન કે અન્ય દવાઓ લેતા હોય તો મેથી ખાવાથી બ્લડ સુગર અસાધારણ રીતે ઘટી શકે છે. થાઇરોઇડની દવા લેતા દર્દીઓએ પણ દવા અને મેથીના સેવન વચ્ચે ઓછામાં ઓછું બે કલાકનું અંતર રાખવું અનિવાર્ય છે.

આ પણ વાંચોઃ Ganesh Chaturthi 2026: સૌથી ધનિક ગણપતિ માટે લેવાયો 703 કરોડનો વીમો, 66 કિલો સોના અને 335 કિલો ચાંદીથી સજ્જ છે પ્રતિમા